Ang Ginoo Nagkinahanglan Kaninyo Karon!
Ni Elder M. Russell Ballard
Sa Korum sa Napulog Duha ka mga Apostoles
Gikan sa usa ka CES devotional alang sa mga young adult, “Humilom Kamo, ug Ilhon Ninyo nga Ako Mao ang Dios,” gipakigpulong didto sa California, USA, niadtong Mayo 4, 2014.
Isip Apostol ni Ginoong Jesukristo, nagdapit ako kaninyo sa “pagsul-ob sa tibuok hinagiban sa Dios” ug apil sa gubat karon.
Ang kalibutan nga atong gipuy-an karon kusog kaayong nagkalayo gikan sa mga pagtulun-an ni Kristo sa mga balaod niini ug sa mga paagi niini sa kinabuhi. Agig resulta, si Satanas naningkamot og maayo sa paglibug sa mga anak sa Dios ug sa pagpahisalaag sa mga pinili gikan sa pagtuman sa ilang katungdanan ug sa pagdawat sa kahingpitan sa mga panalangin sa Ginoo.
Gusto ni Satanas nga mohunong kamo sa pagbansay og maayong mga kinaiya nga inyong nakat-unan sa panimalay, sa seminary ug sa institute, ug sa inyong misyon—sama sa paghimo og inadlaw nga pagtuon sa kasulatan, pag-ampo kada adlaw, takus nga moambit sa sakrament kada semana, ug sa paghatag og tinuoray, kinasingkasing nga serbisyo. Gusto usab niya nga molikay kamo karon sa pag-apil sa importante ug malisud nga mga pakigbisog.
Timan-i, kita nakiggubat—apan dili gubat sa mga pusil ug mga bala. Bisan pa niana, ang gubat tinuod, uban sa dili maihap nga nabiktimang mga tawo. Ang gubat sa pagkatinuod sumpay sa gubat nga nasugdan sa kalibutan sa wala pa dinhi sa yuta.
Gidapit kita ni Pablo sa “pagsul-ob sa tibuok hinagiban sa Dios.” Siya miingon, “Kay ang atong pakigdumog dili batok sa mga binuhat nga unod ug dugo, kondili batok sa mga punoan, batok sa mga kagamhanan, batok sa mga labawng agalon niining mangitngit nga kalibutan karon, batok sa mga dautan nga espirituhanong panon diha sa mga dapit sa kalangitan.” (Mga Taga-Efeso 6:11–12).
Detalye gikan sa Duha ka Libo nga Batan-ong mga Lalaki Nakiggubat, ni Arnold Friberg
Isip Apostol ni Ginoong Jesukristo, nagdapit ako kaninyo sa “pagsul-ob sa tibuok hinagiban sa Dios” ug apil sa gubat karon, sama sa gibuhat sa anak nga mga lalaki ni Helaman daghang tuig na nga milabay. Ayaw paghulat hangtud kamo maminyo o magsugod sa inyong tibuok kinabuhi nga trabaho o magkahamtong. Ang Simbahan nagkinahanglan sa atong kabatan-onan karon. Ang Ginoo nagkinahanglan kaninyo karon!
Inyong mahinumduman nga ang 2,000 ka libo nga batan-ong mga manggugubat “misulod ngadto sa usa ka pakigsaad sa pagpakig-away alang sa kalingkawasan sa mga Nephite” (Alma 53:17). Ang Simbahan nagkinahanglan og modernong batan-ong mga manggugubat nga mohimo og pakigsaad “nga mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9).
Ang batan-ong mga babaye ug mga lalaki mao ang modernong anak nga mga babaye ug lalaki ni Helaman. Hinaut nga kini masulti bahin kaninyo sama nga kini nasulti bahin kanila. “Sila nahimo niini nga panahon … og usa ka dako nga panabang” (Alma 53:19).
Pagsumpo sa Pornograpiya
Kami nagkinahanglan nga kamo moapil kanamo sa pakigbatok sa pornograpiya. Kini grabeng kadaut nga nagkatap sa tibuok kalibutan.
Labaw sa 180 ka tuig ang milabay, ang Ginoo mipadayag sa Iyang balaod sa panglawas, lakip ang usa ka pasidaan kabahin sa paggamit sa tabako (tan-awa sa D&P 89). Daghang mga tawo ang naminaw sa pasidaan sa Ginoo, apan mas daghan pa ang wala. Walay usa nga nahibalo niana nga panahon o gani samtang ako sama sa inyong edad bahin sa dugay nga epekto sa pagpanabako. Karon, human sa mga dekada nga siyentipikanhong pagsiksik, nahibalo na kita karon sa epekto sa pagpanabako diha sa kanser sa baga ug sa ubang makuyaw nga mga sakit. Ang Pulong sa Kaalam sa Ginoo usa ka panalipod nga panalangin.
Sa samang mga paagi ang Ginoo sa atong panahon nagpasidaan kanato mahitungod sa epekto sa pornograpiya. Minilyon ka mga tawo matinud-anong nagsunod sa tambag sa Ginoo, samtang dili maihap ang wala mosunod. Dili kita kinahanglan nga maghulat, akong mga higala, og 180 ka tuig o gani 10 ka tuig aron madiskubre ang makalaglag nga mga epekto sa pornograpiya. Ang bag-ong siyentipikanhong pagsiksik nagpadayag nga ang pornograpiya makadaut sa mga young adult sa daghang mga paagi ug nagguba sa ilang mga kahigayunan nga usa ka adlaw niana makabaton og mahigugmaon ug mahangturong relasyon sa kaminyoon.
Ang pagsiksik nagpakita usab nga ang kanunay nga pagtan-aw sa pornograpiya mosangput ngadto sa dili kapugngan nga mga kinaiya ug makausab sa dagan sa utok nga mabilanggo sa pagkaadik ang usa ka tawo. Ang pagsiksik nakatino usab nga ang pornograpiya nag-awhag og dili resonable nga mga paglaum ug naghatag ug makuyaw nga sayop nga pagtudlo mahitungod sa tawhanong panghilawas.
Ang labing makadaut, ang pornograpiya nagkondisyon kaninyo sa pagtan-aw sa mga tawo ingon og mga butang nga mahimo ra ninyong ibaliwala ug dili tahuron sa emosyonal ug pisikal nga paagi.
Lain nga aspeto sa pornograpiya mao nga kana sa kinatibuk-an usa ka sekreto nga kalihokan. Ang mga tiggamit kasagaran nagtago sa ilang paggamit o sa labing minus pakubsan ang ilang paggamit gikan sa tanan, lakip sa ilang romantikong mga paris ug mga kapikas. Nakaplagan pinaagi sa pagtuon nga kon ang mga tawo mohimo niini nga matang sa pagtago sa kaugalingon—kon sila mobuhat og mga butang nga sila dili mapasigarbuhon ug ipabilin kadtong mga butanga nga sekreto gikan sa sakop sa ilang mga pamilya ug mga higala—dili lamang kini nagdaut sa ilang mga relasyon ug nagpabilin kanila nga nag-inusara, apan naghimo usab kanila nga mas madutlan sa depresyon, kabalaka ug ubos ang pagtan-aw sa kaugalingon. Ang pagtago og mga sekreto moguba sa pagsalig.
Sa sinugdan, kita kinahanglan sa atong kaugalingon nga molikay gayud sa pornograpiya tungod kay kini makadaut. Kini nagtapos sa tinuod, malumo nga tawhanong mga relasyon—nagguba sa mga kaminyoon ug mga pamilya. Kini nagguba sa espiritu sa tawo kinsa naglamoy niini sama ka tinuod nga ang labing kuyaw nga hilo nagpatay sa lawas ug sa hunahuna.
Ayaw pailad. Ayaw paghunahuna nga kon kamo magmisyon o magminyo makahunong kamo niining makaadik nga kinaiya. Kon kamo naghimo niini karon, kon kamo nalaang niini nga buhat, pangayo og espiritwal nga tabang karon. Kamo makabuntog sa pornograpiya uban sa tabang sa Manluluwas. Ayaw paghulat!. Mohangyo ko kaninyo nga biyai kini! Adunay daghang kapanguhaan diha sa LDS.org nga makatabang kaninyo nga mabuntog sa mga kadaut sa pornograpiya.
Mahagiton kini nga mga panahon—apan dili sama ka mahagiton sa mga panahon ni Helaman ug sa iyang batan-ong mga manggugubat sa dihang sila mibarug sa pagpanalipod sa ilang mga pamilya ug sa Simbahan. Kini ang inyong panahon sa pagpakita ug pagkuyog sa pundok sa ubang mga matarung ug matinud-anong kabatan-onan sa pakig-away sa gubat batok sa pornograpiya.
Ang Doktrina sa Kaminyoon
Gusto nako nga inyong masabtan ang baruganan sa Simbahan kabahin sa kaminyoon sama sa gihatag sa Langitnong Amahan kanato pinaagi sa kasulatan ug sa “Ang Pamilya: Usa ka Pamahayag ngadto sa Kalibutan.” Kana nga dinasig nga dokumento nagpahayag: “Ang pamilya gi-orden sa Dios. Ang kaminyoon tali sa lalaki ug babaye mahinungdanon ngadto sa Iyang walay katapusan nga plano. Ang mga anak adunay katungod nga matawo ngadto sa mga ginikanan kinsa naminyo, ug maamumahan sa usa ka amahan ug sa usa ka inahan nga nagtahud sa mga panaad sa kaminyoon uban sa hingpit nga pagkamatinuoron.”1
Ang mga Apostoles gisugo nga mahimong magbalantay diha sa tore, aron makita “ang kaaway samtang siya layo pa” (D&P 101:54), ug sa pagtudlo sa doktrina ni Kristo. Tanan kamo nahibalo nga ang karaan nga pagsabut sa kaminyoon giatake karon. Adunay gusto nga maghisgut niini sumala sa sibikong mga katungod. Ang Unang Kapangulohan ug ang Korum sa Napulog Duha ka mga Apostoles mipasabut sa baruganan ug doktrina sa Simbahan kalabut sa katuyoan ug plano sa Dios alang sa Iyang espiritung mga anak sa pagsinati og mortal nga kinabuhi, nga gikinahanglan sa atong walay katapusan ug mahangturon nga kinabuhi.
Ako mokutlo niining pahayag nga gihatag para sa mga lider sa Simbahan niadtong 2014 ug mohangyo kaninyo nga maminaw og maayo:
“Ang mga kausaban sa sibil nga balaod dili, sa pagkatinuod dili, makausab sa moral nga balaod nga gitukod sa Dios. Ang Dios naglaum kanato nga mosuporta ug mosunod sa Iyang mga sugo bisan pa man sa managlahing mga opinyon ug mga uso sa katilingban. Ang Iyang balaod sa kaputli klaro: ang sekswal nga relasyon tukma lamang tali sa lalaki ug babaye kinsa legal nga naminyo isip bana ug asawa. Nag-aghat kami kaninyo sa pagribyu ug pagtudlo sa mga miyembro sa Simbahan sa doktrina nga anaa sa ‘Ang Pamilya: Usa ka Pamahayag ngadto sa Kalibutan.’”
Ang pahayag nagpadayon:
“Sama niadtong nag-awhag og sama nga sekso nga kaminyoon nga may katungod nga tahuron, mao usab niadtong mosupak niini. …
“Isip mga miyembro sa Simbahan, responsibilidad nato ang pagtudlo sa ebanghelyo ni Kristo ug sa pagsangyaw sa dagkong mga panalangin nga nagagikan sa pagsunod sa mga sugo sa Dios ingon man sa dili kalikayan nga mga sangputanan sa pagbaliwala niini. Gidapit namo kamo sa pag-ampo nga ang mga tawo bisan asa mopahumok sa ilang mga kasingkasing ngadto sa mga kamatuoran sa ebanghelyo, ug nga ang kaalam ihatag ngadto niadtong gitawag diha sa paghukom sa mga isyu nga importante sa kaugmaon sa katilingban.”2
Nahibalo ako nga naghigugma ug nagsuporta kamo sa Ginoo ug nagpaluyo sa Iyang mga propeta, apan nasayud usab ako nga pipila kaninyo tingali naglibug sa daghang mga kahulugan sa desisyon sa Simbahan sa pagpaluyo sa gipadayag nga plano sa Dios alang sa Iyang mga anak.
Nahibalo usab ko nga pipila sa atong mga kabatan-onan naningkamot sa pagsabut kon unsaon pagpasabut ang doktrina mahitungod sa pamilya ug kaminyoon ug sa gihapon magpabilin nga mabination, malumo, ug mahigugmaon ngadto niadtong kinsa dili mouyon. Tingali nahadlok kamo nga hinganlan nga pig-ot og pangisip ug dili mosabut sa uban.
Tingali nakaila mo og tawo kinsa nanlimbasug batok sa samang sekso nga kaibug o nakahimo og desisyon sa pakigpuyo sa sama og sekso. Ang inyong gugma niana nga tawo isip anak nga lalaki o babaye sa Dios makamugna og panlimbasug samtang kamo maninguha sa paghigugma ug pagsuporta kaniya ug sa gihapon mobarug alang sa plano sa Ginoo sa mahangturong kalipay.
Atong klarohon: Ang Simbahan ni Jesukristo sa mga Santos sa Ulahing mga Adlaw nagtuo nga “ang kasinatian sa samang sekso nga kaibug usa ka lisud nga kamatuoran alang sa daghang mga tawo. Ang kaibug mismo dili sala, apan ang paglihok sumala niana nga kaibug usa ka sala. Bisan tuod og ang mga indibidwal wala magpili sa pagbaton niana nga kaibug, sila makapili unsaon pagresponde niana nga kaibug. Uban sa gugma ug pagsabut, ang Simbahan nagkab-ut ngadto sa tanang mga anak sa Dios, lakip [niadtong adunay kaibug sa samang sekso].”3
Ang Simbahan wala magtudlo o magpasiugda sa pagsalikway og tawo o ubang dili kristiyanong mga lihok. Kinahanglan gayud nga atong higugmaon ug maningkamot sa pagtabang sa uban sa pagsabut nga walay usa nga mobaliwala o dili magtagad sa mga sugo sa Dios.
Usa ka Saksi ug usa ka Pasidaan
Diha sa “Ang Pamilya: Usa ka Pamahayag ngadto sa Kalibutan,” ang Unang Kapangulohan ug ang Korum sa Napulog Duha ka mga Apostoles namahayag: “Kami mopahimangno nga ang tagsa-tagsa kinsa makalapas sa mga pakigsaad sa kaputli, kinsa moabuso sa ilang kapikas o mga anak, o kinsa mapakyas sa pagtuman sa mga kapangakohan sa pamilya moabut ang adlaw nga mobarug nga adunay tulubagon atubangan sa Dios. Dugang pa, kami mopahimangno nga ang pagkabungkag sa pamilya makadala sa tagsa-tagsa, mga komunidad, ug sa mga nasud sa katalagman nga gipanagna sa karaan ug sa bag-o nga mga propeta.”4
Ako miapil niini nga pasidaan. Isip usa sa mga magbalantay diha sa tore, ako responsable nga “huypon ang trumpeta, ug pasidan-an ang katawhan” (tan-awa sa Ezequiel 33:1–9). Gibuhat ko kini tungod kay gihigugma ko kamo ug buot kaninyo nga makasabut nga kinahanglan gayud nga atubangon nato ang Ginoo, ug sundon ang Iyang mga sugo. Kana mao ang akong katungdanan.
Detalye gikan sa Si Adan ug Eva Naghalad og mga Sakripisyo, ni D. Keith Larson
Ang pasidaan sa Ginoo giapilan usab sa pagdapit sa pagduol Kaniya. Ang atong Amahan sa Langit nasayud sa mga sangputanan sa pagpuyo sa napukan nga kalibutan ug, busa, naghatag og Manluluwas, “sa wala pa ang pagkatukod sa kalibutan” alang sa Iyang mga anak (Pinadayag 13:8).
Diha sa ebanghelyo ni Juan, atong makat-unan, “Kay gihigugma gayud sa Dios ang kalibutan nga tungod niana gihatag niya ang iyang bugtong Anak, aron ang tanan nga mosalig kaniya dili malaglag, kondili may kinabuhing dayon” (Juan 3:16).
Palihug hinumdumi nga ang ebanghelyo mao ang “maayong balita.”5 Kini usa ka mensahe sa paglaum. Kon kamo anaa sa kagubot karon, pangayo og tabang. Ang Ginoo maloloy-on ug mapasayloon.
Gitudlo ni Apostol Pablo:
“Kinsa ba ang makapahimulag kanato gikan sa gugma ni Kristo? Ang pag-antus ba o ang kasakitan, o ang paglutos, o ang kagutom, o ang kahubo, o ang katalagman, o ang espada ba? …
“Dili, hinonoa niining tanang mga butanga labaw pa kita ka mananaog pinaagi kaniya nga nahigugma kanato.
“Kay masaligon ako nga walay kamatayon o kinabuhi, o mga manulonda, o mga punoan, o mga butang karon, o butang nga umalabut, o mga gahum,
“O kahabugon, o giladmon, o bisan unsa diha sa tibuok kabuhatan, nga arang makapahimulag kanato gikan sa gugma sa Dios, sa gugma nga anaa kang Kristo Jesus nga atong Ginoo” (Mga Taga-Roma 8:35, 37–39).
Tungod ni Jesukristo, ang kalinaw makapuli sa sala. Ang maayo nga mga relasyon mapahiuli. Ang mga adiksyon mabuntog.
Kinahanglan nga ang atong pamilya ug atong mga higala makahibalo niini nga kamatuoran: ang Dios gugma, “ug siya nagdapit [kanatong] tanan sa pagduol ngadto kaniya ug sa pag-ambit sa iyang kaayo; ug siya wala maglimud kang bisan kinsa nga moduol ngadto kaniya” (2 Nephi 26:33).
Nagkinahanglan kami kaninyo nga moapil sa buhat sa kaluwasan sa wala pa, atol sa, ug human sa inyong mga misyon.
Ang Paggamit sa Teknolohiya sa Pagpanalangin og mga Kinabuhi
Ang Ginoo nagdapit kaninyo nga moapil ug mogamit sa bisan unsa nga online nga social media nga inyong gusto sa pagpakigbahin sa ebanghelyo ug mobarug isip modernong anak nga mga lalaki ug mga babaye ni Helaman diha sa dakong gubat sa katapusang mga adlaw. Siya gusto kaninyo nga mahimong modernong batan-ong mga manggugubat kinsa mobarug nga maisug ug magkahiusa sa pagpanalipod sa kamatuoran. Siya gusto kaninyo nga isug ug kusgan atubangan sa mga pagdasdas sa kaaway. Kita nahibalo nga sa katapusan ang Ginoo modaug ug si Satanas mapildi.
Karon, kamo adunay oportunidad sa paggamit sa niining social media uban sa kaalam. Hinumdumi nga adunay angay nga panahon ug dapit alang kaninyo sa paggamit sa social media, ug ang pagpakigbahin sa inyong mga hunahuna ug pagpamatuod sa mga butang nga inyong nakat-unan ug nabati mao ang usa niini nga panahon. Pinaagi sa nagkalain-laing online nga social media, makahimo kamo og panaghisgutay kabahin sa ebanghelyo uban sa pamilya, mga higala, ug, alang kaninyo nga mga returned missionary, bisan sa mga investigator kaniadto ug sa bag-ong mga miyembro. Kamo makabarug isip mga saksi sa kamatuoran ug makapanalipod sa gingharian.
Pagpanalipod sa Gingharian
Nasayud ko nga pipila kaninyo nabalaka nga kamo masaypan sa paghusga, bugal-bugalan, ug gani hadlukon kon kamo mobarug alang sa Langitnong Amahan, ni Ginoong Jesukristo ug sa Simbahan. Akong nasabtan ang inyong mga kabalaka.
Miserbisyo ako sa British Mission human matapos ang Ikaduhang Gubat sa Kalibutan isip usa ka batan-ong misyonaryo. Niana nga panahon ang mga Mormon “usa ka yubit ug usa ka pagya.” (3 Nephi 16:9), ug ang mga misyonaryo gikataw-an ug gibiay-biay. Gani ang mga tawo molabay og mga butang namo, ug luwaan kami sa pipila. Bisan pa niana, wala kami moatras, apan kami mipadayon sa pagpamatuod ug sa pagpakigbahin sa ebanghelyo. Sama ni Abinadi, wala kami mouk-ok; sama ni Pablo, wala kami mouk-ok; ug sama sa Manluluwas, wala kami mouk-ok. Niana nga panahon dili namo mahanduraw ang epekto sa among mga paghago. Kami adunay 14 ka district ug walay mga stake. Karon, 46 ka mga stake sa Zion anaa sa British Isles.
Ang Damgo ni Lehi, ni Greg K. Olsen
Akong mga pinalangga hinigugmang mga batan-on, ayaw kabalaka mahitungod niadtong anaa sa dako ug lapad nga gambalay. Nakita ni Nephi nga sila mobiaybiay ug motulisok sa ilang mga “tudlo paingon ngadto kanila kinsa miabut ug mikaon sa bunga.” Ayaw sunda kadtong kinsa “human sila makatilaw sa bunga sila nangaulaw, tungod niadto nga nagbugal-bugal kanila; ug sila nangahulog ngadto sa gidili nga mga dalan ug nangawala” (1 Nephi 8:27, 28).
Kamo mahinungdanon ug importanting henerasyon, ug kini usa ka importanting panahon nga mabuhi! Ang kaugmaon hayag. Ingna ang inyong mga kaugalingon, “Ako nagtabang sa Ginoo samtang ako nagkab-ot sa pagpakigbahin sa akong pagpamatuod ug sa pagtudlo sa mga kamatuoran nga gipadayag sa Dios niining mga panahona.”
Unta ang Ginoo mopanalangin kaninyonga mahimong mas maalamon kay sa sagad sa inyong edad, nga kamo makaamgo nga kita anaa niining gubat ug kita magkahiusang mobarug, batan-on ug tigulang. Unta dili ninyo kalimtan, sa inyong panaw, nga kamo bililhon sa umaabut nga pagpangandam sa kalibutan alang nianang adlaw nga si Jesukristo moingon “Igo na” ug mobalik aron modumala ug maghari isip Manluluwas, ang Ginoo sa mga ginoo, ang Hari sa mga hari, ang Manunubos sa kalibutan, kinsa ako mopamatuod nga buhi.