Natanggong sa Limon

Christina Wadley, Missouri, USA

Paghulagway pinaagi ni Chris Wormell

Atol sa usa ka biyahe sa pagduaw sa among kaparyentihan usa ka ting-init, ang among 12-anyos nga minivan, sa kataas sa milyahe namatay ug mihunong. Naabiriya kami. Maayo gani, kay kami lima na lang ka milya (8 km) gikan sa gamayng lungsod sa Limon, Colorado, USA.

Ang lokal nga mekaniko mihatag kanamo og dili maayong balita. Ang among transmisyon kinahanglan nga ilisan, ug kinahanglan kaming magpaabut og dili mominos lima ka adlaw alang sa mga pyesa. Nakulang ang among kwarta apan duna mi dala nga tolda ug mga gamit sa pagkamping, mao nga mipili mi nga mo-istar sa mga lokal nga mga kampinganan.

Gatusan ka milya gikan sa pamilya ug mga higala, among gihunahuna kon unsaon namo nga makaabut kami og usa ka tindahan aron sa pagpalit og mga grocery nga among gikinahanglan aron makasugakod. Mihukom kami nga mangita sa presidente sa lokal nga branch naglaom nga makakitag transportasyon. Gitawag namo si Presidente Dawson, ug sulod sa tunga sa oras nakadawat kami og duha ka tawag gikan sa mga miyembro sa Relief Society sa gamayng branch. Malipayon kaayo mi nga nakadiskobre og usa ka pamilya nga nagpuyo duol sa kampinganan; mianhi sila aron himamaton kami sulod sa pipila ka oras gikan sa among pagtawag.

Sa sunod nga semana, ang gugma ug pag-atiman nga among nadawat gikan nianang gamay nga branch sa mahangin nga kapatagan sa Colorado nakatandog kaayo kanamo. Ang pamilya nga nagpuyo sa duol midapit kanamo sa ilang panimalay alang sa panihapon nianang unang adlaw, ug nalingaw kami sa kulokabildo sa maanindot nga kagabhion uban sa mga ginikanan samtang ang among mga anak nakigdula sa ilang anak nga babaye. Pagkasunod buntag misakay kami uban sa laing miyembro aron mamalit og pagkaon ug mga gamit sa among pag-istar.

Ang kamahinatagon sa mga miyembro sa branch nagpadayon lapas sa among unang hangyo. Sila mikuha namo alang sa simbahan sa pagka-Dominggo. Sila mitabang namo sa paghimo og mga handumanan sa museyo sa lungsod sa makasaysayanon nga tren. Ang among mga anak mipasilong sa ilang panimalay sa pagpalabay sa ulan nga yelo [hailstorm]. Usa sa mga miyembro gani mipatrabaho sa akong bana sulod sa pipila ka adlaw sa pagtabang namo nga makabayad sa pagpaayo sa sakyanan.

Matag gabii, ang mga miyembro sa gamay nga branch mopakaon kanamo ug milingaw sa among mga anak sa ilang mga panimalay. Dihang hapit nang matapos ang among pag-istar, laing pamilya ang midala kanamo sa ilang ranso, diin ang among mga anak nakakat-on sa pagsakay og kabayo.

Sa dihang mibiya kami sa Limon usa ka semana ang milabay, nagbilin kami og pag-ampo sa pasalamat alang sa usa ka bag-o nga grupo sa mga higala nga midala kanamo ug mihimo kanamo nga mobati nga naa ra kami sa panimalay sa Limon.