Mensahe sa Unang Kapangulohan
Mga Pamilya ug Pag-ampo
Ni Presidente Henry B. Eyring
Unang Magtatambag sa Unang Kapangulohan
Kausa, samtang naglingkod ko sa kilid sa higdaanan sa akong papa sa tibuok gabii, gihisgutan niya ang mahitungod sa iyang pagkabata. Gihisgutan niya ang gugma sa iyang mga ginikanan sa lisud nga mga panahon ug ang gugma sa iyang Langitnong Amahan ug sa Manluluwas. Nahibalo ko nga himatyon na siya tungod sa kanser, mao nga wa ko mahibulong nga usahay magsagol sagol ang iyang mga pagbati alang sa iyang Langitnong Amahan ngadto sa gugma ug kamabination sa yutan-on niyang amahan. Ang akong amahan kanunayng moingon nga kon siya mag-ampo, mahunahuna niya nga makita niya sa iyang hunahuna ang pahiyom sa Langitnong Amahan.
Ang iyang mga ginikanan mitudlo kaniya pinaagi sa ehemplo sa pag-ampo ingon og siya namulong ngadto sa Dios ug nga ang Dios motubag kaniya pinaagi sa gugma. Gikinahanglan niya kana nga ehemplo hangtud sa katapusan. Sa dihang migrabe na ang iyang sakit, nakita namo siya sa buntag nga miluhod dapit sa iyang higdaanan. Naglisud na kaayo siya sa pagbalik sa iyang higdaanan. Gisultihan mi niya nga nag-ampo siya aron mangutana sa Langitnong Amahan nganong kinahanglan pa siyang mag-antus og maayo nga kanunay man unta siyang naningkamot sa pagbinuotan. Siya miingon nga usa ka malumo nga tubag ang miabut: “Ang Dios nagkinahanglan og maisug nga mga anak.”
Ug siya milahutay hangtud sa katapusan, misalig nga ang Dios nahigugma kaniya, naminaw kaniya, ug mobayaw kaniya. Napanalanginan siya nga sayo sa iyang kinabuhi nahibalo siya ug dili gayud makalimot nga ang mahigugmaong Dios sama ra kaduol sa usa ka pag-ampo.
Mao nga ang Ginoo mitudlo sa mga ginikanan, “Ug sila usab motudlo sa ilang mga anak sa pag-ampo, ug sa paglakaw nga matarung atubangan sa Ginoo” (D&P 68:28).
Ang ebanghelyo ni Jesukristo napahiuli—uban sa Basahon ni Mormon ug sa tanang mga yawe sa priesthood nga mobugkos sa mga pamilya—tungod kay si Joseph Smith sa gamay pa nga bata nag-ampo uban sa hugot nga pagtuo. Iyang nabatunan kana nga pagtuo gikan sa usa ka mahigugmaon ug matinud-anong pamilya.
Baynte ka tuig ang milabay ang Ginoo mihatag ngadto sa mga pamilya niini nga tambag diha sa “Ang Pamilya: usa Ka Pamahayag ngadto sa Kalibutan” gikan sa Unang Kapangulohan ug Korum sa Napulog Duha ka mga Apostoles: “Ang malampuson nga kaminyoon ug pamilya natukod ug napadayon diha sa mga baruganan sa hugot nga pagtuo, pag-ampo, paghinulsol, pagpasaylo, pagtahud, gugma, kalooy, buhat ug maayong pangkalingawan nga mga kalihokan.”1
Dako kaayo ang atong utang sa pagpasalamat ngadto sa pamilya ni Joseph Smith ang Propeta sa ilang pag-amuma kaniya. Gipakita sa iyang pamilya dili lang ang hugot nga pagtuo ug pag-ampo apan usab ang paghinulsol, pagpasaylo, pagtahud, gugma, kalooy, buhat ug maayong pangkalingawan nga mga kalihokan.
Ang mga henerasyon nga moabut human kaninyo motawag kaninyo nga bulahan tungod sa inyong ehemplo sa pag-ampo diha sa inyong pamilya. Mahimong dili kamo makapasanay og usa ka bantugang sulugoon sa Dios, apan pinaagi sa inyong pag-ampo ug ehemplo sa kamatinud-anon makatabang kamo sa Ginoo nga si Jesukristo sa pagpasanay og buotan ug hinigugma nga mga disipulo.
Sa tanan nga mahimo ninyong pilion sa pagtabang sa Ginoo, ang pag-ampo anaa sa sentro niini. Adunay ingon og ordinaryong mga tawo kinsa, kon sila mag-ampo, makadasig sa uban sa pag-abli sa ilang mga mata sa pagtan-aw kon si kinsa ang anaa. Kamo mamahimong ingon niana nga tawo.
Hunahunaa kon unsay ikatabang niana sa mga tawo nga kauban ninyo sa pagluhod sa inyong pamilya nga pag-ampo. Kon mobati sila nga namulong kamo sa Dios uban sa hugot nga pagtuo, ang ilang pagtuo motubo sa pagpakig-istorya usab sa Dios. Kon kamo mag-ampo sa pagpasalamat sa Dios alang sa mga panalangin nga nahibaloan nilang miabut, ang ilang pagtuo motubo nga ang Dios nahigugma kanila ug nga Siya motubag sa inyong mga pag-ampo ug motubag usab sa ilaha. Mahitabo kana diha sa pamilya nga pag-ampo lamang kon kamo aduna niana nga kasinatian sa pribado nga pag-ampo, sa matag karon ug unya.
Napanalanginan gihapon ko pinaagi sa usa ka amahan ug inahan kinsa nakigsulti sa Dios. Ang ilang ehemplo bahin sa gahum sa pag-ampo diha sa pamilya mipanalangin gihapon sa mga henerasyon nga miabut human kanila.
Ang akong mga anak ug mga apo napanalanginan kada adlaw pinaagi sa ehemplo sa akong mga ginikanan. Ang pagtuo nga ang usa ka mahigugmaong Dios maminaw ug motubag sa mga pag-ampo gipasa ngadto kanila. Makahimo kamo og ingon niana nga kabilin sa inyong pamilya. Ako nag-ampo nga inyo kining mahimo.