Unsay gipasabut sa ikawalo nga artikulo sa hugot nga pagtuo nga nag-ingon, “Kami nagtuo sa Biblia nga pulong sa Dios kon kini tukma nga pagkahubad”?

Ang Biblia dili ubos sa uban nga mga kasulatan. Si Elder M. Russell Ballard sa Korum sa Napulog Duha ka mga Apostoles miingon, “Kami nagtuo, nagtahud, ug nagmahal sa Balaan nga Biblia. Kita aduna gayud sa dugang nga sagradong kasulatan, … apan kini nagsuporta sa Biblia, dili sa pagpuli niini” (“Ang Milagro sa Balaang Biblia,” Liahona, Mayo 2007, 81).

Ang atong ikawalo nga artikulo sa hugot nga pagtuo nag-ingon, “Kami nagtuo sa Biblia nga pulong sa Dios kon kini tukma nga pagkahubad.” Sa panahon ni Joseph Smith, ang pulong nga paghubad wala lang magpasabut sa pagkuha gikan sa usa ka pinulongan ngadto sa lain; kini usab nagpasabut sa pagbalhin, pagtugyan, pagtukib, o pagpasabut. Ug bisan og adunay mga sayop nga makita sa lain-laing bersyon gikan sa orihinal nga Hebreohanon ug Griyego, ang mas dako nga isyu mao nga sa pagbalhin sa karaang mga teksto ngadto sa karon, “daghan nga yano ug mga bililhon nga mga butang nga gikuha” (1 Nephi 13:28). Busa, samtang ang mga teksto sa Biblia gidala ngari kanato, adunay piho nga mga pagtulun-an ang nawala. Usa kana ka rason nga ang mga tawo adunay daghan kaayong nagkalain-laing hubad sa Biblia, sama sa nasinati ni Joseph Smith (tan-awa sa Joseph Smith—Kasaysayan 1:12). Mao nga ang usa ka paagi nga ang modernong pagpadayag nagtabang sa pagpatin-aw ug pagkumpirma sa mga kamatuoran diha sa Biblia mao ang pinaagi sa pagpahiuli sa ubang mga kamatuoran nga nawala (tan-awa sa 1 Nephi 13:39–40).