Akong Gisugdan ang Pag-ampo alang kang Ruth
June Foss, Utah, USA
Sa wala: paghulagway pinaagi ni Katie Payne; sa tuo: paghulagway pinaagi ni Allen Garns
Human nasinati ang pipila sa mga wala damhang obligasyon sa pinansyal isip single nga babaye, nasayud ko nga kinahanglan kong mangitag ikaduhang trabaho. Wala madugay human niana, si Marty, usa ka sister sa akong ward, miduol kanako ug mihangyo sa akong panabang. Siya ug ang iyang bana moadto sa misyon, busa kinahanglan niyang moundang sa iyang trabaho. Siya mipasabut nga matag Sabado siya mitabang og usa ka tigulang nga babaye, si Ruth, kinsa nagpuyo sa assisted-living complex. Si Marty mitanyag kanako sa iyang trabaho ug misulti nako nga si Ruth mobayad nako sa akong trabaho.
Sa misunod nga Lunes, Si Marty ug Ruth mipasabut sa akong mga buluhaton, ug misugod sa akong trabaho human sa pipila ka adlaw. Gisugdan nako pinaagi sa pagpundok sa mga bulingon ni Ruth ug gidala kini sa taas ngadto sa labhanan. Pagkataud-taud gikan sa akong pagsugod, si Ruth midali og sulod ug misingka ngari nako. Miingon siya nga dili gayud ko manlaba sa iyang mga sinina nga walay pagpananghid daan.
Igo lang kong mibuhat sa unsay gihangyo niya ug ni Marty ngari kanako nga akong buhaton. Sa kahiubos ug nasakitan, Akong gipugngan ang mga luha. Ako miingon sa akong kaugalingon nga wala ko magkinahanglan og dugang kaugtas ug mga problema sa akong kinabuhi. Mogawas na unta ko niana gayung tungura kon wala pa ko makasaad ni Marty nga ako ang moatiman alang ni Ruth samtang anaa siya sa layo.
Matag semana si Ruth masuk-anon kaayong mosingka ngari nako sa bisan unsang butang nga akong buhaton. Ingon og dili gayud nako siya mapahimuot walay bali bisan unsaon pa nako sa pagsulay.
Gisugdan nako sa pag-ampo aron makalahutay ni Ruth ug sa iyang bangis nga mga pulong, apan walay kausaban. Padayon ang akong kapungot nga tabangan siya.
Dayon usa ka adlaw nausab ang akong mga pag-ampo. Mihunong ko sa pag-ampo alang sa akong kaugalingon ug misugod sa pag-ampo alang kang Ruth. Naghangyo ako sa Langitnong Amahan aron tabangan ako masabtan ang iyang mga panginahanglan ug unsaon nako sa pagtabang kaniya.
Gikan nianang adlawa ang tanan nausab. Ang akong kasingkasing nalukmay, ug ang akong gugma alang kang Ruth milambo. Si Ruth nausab. Misugod na siya sa pakig-istorya ug mipakigbahin sa iyang kinabuhi, sa iyang kalipay, ug sa iyang mga kasub-anan. Misulti siya nako nga gimingaw siya sa iyang pamilya. Misulti siya nako sa mga maanindot nga mga butang nga iyang nabuhat sa iyang mga kagahapon apan dili na makahimo. Misulti siya nako nga siya nag-inusara ug nagmagul-anon.
Nagsugod ang akong kahinangop sa pakigkita ni Ruth matag semana, ug siya mahinangup sa pakigkita nako.
Ang akong kasinatian uban ni Ruth nagtudlo nako og usa ka bililhon nga leksyon. Kon matuod ang akong pagserbisyo uban sa tibuok kong kasingkasing, akong masabtan ang pagtulun-an ni Presidente Spencer W. Kimball (1895–1985) nga “taliwala sa mga milagro sa pag-alagad, anaa ang ang saad ni Jesus, nga pinaagi sa pagwagtang sa atong kaugalingon, atong makaplagan ang atong kaugalingon” (“Small Acts of Service,” Ensign, Dis. 1974, 2.)