Kaeka mairouia Taan Kairiiri n te Ekaretia
Ko na kanga ni Waaki Nako
Iroun Unimwaane Neil L. Andersen
Man te Kooram n Abotoro n te Tengaun ma Uoman
Man te marooro are e kanakoaki n te reirei ae rietaata Brigham Young–i Hawaii n Ritembwa 14, 2013.
Rongorongo mairoun Tau ni Kamaatoaa, iroun Liz Lemon Swindle
Waaki nako e kabwarabwaraa riki ae bati nakon ae ti mwananga nako. Waaki e kabwarabwaraa te bwai ae totokoa rikirakem, ao ko riai ni kakorakorako nako iai. Ni mwananga nako n te maiu aei, ko riai ni kataia ni kararoai taian kariiri, kataia kararoai baika a tutuuki, kataia kaaka te nanououa ao te maaku iaan waem, ao butimwaai anua aika tabu n te onimaki, kantaninga, ao te tangira.
Ko na kanga ni waaki nako? E kaeka Nibwaai, “Kam waaki nako man teimatoa iroun Kristo, ma te kantaninga ae tamaroa ma ni kororaoi, ma tangiran te Atua ma aomata ni kabane” (2 Nibwaai 31:20).
Waaki nako ma te teimatoa inanon Kristo nanona ni karekea onimakinana. Nanona ni karaoia bwa boton am iango ao am mwakuri. Ngkana Ngaia ae ko iriiria, te waaki nakon bon te mwananga ae kakawaki.
Te waaki nako nanona kararoaakin taian “kariiri ao tabeaianga” n te aonaaba ao kawakinan tuua ma te koaua. “Ngkana kam tangirai, ao kam na tou mwin au tua” (Ioane 14:15).
E reitia Nibwaai bwa ma ara teimatoa inanon Kristo e na kaoti te kantaninga ae tamaroa ma ni kororaoi ma tangiran te Atua ma aomata ni kabane. Iai te onimaki iroura. Ti na kunea te rau inanon taai ni kangaanga. Arora n riki bwa ana reirei e kariaia bwa ti na kona n noora oin te kantaninga ibukin menara iaon te aba. Oin kantaninga akanne a boboto iaon buokakiia ara utu, naake ti tangiriia, ao naake irarikira. A kairaki inanona katean uean te Atua, ao ngkana ti karaoia, ti na riki n aron are iti na riki iai.
E tuangiira Nibwaai bwa ti riai ni waaki nako, ni kakukureira n ana taeka Kristo. E tuangiira ma ana bwaintituaraoi te Tamnei ae Raoiroi, ti kona n taetae ma (te atatai) aia taetae anera (taraa 2 Nibwaai 32:2–5). I ataa te bwanaa aei. Bon te bwanaa ae ti riai n teimatoa n tauraoi n ongo.
Ngkai ko waaki nako ma te raoiroi, e na kairiiriko Iesu Kristo (D&C 78:18) ao kona ataia ma te kakoaua ae korakora n Rikina ae koaua ao Ana tangira ibukim. Ngkai ko waaki nako inanon te onimaki, te Tamnei ae Raoiroi e na tuangko ao ni kaoti nakoim bwaai ake ko riai ni karaoi (taraa 2 Nibwaaii 32:5).