Ti Kakoaua Bwa ti Riai n Tarai Bwaai n Tamaroaia

Angiin te tai ti kunei reirei inanon booki aika tabu ni “kimwareirei” ao “ni kabebetei nanomi.” Te Uea e tuangiira n 2 Nibwaai 2:25, “A riki aomata, bwa aonga ni karekea te kimwareirei.” Oin bukin te maiu aei bwa e na kairiira nakon te kimwareirei are e berita iai te Uea nakoira.

Ni kabebetei nanora tiaki nanona bwa te baka n aki ataibwai ke n nanoroo n taian kakaewenako n te maiu. Unimwaane Neal A. Maxwell (1926–2004) man te Kooram n Abotoro n te Tengaun ma Uoman e kabwarabwaraa te kimwareirei bwa “onimakinan te Atua ni koaua e na kamataata ana kantaninga—tiaki tii ibukiia ni kabane aomata, ma bon ibukira n tatabemaniira nako.”¹ Ana roko kakaewenako, ibukina bwa bon ngaia mwakoron te maiu n rabwata, ma tiaki riai ni karawawataaki iai man te bwarannano ao te nanokawaki. Ti kona ni katuka ara onimaki iroun te Uea ao n tarai bwaai n tamaroaia.

E berita nakoira Iesu Kristo bwa ti na rinanon kangaanga, ma E kaumakiira, “Kabebetei nanomi; I a tia ni kataea ana kai te aba” (Ioane 16:33). E taku Beretitenti Ezra Taft Benson (1899–1994) bwa ibukina ngkai e a tia n reke iroura te euangkerio, “ngaira aika Itiaki ni Bong Aika Kaitira ti kantaningai bwaai aika a raraoi ao ni kauarerekea kantaningaan bwaai aika bubuaka ao te mauri iaora n tai nako.”²

Ti bane n namakina te rawawata ao te bwarannano man te tai teuana nakon teuana, ma ti kona ni kabebetei nanora. E taku Unimwaane Richard G. Scott (1928–2015) man te Kooram n Abotoro ake Tengaun ma Uoman, “I kakoaua bwa man onimakinan te Tia Kamaiu ao te ongotaeka nakon Ana reirei, te kukurei e na bon reitinako, ma te nanokawaki e na bon riki.”³ Ti kona ni maeka ma te kimwareirei n ataakina bwa “karawawatakira a ana riki inanon te tai ae uarereke” (D&C 121:7).

Ngkana ti katuka ara onimaki n ana babaire te Atua ibukira ao n rineia ni maiu ma te anua ae tamaro, korakorara ni kaitarai kakaewenako inanon maiura a na kakorakoraaki. Raraomara ma maakura e na karako, ao ti na rinanon te kimwareirei are E tangiria ibukira.