Mahimo Ka nga Mausab
Bisan unsa pa ang imong mga kasaypanan, makahukom ka kon unsaon pagpuyo ang imong umaabut nga potensyal.
Mga paghulagway pinaagi ni J. Beth Jepson
Atol sa seremonyas sa gradwasyon sa high school, ang tanang matang sa hunahuna mosulod sa imong ulo. Unsay sunod nga mahitabo? Andam ka na ba? Kamo ug ang inyong mga higala magpabilin ba nga magkontakay?
Dili ako, hinoon. Ako adunay usa lamang ka pangutana sa dihang turno na nako sa paglakaw atubangan sa tanan sa dihang ilang gianunsyo ang akong ngalan: tinuoray na ba ko nga mogradwar?
Dili gayud ako makonsiderar nga maayo sa klase. Ang pagtuon dili gyud prayoridad alang kanako. Ug sa akong katapusang tuig sa high school naglisud ko og maayo sa usa ka klase nga dili gani ko sigurado kon nakapasar ba ko. Ang katapusang eksamin sa sayong bahin niana nga semana maoy modeterminar sa akong dangatan, apan ang mga grado unya pa i-plastar paglabay sa usa ka semana.
Kon mahagbong ko niining klaseha, dili ko ka gradwar sa high school.
Sa katapusan, igo ra gyud ko nga nakakapyot ug nakagradwar. (Whew!) Nianang higayona aduna pay 14 ka bulan sa dili pa ko mag-19, ang edad nga pwede na nga magmisyon niana nga panahon. Nagplano ko nga motrabaho nianang panahona aron makatigum og kwarta alang sa akong misyon. Nasayud ko nga dili ko maayo nga estudyante, mao nga wala gyud ko magplano nga sulayan ang kolehiyo.
Ang Laang sa Paghatag og Limitasyon sa Kaugalingon
Mibati ka ba og sama niana? Nga ang imong mga binuhatan sa pipila ka bahin sa imong kinabuhi maoy nagprubar sa unsay kaya ra nimo nga buhaton?
Ayaw padala niana nga matang sa paghunahuna. Usa kini sa pinakadako nga mga bakak ni Satanas!
“Sa higayon nga kita mohukom—‘Ingon gyud ko niana,’ atong giputol ang atong abilidad nga mag-usab,” mitudlo si Elder Donald L. Hallstrom sa Kapangulohan sa Seventy. “Sama lang nga kita miisa sa puting bandila, mibutang sa atong hinagiban, miatras sa gubat, ug misurender—ang paglaum nga makadaug nawala.”1
Ang eskwelahan ingon og makahadlok ilabi na kon maglisud ka. Bisan sa pipila ka dili maayo nga mga grado sa imong rekord, sayon ra kaayo nga mohukom nga mao ra na ang labing maayo nimong mahimo. Apan dili kini tinuod.
“Kon kinsa kita karon dili kana mao kita sa umaabut,” miingon si Elder Hallstrom.2
Bag-ong Sinugdanan
Bisan pa sa makahasol nga mga pulong sa pagduha-duha o kapakyasan nga tingali atong madunggan, makapili kita sa pagtan-aw sa unahan ug mohunong sa pagsaway sa atong mga kaugalingon tungod sa nangagi.
“Adunay usa ka butang nga malaumon kaayo sa pagsugod og bag-o,” mitudlo si Presidente Dieter F. Uchtdorf, Ikaduhang Magtatambag sa Unang kapangulohan.3
Sa paghukom nga mohimo og bag-ong sinugdanan, ayaw kalimot sa pag-ampo ngadto sa Dios alang sa tabang. Sultihi Siya nga gusto nimo nga molampus ug dayon hatagi og pagtagad ang mga pagdasig ug paggiya gikan sa Espiritu Santo ug gikan sa inyong mga lider.
Kini tingali nagkinahanglan og gamay nga paghan-ay sa mga prayoridad. “Ang atong inadlaw nga buhat ug pagpili ihaum gayud sa atong mga tumong,” miingon si Elder Quentin L. Cook sa Korum sa Napulog Duha ka mga Apostoles. “Daghang pagpili dili dautan, apan kon mohurot kini sa atong panahon ug magpugong sa labing maayong pagpili, makadaot kini.”4
Pagdiskobre nga Mahimo Ka nga Mausab
Atong i-abante og tulo ug tunga ka tuig gikan sa seremonyas sa akong gradwasyon sa high school. Nakatrabaho ko og mga usa ka tuig ug tunga, miserbisyo og duha ka tuig nga misyon, ug human sa tanan mihukom sa katapusan nga mosulay sa kolehiyo.
Unta makaingon ko nga akong gibati nga hamtung na ug andam na alang sa eskwelahan, apan kataw-anan kana. Gibati nako nga mas nahadlok kay sa una. Kon dili ko maayo sa high school, unsaon na man lang kaha nako sa kolehiyo? Niining panahona nakahukom ko sa paghimo sa akong pinakamaayo ug ilakip ang Dios sa akong pag-eskwela. Nag-ampo ko og maayo aron makapalambo og bag-o ug mas maayong mga kahanas sa pagtuon.
Sa akong hingpit nga katingala, maayo kaayo ang akong nabuhat niana nga semester nga mikwalipay ko alang sa mga scholarship nga akademik. Walay tawo nga mas nasurprisa kay kanako! Bisan pa niana, sayon nakong mahinumduman ang miaging mga bulan ug makita ang impluwensya sa Dios nga nagtabang kanako samtang nagkat-on ko nga mahimong usa ka maayo nga estudyante.
Unsay akong gituohan kabahin sa akong kaugalingon niadtong high school pa dili gayud tinuod. Gikan niana nga punto ug uban sa tabang sa Dios, nakamugna ko og usa ka bag-ong dalan nga midala kanako hangtud sa paggradwar sa kolehiyo ug lapas pa.
Kon atong iapil ang Ginoo sa unsay atong buhaton sa kinabuhi ug mohukom sa paghimo og usa ka bag-ong sinugdanan sa bisan unsa nga bahin sa kinabuhi, kita magmalampuson labaw pa sa unsay atong gituohan nga posible.