Mensahe sa Visiting Teaching
Balaanong Kinaiya ni Jesukristo: Puno sa Gahum ug Himaya
Tun-i sa mainampuong paagi kini nga materyal ug tinguhaa nga masayud unsay angay nga ipakigbahin. Sa unsang paagi nga ang pagsabut sa balaanong mga kinaiya sa Manluluwas makapalambo sa inyong pagtuo diha Kaniya ug mopanalangin niadtong inyong giamuma pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Detalye gikan sa Si Jesus Mipabangon ni Lazarus gikan sa Pagkamatay, ni Carl Heinrich Bloch
Ang mga kasulatan nagtudlo kanato nga Si Jesukristo “nakadawat sa tanan nga gahum, diha sa langit ug diha sa yuta; ug ang himaya sa Amahan nag-uban kaniya” (D&P 93:17). Si Elder M. Russell Ballard sa Korum sa Napulog Duha ka mga Apostoles miingon nga pinaagi niini nga gahum ang atong Manluluwas milalang sa langit ug yuta, mihimo og mga milagro, ug nakalahutay sa kasakit sa Getsemani ug Kalbaryo.1 Samtang kita moabut sa pagkasabut niini, ang atong pagtuo kang Kristo molambo, ug kita mas molig-on.
Samtang kita mohimo ug motuman sa mga pakigsaad sa templo, ang Ginoo mopanalangin kanato uban sa Iyang gahum. Si Linda K. Burton, kinatibuk-ang presidente sa Relief Society, miingon: “Ang pagtuman sa pakigsaad makalig-on, makahatag og gahum, ug makapanalipod. … Bag-ohay lang nakong nahimamat ang usa ka bag-ong higala. Mipamatuod siya nga human sa iyang pagdawat sa iyang endowment sa templo, gibati niya nga gilig-on sa gahum sa pagbuntog sa mga tintasyon.”2
Si Nephi mipamatuod sa gahum sa pakigsaad: “Ako, si Nephi, nakakita sa gahum sa Kordero sa Dios, nga kini mikunsad … diha sa mga katawhan sa pakigsaad sa Ginoo, … ug sila gisangkapan sa katarung ug uban sa gahum sa Dios sa dako nga himaya” (1 Nephi 14:14).
Dugang nga mga Kasulatan
Gikan sa mga Kasulatan
Kay napuno sa dakong kalooy alang kang Marta ug Maria, gipabangon ni Jesukristo si Lazaro gikan sa pagkamatay pinaagi sa gahum sa Dios nga anaa Kaniya.
Si Jesus miabut sa balay ni Marta ug ni Maria human si Lazaro gilubong na sulod sa upat ka adlaw. Nangadto sila sa lubnganan ni Lazaro, ug si Jesus misugo nga kuhaon ang bato nga giali sa ganghaan. Si Jesus miingon kang Marta, “Wala ba ako mag-ingon kanimo nga kon motuo ikaw makita mo ang himaya sa Dios?” Siya dayon nag-ampo sa Dios nga Amahan ug “misinggit sa makusog nga tingog nga nag-ingon, Lazaro, gula ngari.
“Ug ang namatay migula, ang iyang mga kamot ug mga tiil binugkosan ug mga bendahi.” (Tan-awa sa Juan 11:1–45.) Ang Manluluwas migamit sa Iyang gahum sa pagtubos ug sa paghatag kanato og gahum. Ang atong hugot nga pagtuo Kaniya motubo kon kita mahinumdom nga Siya puno sa gahum ug himaya.