Ang Puzzle sa Pamilya ni Lindsay
“Duna koy surprisa kaninyo,” miingon si Papa nga nagpahiyom.
“Makapangita ta’s atong minahal, ipatunhay ang ilang mga ngalan” (“Kamatuoran gikan ni Elias,” (Liahona, Okt. 2001 Ang Higala, 10).
Mikanaog dayon si Lindsay sa dihang nakadungog siya ni Papa nga nagtawag sa iyang ngalan.
Karong bag-o nagdungan sila sa paghimo og daghang mga buhat sa family history. Si papa motabang niya sa paglog-on sa FamilySearch website, ug dungan silang mangita sa mga hulagway sa pamilya ug mga istorya. Niadto lang miaging adlaw iyang nakita ang usa ka karaang gayud nga dokumento mahitungod ni Lolo sa iyang misyon!
Nakakanaog na si Lindsay sa ubos diin maghulat si Papa. “Mag-family history ba kita karong gabhiona?” nangutana siya.
“Oo, ug duna koy surprisa kanimo,” miingon si Papa nga nagpahiyom. Iyang gitunol ang taas, linukot nga papel nga iyang gitagoan sa iyang luyo. Gihikyad kini ni Lindsay. Iyang gitutukan ang dakong porma sa paypay diha sa pahina. Didto ang iyang ngalan sa ubos! Daghan pang laing mga pangalan nagkatag sa hapsay nga linya libut sa iyang ngalan.
“Ikaw kana ug si Mama,” miingon si Lindsay, nagtudlo ngadto sa mga ngalan nga duol kaayo sa iyaha. “Ug si Lola ug Lolo!”
“Sakto kana,” miingon si Papa. “Kining tsart sa paypay nagpakita sa mga ngalan sa imong mga katigulangan sulod sa siyam ka henerasyon.”
Dihay daghan nga mga ngalan. Apan ang pipila walay nasulat. Naghunahuna si Lindsay mahitungod sa nawala nga mga ngalan. “Mora og mga puzzle nga akong gibuhat uban ni Lolo,” miingon siya. Si Lolo namatay pipila ka tuig na ang milabay, ug si Lindsay gimingaw gyud niya.
Mitando si papa. “Kini maoy sama sa usa ka puzzle. Usa ka importante kaayo nga puzzle. Ug ang matag sakop sa pamilya sama sa usa ka piraso sa puzzle.”
Si Lindsay hapit makakatawa kon siya maghunahuna nga si Lola maporma sama sa usa ka piraso nga puzzle.
“Kon makakita ta’g mga ngalan sa usa ka tawo ug mobuhat sa buluhaton sa templo alang nila, gisumpay nato sila ngadto sa tibuok pamilya—sama sa pagsumpay sa piraso sa puzzle. Ikaw nagtabang sa paghimo niini nga puzzle.”
“Wow.” Gisubay ni Lindsay sa iyang mga tudlo ang mga ngalan. Siya nasayud nga ang family history importante, apan karon siya mas naghinam-hinam sa pagtabang. Tanan sa iyang pamilya mahimo nga masumpay hangtud sa kahangturan!
Gipapilit ni Lindsay ang iyang bag-ong tsart ngadto sa kisame ibabaw sa iyang higdaanan. Ganahan siyang motan-aw sa tsart ug magtuon sa tanang mga ngalan. Naghunahuna siya nga ang tanan naggunitay sa kamot sa usag usa, nasumpay sama sa mga piraso sa puzzle. Mibati siyag kalipay. Kini mao ang pinakadako nga puzzle nga sukad iyang nakita!
Usa ka gabii si Lindsay dili makatulog. Ang iyang kwarto ngitngit kaayo. Ang hinay nga panggabii nga suga nakahimo og mga anino sa bong-bong nga makahadlok. Gibira niya ang iyang habol aron matabunan ang iyang ulo ug gipiyong og maayo ang iyang mga mata.
Pagkataud-taod samtang milili siya ug nakita ang tsart. Gibasa niya ang iyang ngalan. Dayon gibasa niya ang ngalan ni Mama ug Papa. Sa dihang miabut siya sa ngalan ni Lolo, gibati niya ang kainit ug kalinaw.
Nahinumdom siya sa pahiyom sa Lolo kaniya sa dihang ilang giporma ang mga puzzle. “Kon motabang ko ni Papa sa pagbuhat sa family history,” siya naghunahuna, “Akong gisumpay ang among pamilya!” Naghanduraw siya nga mas midako ang pahiyom ni Lolo kabahin niana. Wala na niya batia ang kahadlok. Mipahiyom siya ug mibukot sa iyang habol ug nakatulog nagdamgo sa mga tawo ug mga puzzle ug nagkonektar sa iyang pamilya.