E Tau Au Kamatebwai?

Angie Nicholas, Texas, USA

I a tia ni kakaonimaki ni wareka ana Boki Moomon ni katoabong ngke te kairake ngai. E ngae ngke n tairiki ngke n nang bwaka iaon au kainiwene ni kua ao ni kunea bwa I tuai ni wareware ibukin te bong anne, I tabeka au booki ao ni wareki tabeua kiibu.

Uoua te ririki n nako I tuangaki bwa n na reirei taekan te O Tetemanti ni katoa tieminari n te moaningabong koraki. I aki rangin n taneiai riki ma te O Tetemanti nakon booki riki tabeua inanon booki aika tabu, ngaia ae n tabeua boong n na kabanea teniua ke aua te aoa ni kamatebwai ao ni katauraoi au reirei. Ibukina bwa I kabanea te tai ae bati ni kamatebwaia te Baibara ao kaotioti ni boong aika kaitira, I katoka warekean moa ana Boki Moomon ni katoabong. Ti wareware n te utu n te tairiki, ao ni kabongana ibukin taekana n tabetai, bwa I aonga n namakinna ae I a tia ni karekea te kamatebwai n te euangkerio ae tau ni katoabong.

I nukan te ririki n reirei n Tianuare, au beretitenti n te titeiki e kaungaia kain te titeiki ni kabuta bwa ana wareka teuana te mwakoro n Ana Boki Moomon ni katoabong. E ngae ngke I aki ataia bwa N na kanga ni karekea te tai ibukin au kamatebwai n te tieminari ae korakora, I iangoia bwa N na butimwaea te kakaewenako aio. I kainnanoia ni karaoia tiaki ti ibukin kakorakorakiu ma ni kaota naba te banna ni katooto ibukiia au ataei ao ataein te reirei.

Man te tai anne I wareka te mwakoro man Ana Boki Moomon ni katoabong ngke I moana katauraoakin au reirei n te tieminari ke ngke I a tauraoi ibukin matu. Te tamnei ao te mwaaka ae I aki ataia ae bua e manga oki nakon maiu. Au reirei n te tieminari, ake a tia n rangin n nakoraoi, a rangin n tikiraoi riki. Mwakoron te O Tetemanti ake a kangaanga te ota iai a moanna ni mataata riki.. I namakinna naba bwa N na riai n oota n Ana Boki Moomon imwiin te kamatebwai ae korakora ae I a tia ni karaoia ibukin te burabeti ao ana tua Moote.

Te kabwarabwara ae kimototo n Ana Boki Moomon e raonaki ma te taeka aei mairoun te Burabeti Iotebwa Timiti: “I tuangiia mataniwin te Ekaretia bwa Ana Boki Moomon bon te kabanea n eti ibuakon boki nako iaon te aonaaba, ao bon ngaia kingin ana ekaretia, ao e na kaania riki te Atua te aomata ngkana e iri nanon reirei ake a taekinaki inanon, nakon taian boki riki tabeua.”

Ana Boki Moomon e katiteuanai mwakoron te euangkerio ni kabane ao iai inanona ana koaua ae mwaaka Iesu Kristo ao te baaire ni kamaiu. E buoki bwaai ni kabane inanon maiu bwa N na ota iai. I rangin ni kakaitau ni karekea Ana Boki Moomon bwa mwakoron maiu ni katoabong.