Te Rongorongo man te Moan Beretitentii
Te Kukurei ibukiia Ake Ti Tangiriia
Iroun Beretitenti Henry B. Eyring
Moan Kauntira n te Moan Beretitentii
Ngaira ni kabane ti tangira te kukurei ibukiia ake ti tangiriia, ao ti tangiria bwa te maraki e na karako n reke irouia. Ngkana ti wareki karakinan rongorongo aika kakukurei—ao ni kamaraki—n Ana Boki Moomon, a minotaki nanora ngkana ti iangoiia raora aake ti tangiriia. Aio te karaki ae koaua n te tai ni kukurei:
“Ao e koro bukina bwa bon akea te itabaraaraa n te aba, ibukin tangiran te Atua are e bon maeka inanoia aomata.
“Ao akea te bakantang, waaki ni kauntaba, uruan te mweraoi, waaki ni kabekaau, te kewe, ke te tiriaomata, ke aekan nako te waaki ni kaibwabwaru; ao e koaua bwa bon akea riki te botanaomata n ai aroia ae a kukurei ibuakoia aomata nako ake a karikaki ni bain te Atua.”
Ngkanne ti warekia:
“Ao ai kakabwaiakira ngaiia! Bwa e bon kakabwaiaia te Uea n aia waaki nako; eng, a bon kakabwaiaaki ma ni kanakoraoaki aroia ni karokoa ae bane tebubua ao te bwina te ririki; ao te moan roro n ana tai Kristo a mate, ao bon akea te itabarara n te aba ni kabuta” (4 Nibwaai 1:15–16, 18).
Ana reirei Kristo aika tangira a tataro ao a mwakuri ibukin te kakabwaia anne ibukiia tabeman ao ibukiia. Man karaki n ana Boki Moomon ao, ibukira aika ti mwaiti, man oin ara atatai, ti ataia bwa ana bwaintituaraoi te kukurei e boni kona n reke. Ti ataia bwa te kawai nakon te kukurei e kamatataaki raoi. Ti ataia naba bwa kateimatoan te kukurei e aki bebete ni karokoa, n aroia Nibwaite imwiin rokon te Tia Kamaiu, “ana tangira te Atua” e maeka inanora.
Te tangira anne e mena inanoia Nibwaite ibukina a kawakina te tua are karaoia n koaua. Kabwarabwaraan te tua anne ni kakimototoaki e reke n taian tataro n toa, are e moanaki man te nano n tangira nakon Tamara are i Karawa. Ti tataro ma nanora ae onrake n te onimaki, ao te tangira ae korakora ibukin ara Tia Kamaiu. Ti anga ngaira ma nanora ni koaua bwa ti na uouota Arana, n Ururinga, ao ni kawakin Ana tua nako. N tokina, ti kamwakura te onimaki bwa te Tamei ae Raoiroi, te kateniman n taian n Atua, e na memena iroura n tainako, ni kakoaua nanora iroun te Tama ao Ana Rikitemanna (Taraa D&C 20:77, 79).
Ma ana iraorao te Tamnei ae Raoiroi, a kona ni bitaki nanora bwa ti aonga n tangira ao ni butimwaea ana tangira Tamara are i Karawa ao te Uea Iesu Kristo. Te kawai ni karekea tangiran te Atua nako nanora e bebete, n aron te kawai ni kabua namakinan te tangira anne inanora. Te katoto, temanna e na rineia bwa e na aki bwaina te tataro nakon te Tama are i Karawa ke n aki kabwaka bwanin te kabwianibwai ke n toki ni kakukureiko ana taeka te Atua ke n aki tabeakiniia raarikin ao kainnano.
Rinerine ake ana aki kawakin ana tua te Uea e kona ni karika te Tamnei bwa e na nako mai inanora. Man buan anne, ao e na kakerikaka te kukurei.
Te kukurei ae ti tangiria ibukiia ake ti tangiriia e kaineti ma aia rinerine. Mwaitira aron tangiran te ataei, te tia kakaae, ke raoraora, ti aki kona ni kairoroia bwa ana kawakin tuua bwa aonga n tau ibukin te Tamnei ae Raoiroi bwa e na kairoroia ao ni bita nanoia.
Ngaia are te buoka ae tamaroa ae ti kona n anga n aron are ti kona ni kairiia naake ti tangiriia n tarai aia rinerine. Aramwa e karaoia ma te kakao ae ko kona n anga:
“Kananorinanoi ngkami i matan te Uea, ma ni wetea arana ae tabu, ma n tartara ao n tataro n aki toki, bwa ko na aki kaririaki riaon are ko konaa, ma ni kairaki iroun te Tamnei ae Tabu, n riki n nanorinano, nimamannei, taotaonakinnano, onrake n te tangira ao te korakai inanon te tai ae maan;
“N reken onimakinan te Uea; n reken te kantaninga bwa e na reke iroumi te maiu are akea tokina; n reken ana tangira te Atua ao n taainako inanomi, bwa kam aonga n tabekaki rake n te kabanea ni bong ao rin n ana rau” (Aramwa 13:28–29).
I tataro bwa naake ko tangiria a na kona ni kariaia te kakao mai ieta n rinea te kawai nakon te kukurei ae aki toki.