Wala gayud Mag-inusara sa Sierra Leone
Bisan pa sa sakit, gilain sa uban, ug sa langay nga sangputanan sa gubat, ang mga Santos sa ulahing mga adlaw dinhi niining nasud sa Africa nasayud nga ang Langitnong Amahan nahinumdom kanila.
Mga litrato sa maayong kabubut-on sa Norman C. Hill UG SA MARIATU BROWNE, GAWAS KON GIPAHIBALO; BANDILA PINAAGI NI RONNIE CHUA/ISTOCK/THINKSTOCK;YELLOW NGA BANNER PINAAGI NI WELDEN C. ANDERSEN
Unsaon kaha sa pagsugakod sa Simbahan kon ang inyong nasud, nagpaayo pa gihapon gikan sa gubat nga sibil, gitakbuyan sa makamatay nga kagaw [virus] ug dayon gilahi gikan sa ubang mga nasud tungod niana nga sakit? Unsay inyong buhaton kon gikuhaan kamo og mga misyonaryo dili lang sa makausa apan sa makadaghan, walay labut sa lokal nga mga misyonaryo?
Kon kamo nagpuyo sa nasud sa West Africa sa Sierra Leone, kamo mosalig gayud sa Ginoo ug makabantay sa Simbahan nga molambo lang gihapon. Inyong makita ang lokal mga lider nga nagpalambo sa ilang mga calling. Inyong makita ang mga miyembro nga nagpalig-on sa usag usa, ang misyonaryo nga buhat nagpadayon, ug ang kahadlok gibuntog sa hugot nga pagtuo.
Makanunayon nga Paglambo
Bisan pa sa gubat nga sibil sukad niadtong 1991 hangtud 2002, nakita ang makanunayong paglambo sa mga miyembro sa Sierra Leone. Ang Full-time nga mga misyonaryo unang miabut sa sub-Saharan nga nasud niadtong Mayo 1988. Duha ka tuig ang milabay namugna ang usa ka district. Sa nagkadaiyang panahon sa mga 1990, ang mga misyonaryo gipangkuha tungod sa gubat, apan ang lokal nga mga miyembro padayon nga mipalambo ug mipatubo sa Simbahan. Niadtong 2007 ang Sierra Leone Freetown Mission, nga naglakip sa Liberia, namugna. Dayon niadtong Disyembre 2012, si Elder Jeffrey R. Holland sa Korum sa napulog duha Ka mga apostoles miorganisar sa usa ka stake sa kapital nga siyudad sa Sierra Leone, Freetown. Mao kadto ang ika-3000 nga stake sa Simbahan.
Nakigbatok sa Ebola
Dayon miabut ang Ebola. Ang pagkatap sa hemorrhagic nga hilanat tungod sa mga kagaw nga naggikan sa Guinea niadtong Marso 2014. Kini misulod sa Sierra Leone sa Mayo ug paspas kaayong misabwag. Ang full-time nga mga misyonaryo gipang-reassign, ug ang presidente sa misyon sa Ghana gihangyo usab sa pagserbisyo isip presidente sa misyon sa Sierra Leone—samtang nagpabilin sa Accra.
“Sa dihang nawala na ang mga misyonaryo, kami nabalaka nga mapasagdan sa pagpangita sa among kaugalingong dalan,” miingon ang presidente sa Kenema District nga si Jonathan Cobinah. “Hinoon, niana gihapong semanaha nakadawat mi og sulat gikan sa Africa West Area Presidency misiguro kanamo nga dili ingon niana ang mahitabo.” Sukad nianang panahona, Ang 13,000 ka mga miyembro sa Sierra Leone nakadawat og suporta sa area, ug isip internasyonal nga organisasyon nangandam na aron sa pagpanghatag og kahupayan, ang Church Welfare Services ug ang emergency response nakigtambayayong uban sa mga implementing partner sa nagkalainlaing internasyonal nga mga organisasyon aron matubag ang panginahanglan sa komunidad. (Tan-awa sa sidebar.)
“Sulod sa pipila ka adlaw, kami adunay usa ka videoconference uban sa bag-ong gi-assign nga mga mission president,” miingon si Presidente Cobinah. “Siya misulti namo nga ang mga miting sa Simbahan ug mga kalihokan nagkinahanglan og pagmatngon aron malikayan ang pagtakboy sa sakit, apan kon dili man gani kami magpadayon lang gihapon sama sa among naandan kaniadto.”
Aron mapugngan ang padayon nga pagsabwag sa sakit, niadtong Septyembre 2014 ang presidente sa Sierra Leone mipahibalo sa tibuok nasud nga lockdown nga sugdan sulod sa pipila ka adlaw. Atol sa lockdown, ang tanang mga lumulupyo gikinahanglan nga magpabilin sa sulod sa panimalay. Ang kadaghanan kinahanglan nga maningkamot ra sa bisan unsang pagkaon nga anaa nila diha sa ilang mga panimalay.
Untop gayud sa Panahon
Swerte lang, mga semana lang sa wala mapahibalo ang pag-lockdown, ang Africa West Area nagsugod sa pakig-alayon uban sa punoang buhatan sa Simbahan nga tugutan ang pagpanghatud sa mga suplay nga panglimpyo alang sa tanang 7,800 ka pamilya sa mga Santos sa Ulahing mga Adlaw didto sa Sierra Leone ug sa paghatag og 110 ka libras (50 kg) nga sakong bugas ug pipila ka litro nga mantika ngadto sa kapin sa 2,500 ka mga pamilya sa LDS basi sa panginahanglan. Wala mahibalo sa nagsingabut nga lockdown, ang lokal nga mga lider nagdali gihapon sa paghatud niining mga supply ngadto sa Simbahan.
“Lisud nga ipasabut ang kadinalian nga among nabati niadtong panahona,” nahinumdom si Sahr Doe, usa ka espesyal nga assistant sa presidente sa misyon. “Sa hinapos sa semana dihang naaprubahan na ang pag-apud-apud sa mga suplay, among nahibaloan nga may usa ka patikular nga dapit nga lagmit kinahanglang i-quarantine. Makapalisud kini sa paghatud sa mga supply, busa nagtrabaho mi adlaw ug gabii sa pagkarga ngadto sa trak ug ipahatud na kini ngadto sa mga branch sa tibuok nasud. Sa usa ka siyudad, ang mga suplay miabut mga oras lang sa wala pa idili ang pag-agi. Sa tibuok nasud, among nahatud ang mga suplay sa wala pa ang lockdown. Usa kini ka panalangin kanatong tanan ug usa ka modernong milagro.”
Ang pagkatap sa Ebola miresulta usab sa halapad nga kawalay trabaho. “Hapit na ko mawad-i sa paglaum,” miingon si Sister Sai Kamaia sa Allentown branch, inahan sa tulo ka mga bata kinsa nanginabuhi sa pagpamiligya og ginagmayng mga butang. “Ang tanan nakong kwarta nahurot na pagka Septyembre, bisan sa wala pa ang lockdown. Ang mga tawo mahadlok sa pag negosyo. Wala ko masayud unsay akong buhaton.” Sama sa uban, nakahilak siya sa kalipay sa dihang nadawat niya ang mga suplay gikan sa Simbahan.
“Isip usa ka biyuda ug pangulo sa among pamilya, nindot kaayo ang akong gibati nga ang Simbahan nakatabang kanamo,” miingon si Sister Mary Margay sa Kissy Second Branch. “Naglibug mi kon asa kaha mi mopuyo atol sa lockdown. Gibati namo ang sobrang kalipay nga magpabilin kami sa panimalay nga dunay makaon.”
Sama sa mga miyembro sa Simbahan sa bisan asang dapit, ang mga Santos sa Sierra Leone naningkamot nga mahimong mapaningkamuton sa kaugalingon. Apan dinhi niining wala damha nga mga panahon sa panginahanglan, ang mga suplay nangabut untop gayud sa panahon alang sa kadaghanan nga walay kapaingnan. “Kining tukma sa panahon sa panginlabut nagtugot sa mga Santos dinhi nga masayud nga sila wala gayud pasagding mag-inusara,” miingon Mariatu Browne, ang direktor sa public affairs sa nasud. Atol sa pag-quarantine, ang mga Santos sa Ulahing mga adlaw mipakigbahin usab sa ilang mga suplay ngadto sa ilang mga silingan, mipanalangin sa daghan niadtong adunay dyutay o wala.
Diha sa mga Kamot sa Ginoo
Walay swerte, ang paglikay sa kagutom dili lamang maoy bugtong nga kabalaka. Pipila ka mga Santos sa Ulahing mga Adlaw nataptan sa sakit. Si Simon Kamara sa Teko Road Branch, kinsa namiyembro sa Simbahan sulod pa lang sa usa ka tuig, nakakita sa iyang asawa ug anak nga lalaki nga namatay gumikan sa Ebola. Dayon siya usab natakdan.
“Ang akong kinabuhi anaa sa mga kamot sa Ginoo,” siya miingon samtang anaa sa sentro nga tambalanan. “Sama ni bisan kinsang amahan, gusto nako ang kinanindotan alang sa akong mga anak. Apan karon nga nakaplagan nako ang ebanghelyo ug nakasabut sa plano sa kaluwasan, nakabaton ko og dakong paglaum alang sa akong kaugalingon ug sa akong pamilya bisan unsa pay mahitabo.” Bisan og duna nay mga timailhan sa sugod nga pagkaayo, si Brother Kamara namatay. Ang iyang mga anak nga buhi gimingaw kaayo sa ilang mga ginikanan, bisan sila anaa karon sa pag-amuma sa mga miyembro ug mga higala ug maayo ra.
Usa ka Personal nga Milagro
Si sister Haju Julloh sa Waterloo Branch usa ka nurse. Sa pag-amuma sa masakiton, siya bantang sa matag adlaw nga mga kagaw. Samtang nagkadaghan ang pasyente, ang mga panagang nga sapot sa hospital nga iyang gitrabahoan usahay dili matarong sa paglaba ug paglimpyo. Sa wala madugay human siya nagpamiyembro sa Simbahan niadtong Agosto 2014, si Sister Julloh gihiling ug nagpositibo sa Ebola ug gi-quarantine sulod sa ilang panimalay.
“Dili ko makatambong sa Simbahan, mao nga ang mga miyembro sa branch manawag ug modasig kanako,” siya miingon. “Gibilanggo sa akong kwarto, mihukom ko nga mag-focus sa pagtuon sa Basahon ni Mormon. Akong nabasahan ang kabahin sa daghan nga mga espirituhanong kasinatian, lakip sa mga milagro nga nahitabo ngadto sa yanong mga tawo sama nako. Gusto ko og usa ka milagro apan wala ko kahibalo kon kinahanglan ba gayud nakong mangayo. Padayon kong nagbasa ug nakig-istorya sa mga higala pinaagi sa telepono mahitungod sa mga butang nga akong nabasahan. Human sa pipila ka semana sa panimalay, gihiling na usab ako ug ang resulta negatibo ko sa kagaw. Kinahanglan kong magpabilin nga i-quarantine sulod sa lain na usab nga semana ug hilingon na usab. Usab, ang mga resulta mga negatibo. Busa gitugutan ako nga mobiya sa akong balay ug moadto sa simbahan ingon man usab sa pagbalik sa trabaho. Usa kadto ka milagro alang kanako.”
Pagpadali sa Buluhaton
Atol sa makaluya nga mga panahon, gikinahanglan nga ang misyonaryo nga buhat magpadayon? Ang mga Santos sa Sierra Leone adunay usa ka tradisyon. Sila magpadayon sa pagpakigbahin sa ebanghelyo bisan unsaon pa.
“Kay sa magsigi og reklamo sa among mga kahimtang o magpabilin nga walay kalamboan, giawhag kami nga pundukon ang mga Santos pinaagi sa pagtawag og mga misyonaryo sa branch aron mohulip sa mga full-time nga mga misyonaryo,” pasabut ni President Bai Seasy sa Kossoh Town District. “Wala kitay panahon nga maguol-guol sa atong kaugalingon; kita adunay buhat alang sa kaluwasan nga buhatunon. Among giparis ang mga returned missionaries uban sa umaabut nga mga misyonaryo ug miorganisar kanila ngadto sa mga zone.”
“Ang matag branch mission leader gitugutan sa pagtinir og usa ka phone card alang sa proselyting nga katuyoan. Sila kinahanglang moreport sa gigamitan niini, apan kini nakatabang sa mga misyonaryo sa branch nga makakontak sa bag-ong mga investigator ug bag-ohay nga mga nakabig, ug ang padayon nga pagkinontakay nakahimo og dakong kalainan,” matud ni Brian Robbin-Taylor, laing espesyal nga assistant sa presidente sa misyon.
“Aduna kami mga ‘leksyon gamit ang telepono’ ngadto sa mga investigator ug bag-ong mga kinabig,” siya mipadayon. “Kana nakadugang sa sinemana nga leksyon nga gihimo sa mga misyonaryo nga gipahigayon sa simbahan. Among napahiangay ang mga panginahanglan sa mga miyembro ug mga investigator nga dili unta makontak, tungod sa restriksyon sa pag-quarantine o sa pagduhaduha basin og matakdan sa sakit.”
Karon ang mga bunyag sa kinabig didto sa Sierra Leone mius-os lang og gamay kay sa dihang ang full-time nga mga misyonaryo tua didto, daghang dili kaayo aktibo nga mga miyembro mibalik sa pagkaaktibo, ug nagpadayon ang paglambo sa Simbahan.
Dako nga Rason sa Paglaum
Atol sa pagtakboy, nilapas na sa 60 porsyento ang wala nay trabaho. Ang mga abut sa yuta dili na mahatud sa merkado tungod sa mga pagdili sa quarantine. Nangamatay ang mga minahal. Walay duda nga daghan pang mga hagit ang anaa sa unahan didto sa Sierra Leone.
Hinoon, bisan pa sa maong mga hagit, ang mga Santos nagmatinud-anon ug ang Simbahan nagmalamboon. Sigun sa gisulti ni Mariatu Browne, “Nasayud kami nga ang Langitnong Amahan mahunahunaon ngari kanamo. Ug kon ang Ginoo anaa uban kaninyo, ang Simbahan nagpaluyo kaninyo, ug kamo magtinabangay, adunay dako nga rason alang sa paglaum. Isip mga Santos sa Sierra Leone, kami wala gayud mag-inusara.”