Karika Te Atua Bwa Am Tia Korotamnei
Maium e kona n tamaroa riki nakon are ko bon kantaningaia
Kamatatan te tamnei iroun Bryan Beach
Ko kona ni karekea rinanon mwaitin maium ni karekean am atatai n taneiai n aroaro aika boou. Tao bon nanona ni kukurei n aki tabeakin kaetieti ake a koreaki n aron bairean bwain nanon te auti ake a roko inanon mwakorokoro ke n reireiniko katangan te bwai ni katangitang n taotaon kiigin bwai ni katangitang bwa tera tangina ae tamaroa, am atatai n reiakinna rinanon kakatai ao buren waaki aika akea tiaia.
Te kawai anne iai kangaangana teuana, e taneiai n aki rang n bebete kawaina anne.
Iangoa te bwai teuana ae e kangaanga. Tera ngke bon ngkoe ae ko kaira katean am auti ao a reke bwaina ni kabane ni katukaki i matam. Ko kona ni katamnei bwarikon bwaai akanne? Raubaba, neera, bwaibu, uaea, bwain mwakuri, ao bwaai ni kabane ake ko kainnanoi ni katean am auti ae tamaroa ibukim ma am utu.
Ko teimatoa n tangiria ni karaaoia ngkai ko waakina am mwakuri? Ke ko na kainnanoa temanna ni buokiko are iai ana atatai n aron kabonganaan bwaai ni mwakuri akanne?
Kawaira rinanon te maiu bon tii te arona. Ti kainnanoa te buoka ni kakorakorai maiura. Ao akea te tia kateitei ae tamaroa ae ti na rairaki nakoina bwa ti te Atua.
Aron kabwarabwarana n Ibukin Kakorakoraia Kairake: “Te Uea e na bon karaoa angiin riki man maium nakon are ko na karaoia boni ngkoe. E na kabwaabwaka am tai, karabaaba am noraaba, ao ni kakorakorako. E na anganiko te buoka are ko kainnanoia ni kaitaraa kataakim ao kakaewenakoam. Ko kona ni karekea am koaua ae matoatoa ao ni kunea te kukurei ae koaua n aron kinaakin te Tama are i Karawa ao Natina, Iesu Kristo, ao namakinan Aia tangira ibukim” ([2011], 43).
Ngkana ti ongeaba nakon ana tua te Atua ao n Karinna n ara babaire, ti riki bwa antai ngaira are ti tangiria n riki iai—tiaki are ti iangoia bwa ti kan riki iai.
Aikai tabeman aomata ake, ma ana ibuobuoki te Atua, a kunei kawai aika tamaroa nakon are a tia n rinei i bon ibukiia.
Katoka te Kakiriwe
N te rongorongo n te witeo mormonchannel.org, te mwaane ae arana Bubba e tibwa rongorongon maiuna are e rinanon te kangaanga.1 E ikawairake n te mweenga ae kikiriwee, Ana karo e tiringaki ngke ai tibwa teniua ana ririki Bubba.
Bubba e ikawairake n rinea te maiu are bon titebo ma are e a tia n nonoria. E kaaina te kaeng ao ni moana te unuun ma te koraki ake a kaaitara. N te kuura ae rietata e iangoia ae e na bon rin n te karabuti n ae waekoa. Ao e aki tabe.
Tabeakinna te Atua N te tuuta ni kawai ae kakamaaku inanon maiuna aei, Bubba e kaitibo ma te utu Aika Itiaki ni Boong Aika Kaitira ake a kaota nakoina te tangira ae akoi ao n tamaroa. E bon tuai n mamaeka ma aomata mai mwaina n aron aei—aomata ake a kaota te nanoanga ao te tangira. E moana kabatiaan ana tai n titiku ma ngaiia n aron riaina. Ngke e titirakiniia utu akekei bwa a aera ngkai a kakaraoa kawaia n aron anne, a taku bwa ibukin aia onimaki iroun Iesu Kristo.
E tangiria ni kan ukoukoria bwa tera ae a ataia. E moana ana tataro ao ni kamatebwai booki aika tabu. Ao e waekoa n namakina te bwai teuana ae e bon tuai n namakinna mai imwaaina. “Koauana iai te Atua, ao E tangirai!” E taku Bubba. Man ana ibuobuoki te Atua, Bubba e a manga moanna ni kanakoraoa maiuna ni karika Iesu Kristo bwa aana, ni kitana maiuna are ngkoa.
“E bitaki.aroarou Antai Ngai n aron te aomata e kona ni kaokoro nakon are bon ngai ngkoa. Ngkai iai bukina. Iai tokin kawaiu,” e taku. “Iai te tabo ae N na nako iai.”
Bong aikai Bubba e noori taai aika a na roko ma te kakabwaia, onimaki, ao te kantaninga. “I ataia bwa bon ti rinanon Iesu Kristo, au onimaki Irouna, e na bon buokai n karokoai n te tabo are I tangiria n roko iai,” e taku.2
Bitakin Kawai
Beretitenti Hugh B. Brown (1883–1975), kaain te Kooram n Abotoro ake Tengau ma Uoman ao Moan Beretitentii, a tibwauaa te taneiai ngkai te Atua e karaoa riki ae bati ni katamaroan maiuna nakon are e na bon karaoia bon ngaia.
Hugh e a tia ni mwakuri n te miritari i Canada ao ngaia naba kaain te karikirakeaki nakon te tienera. E a kaman mwakuri, kakataninga, ao n tataro ibukin te karikirakeaki ibukin 10 te ririki.
Ngke e a mwaawa te nakoa, e ngae n anne, e aki rineaki ibukina ngkai ngaia kaain te Ekaretia. Anne bukina ae e teretere, ao a bon tuangnga.
E rang un Hugh. E taku: “I toka n te turein ao n okirikaaki … ma nanou ae uruaki, ma unin nanou n tamneiu. … Ngke I okira au umwanrianna, … I karenakoa bwarau iaon te kainiwene. I konii timoini baeu, ao I ioioi nako karawa. I taku, ‘Ko kanga ni karaoa aei nakoiu, te Atua? I a tia ni karaoi bwaai ni kabane ake I tau ni karaoi. Bon akea te bwai ae I kona ni karaoia—are N na riai ni karaoia—are I tuai ni karaoia. Ko kanga ni karaoa aei nakoiu?’ I bon rang un ao n nanobuaka.”3
Ngkanne Hugh e uringa ana taneiai man ririki ake rimoa. E na kaman kaboa te tabo ae e na unika aona are ngkai a rikirake mangaongaon aroka iaona. N aki kaboraoaki, te buakoako anne ana bon aki uaa. Ni kabane a na tangiria n ikawairake n abwabwaki.
Ngaia Hugh e kaboraoi ni koroi n aki karauii. Imwina, e nora timtim aika a uarereke n tabon maangana nako ake e koroi. Tarakiia kanga ai aron rannjimata. “Ngai te tia ununiki ikai,” e tuanga te aroka are e buakoako. Hugh e ataia bwa tera ae e tangiria n aron rikin te aroka are buakoako arei, ao tiaki te aroka ni katantan.
Bwa te taneiai anne e roko n ana iango n aron iangoan unna ngke e aki rineaki ibukin te karikirakeaki. “I ongo te bwanaa, ao I kinaa tangin te bwanaa aei. Bon oin bwanaau, ao te bwanaa e taku, ‘Ngai te tia ununiki ikai. I ataia bwa tera ae I tangiria bwa ko na karaoia.’ Te un n nano e nako man tamneiu, ao I bwaka iaon bubuaniwaeu irarikin te kainiwene ni bubuti te kabwarabure ibukin te aki kakaitau. …
“… Ao ngkai, e kaania 50 te ririki imwiina, I tararake nakon te [Atua] ao n taku, ‘Ko rabwa ngkoe, te Tia Ununiki, ibukin koreakiu, ibukin tangirau ae tau ni kamarakau.’”4
Hugh e aki riki bwa te tienera. Te Uea iai tabeua riki ana babaire ibukin Beretitenti Brown. N raonaki iroun te Uea bwa ana tia korotamnei, maiun Beretitenti Brown e riki bwa te tia kateitei ae rangi ni mwaatai.
Waakinna mai Moana
N aranaki bwa “ataein moone” iroun ana burabeti te Atua e taraa n ae maium e kaineta te kawai ae raoiroi. Ma anne te bwai ae riki nakon Teeterom, te rooia n ana Boki Moomon. (Taraa Aramwa 11:23.)
Aramwa ao Amureki a kabwarabwara n te aba ike e kataia Teetorom ni kareke mwane n aron te rooia ni burebureia aomata ni kaitara Aramwa ao Amureki. Teetorom e kataia ni kamwanea Aramwa ao Amureki ma ana titiraki, ma a kaekaa ao a takuia. E kaotaki ana iango Teeterom nakoia iroun te Tamnei. (Taraa Aramwa 11−12.)
N aron te maroro e reitinako, Teeterom e kubanako n aki kakarongoa. E moanna n atai ana kairua ao n namakina rawawatan bukinana n ana bure ao ni baike e a tia ni karaoi ni kairiianako aomata. E kataia ni kanakoraoi tabeua ana kamangaongao are e a tia ni karaoi, e taku, “Nooria, I bure, ao mwaane aikai a itiaki imatan te Atua” (Aramwa 14:7).
Ma e aki mwakuri. Aomata a kakionakoa Teeterom man aia kaawa Ana bure ao barannanona ni bwaai ake e a tia ni karaoi—n reitia ma maakuna ni kairuan ana kabwarabwara ni kaiitaraia Aramwa ao Amureki are e na karika mateia—e karikaTeeterom ni bwaka n aoraki ma te kabuebue, “e taonaki ma te kabuebue ae rang korakora” (Aramwa 15:3).
Te babaire are e baireia ibukin maiuna e a matebuaka ma aan maiuna. Ma anne tiaki tokin rongorongon Teetorom.
Ngke e ataia bwa ngaia a maiu Aramwa ao Amureki, e ninikoria Teetorom ao e kamarurunga ao n tuangiia bwa a na kawaria. Ngke a roko, Teeterom e butiia kamarurungana. Inanon ana onimaki e bon kamarurungaki Teeterom. E bwabetitoaki imwina ao n waaki ni kabwarabwara mai ikanne n reitanako (taraa Aramwa 15:11–12).
Maium Teeterom ae boou, n te tai aei ao te Atua ae ana tia korotamnei, e tibwa moanaki.
Bwai ni Mwakuri iaon Aama ma Neera
Te rongorongo ae raoiroi bwa ti aki nanona ae ti na rinanon te maiu n tii ngaira. Te Atua e tangiria ni kan buokiira ni katoaa mwanekan kawaira. Ao ngkana ti kariaia bwa e na buokiira, akea tiana nakon tera are ti kona n riki iai.