Kabatan-onan

Naningkamot sa Pag-ampo

Si Presidente Eyring mitudlo nga ang inyong pamilya mapanalanginan pinaagi sa inyong lig-on nga relasyon sa Langitnong Amahan. Inyong mapalambo ang inyong relasyon uban Kaniya pinaagi sa pagpalambo sa inyong mga pag-ampo! Ania ang pipila ka mga ideya sa pagbuhat sa ingon:

Sa dili pa ninyo sugdan ang pag-ampo, gahini og mubo nga panahon sa paghunahuna kon unsay gusto ninyong isulti. Hunahunaa ang mga pangutana o mga butang nga naghasol kaninyo—mahimo gani ninyong isulat kini aron dili mo makalimot. Gamita kini nga panahon sa paghawan sa inyong hunahuna gikan sa mga kahasol sa adlaw aron maka-focus kamo sa malumo nga mga pag-aghat sa Espiritu Santo. Kon ang inyong hunahuna ingon og naglatagaw samtang nag-ampo mo, sulayi sa paghanduraw nga naminaw ang Langitnong Amahan. Isulti ang piho nga mga butang. Usab, hatagi og diyutayng panahon dapit sa katapusan sa pag-ampo alang sa pagpaminaw sa mga pag-aghat sa Espiritu. Mahimo ninyong isulat ang inyong mga impresyon diha sa inyong journal.

Hinumdumi nga ang pag-ampo gitawag og “usa ka matang sa buhat” (Giya Ngadto sa mga Kasulatan, “Pag-ampo”), busa ayaw og kabalaka kon kini nagkinahanglan og pagbansay o ingon og malisud! Ang inyong paningkamot sa pag-ampo makatabang kaninyo sa paghulma og usa ka relasyon sa Dios nga mopanalangin sa mga henerasyon.