Pagpugas sa Adlawng Dominggo
Desire Koami Gbedjangni, Togo, West Africa
Sa wala: paghulagway pinaagi ni Katie Payne; sa tuo: paghulagway pinaagi ni Allen Garns
Pipila ka tuig ang milabay, sa wala pa matapos ang semana sa Pasko sa Pagkabanhaw, miulan sa tibuok semana. Gikan ko sa Benin, West Africa, apan mopauli aron magpalabay sa Pasko sa Pagkabanhaw didto sa Togo. Wala mag-ulan nianang pagka-Sabado, adlaw sa akong pag-abut, apan nianang pagkagabii nag-ulan na usab.
Nasayud ko nga ang simbahan magsugod sa alas 9:00 sa buntag sa Dominggo, apan tungod sa kadako sa ulan ug mao pa lang gyud ang akong pag-abut, nakaingon ko nga sayo ra kaayo kini para nako.
Sa akong kaugalingon naghunahuna ko, “magpaulahi lang ko og gamay ug moabut ko didto alas 10:00 sa buntag.” Dayon milakaw ko nakigkita sa akong igsoong lalaki. “Imbis moadto sa simbahan sa alas 9:00,” giingnan nako siya, “moadto ta nianang luna sa yuta dapit sa kilid sa akong balay.”
Sa dihang miabut kami, among namatikdan nga ang yuta nindot ug basa gikan sa pag-ulan. Naghunahuna ko, “Dominggo ron, ug naghulat mi hangtud alas 10:00 aron moadto sa simbahan. Unsa kaha kon mananum una ta og beans sa dili pa ta manlakaw?”
Mao nga ako ug ang akong igsoong lalaki mitanom sa gamayng luna sa yuta nga mga 65 square feet (6 m2). Dayon nangadto mi sa simbahan, naulahi og usa ka oras. Pagkasunod adlaw miadto mi sa lungsod sa duol diin aduna koy laing luna sa yuta. Didto nananum kami og mais ug dugang pang beans.
Paglabay sa duha ka bulan sa dihang mipauli na usab ako, akong giadto aron susihon ang gamayng luna sa yuta sa kilid sa akong balay. Nabakante na kini gawas lang sa pat-ak pat-ak sa mga sagbot nga nakapandol nako samtang naglakaw ko sa uma. “Aw, mao na,” miingon ko sa kaugalingon, “nananum man mi dinhi beans sa Dominggo sa Pasko sa Pagkabanhaw!”
Sa tanang binhi nga among gipugas, ang nitubo mao ra gyud ang pat-ak pat-ak nga mga sagbut. Ang mga beans ug mais nga among gitanum sa laing umahan pagka-Lunes human sa Pasko sa pagkabanhaw, hinoon, maayo ra ang pagtubo. Sukad niadtong panahona ang tanan namong itanum diha sa luna sa yuta sunod sa akong balay normal na ang pagtubo.
Ako wala mobalaan sa adlawng Igpapahulay nianang Dominggo sa Pasko sa Pagkabanhaw, ug napandol pa gyud pa ko sa sagbut hinungdan nga nahinumdom. Sukad niadto, akong mahinumduman nga dili ko basta mobuhat sa bisan unsang butang nga pamati nako buot nakong buhaton sa adlaw sa Ginoo. Hinoon, kanunay nakong hinumduman ang paghimong balaan sa Adlawng Igpapahulay.