Mwaakan Ana Booki Moomon n Raira te Aomata
Koauan te euangkerio ni kabane a na tiku ni nneia ngkai ti kakoaua bwa kiingin ara kakoaua—ana Boki Moomon—e bon koaua.
Ngke te kairake n ataeinimwaane, I tangiria ni katei rainin taian bwaarawa are e kaoti taian korobanna ao imwiina I notua nako te moan bwaarawa. Imwiin karerenaan manin taian bwaarawa a karaoa are a bane ni bobukitaua, teuana imwiin teuana ni karokoa tokin te rain. I bae ni kabanea te aoa ae mwaiti ni karaua ni bairei taian bwaarawa raoi n aroia n te aro bwa ko na noora kakukurein bwakabwakaia.
Kakoauan ana Boki Moomon bon teuana te moan mwaneka ni karekea kakoauan ana euangkerio Iesu Kristo. Mwaitin moan bwaarawa ake a karina ni bwaka iai rinan bwaarawa ake tabeua, ngkana ti moan ataia bwa ana Boki Moomon e bon koaua, ngkanne ti kona naba n ataia bwa Iesu Kristo bon ara Tia Kamaiu ao te Tia Kabooira, bwa Iotebwa Timiti bon Ana burabeti are e kaokaki kaokan bwaai mairouna, ao bwa ana Ekaretia Iesu Kristo ibukin Boong aika Kaitira bon ana Ekaretia Iesu Kristo ae koaua ae kaokaki ma te mwaaka ao te kariaia nakon te aonaaba n te bong aei.
Ana Boki Moomon e Kakawaki ibukin Ara Rongorongo
E taku Iotebwa Timiti n taekan te boki ae kakaawaki arei, “I tuangiia taari bwa Ana Boki Moomon bon te boki ae te kabanea n eti mai buakon booki nako iaon te aonaaba, ao boni ngaia kiingin ara ekaretia, ao e na kaania riki te Atua te aomata ngkana e iri nanon reirei ake a taekinaki inanona, nakon taian boki riki tabeua.”1
E reitia n taekinna Iotebwa bwa e boni kakawaki nakon ara onimaki, kakoaua ao ara koaua. “Ni kararoaan ana Boki Moomon ao taian kaotioti, ao e nga ara aro?” e titiraki. “A akea iroura.”2
Tamaroan rongorongon te euangkerio bwa ngaira n tatabemaniira nako ti kona n ataia i bon ibukira bwa ana Boki Moomon e bon koaua.
Ngke te beretitenti n te mition i Buranti, Belgium, ao i Netherlands tabeua ririki n nako, I karekea te tai ae raka ao te kakabwaia n intawiu ma aomata ake a tau ni bwabetitoaki. N na bon aki mwaninga au intawiu ma temanna te aine.
N tain ara intawiu I titirakina neienne bwa e kanga n ataia ae e koaua te Ekaretia. E karina baina n ana baeki ao ni kaotinakoa kaobiin ana Boki Moomon ae e mangaingai. E raira te boki nakon 3 Nibwaai 27 ao ni kamataata bwa aei ana moan mwakoro are a kaoa iai mitinare bwa e na warekia. E taku bwa ngke e moana ana wareware, e bon rootaki man te bwai are e warekia ao n namakina te Tamnei. E rootaki n tamnein ana Boki Moomon are e a anaa te bentira ao ni monna ni kanikinaei taian taeka are e a anaaki iai nanona.
Ngkanne e a kaota kaobiin ana Boki Moomon, e kaukia nakon 3 Nibwaai 27. E kuri ni bane taeka ake inanon te mwakoro arei a kanikinaeaki n te uraura.
“Anne bukin ae I kakoaua,” e taku neienne. “Te boki aei e taetae nakoiu n te anga are I aki kona ni kakewea. I ataia bwa e koaua, ao I ataia bwa e koaua ana Ekaretia Iesu Kristo ibukiia aika Itiaki ni Boong Aika Kaitira.”
E bwabetitoaki ao n riki bwa kaain te Ekaretia ae rangin kakaonimaki.
Kabwarabwara n ana Boki Moomon.
Te kabwarabwara n ana Boki Moomon e kaota te banna are ti na ataia iai i bon iroura bwa rongorongon te euangkerio e bon koaua. Te kabwarabwara “e boretiaki ni moan rairan ana Boki Moomon n 1981. E kamataata ana Boki Moomon nakon te tia wareware ae boou man katauraoan rongorongo ao kabwarabwaraan te boki.”3
Te kabwarabwara e moantaai n tuangiira bwa terana ana Boki Moomon: “Bon te boki ae kanoan te koroboki ae tabu ae e kona ni kabootauaki ma te Baibara. Kanoana bon te rongorongo ae taekinaki iai ana mwakuri te Atua ao kaain aaba ake i Amerika ni kabuta ngkoa ao iai inanona bwaninin te euangkerio ae akea tokina.” Ti reiakinaki bwa e “koreaki irouia burabeti ake ngkoa aika mwaiti man ana ibuobuoki te tamnei n taetae ni burabeti ao ni kaotioti” iaon bwaatua koora ao ma ni kakimototoaki “iroun te burabeti ae te tia tau mwiin rongorongo ae Moomon.”
Korobanna n tamnei ibukin Iotebwai iroun Richard Burde, anganano man te Miutiam ibukin Rongorongon te Ekaretia; atai: kamatataan te tamnei iroun Ben Sowards
Ti reiakinaki naba bwa “te bwai ae riki ae moan te kakawaki are koreaki i nanon Ana Boki Moomon bon taekan ana mwakuri ni ibuobuoki te Uea ae Iesu Kristo ibuakoia Nibwaite imwiin mangautina. E kamatataaki iai reirein te euangkerio, e kamatataa naba te baire ni kamaiu, ao e tuangiia naba aomata bwaai aika a riai ni karaoi bwa e aonga n reke irouia te rau n te maiu aio ao te kamaiuaki ae akea tokina n te maiu ae e na roko.”
Teuana mai buakon bwaai aika kakawaki ake ti reiakinaki man ana Boki Moomon e bon koaua bwa e kaokaki te Ekaretia iroun Iesu Kristo nakon Iotebwa Timiti.
Te kabwarabwara e kaoira “ni wareka ana Boki Moomon, n iangoia raoi inanora te rongorongo are e koreaki inanona, ao imwiina butia te Atua, te Tama e Akea Tokina, n aran Kristo bwa e koaua te boki ke e aki.” Ti anganaki te berita bwa “aomata aika karaoa aio ao ni bubuti ma te onimaki ao e na reke irouia mwaakan te Tamnei ae Raoiroi. (Taraa Moronaai 10:3–5.)”
Reitan te berita aei ane imwiina: “Aomata aika karekea te koaua ae tabu aio mairoun te Tamnei ae Tabu a na ataia n te mwaaka naba aio bwa Iesu Kristo bon te Tia Kamaiu ibukin te aonaaba, ao Iotebwa Timiti bon ana tia kaotioti, ao ana burabeti ni boong aika kaitira, ao Ana Ekaretia Iesu Kristo ibukiia Aika Itiaki ni Boong aika Kaitira bon abanuean te Uea are e a tia ni manga kateaki iaon te aonaaba, ibukin te katauraoi imwaain manga okin te Mesia.”
Iangoia Ti kakoaua raoi i bon iroura bwa:
-
Iesu bon te Kristo, te Tia Kamaiu ibukin te aonaaba, ao te Tia Kabooia aomata ni kabane.
-
Iotebwa Timiti bon ana burabeti te Uea. E taekina te koaua. E noori bwaai ake e taku bwa e noori ao n ongo taian taeka ake e ongo.
-
Te Ekaretia ae e kaokaki iroun Iesu Kristo rinanon Iotebwa Timiti bon “tii te ekaretia ae koaua ao ni maiu iaon te aonaaba ae bwanin” (D&C 1:30). Bon ana Ekaretia Iesu Kristo. Iai koauana, mwaakana, te kariaiakaki, ao taian otenanti. Aio e bon onoti iroun te Uea ao te Tia Kamaiu Iesu Kristo rinanoia burabeti aika maiu.
Bwaai ni kabane aikai ti kona n atai ngkai ti ataia bwa ana Boki Moomon e bon koaua. Iai mwaakana n raira te aomata ao n anaa nanona.
Au Koaua ibukin Ana Boki Moomon
Ngke te mitinare n ataeinimwaane ngai I beku iaon Buranti, I kan ataia i bon irou ngkana e bon koaua ana Boki Moomon. I kakoaua bwa e bon koaua. Au kantaninga bwa e bon koaua. I a tia n nako ni karaoa au mwakuri ni mitinare ma te onimaki bwa e bon koaua. E ngae n anne, ngke I mwakuri ni mitinare te bong teuana ma teuana ao I tuangiia aomata au kabanea ni konaa n au taetae ni Buranti ae aki bati n tau bwa I kakoaua te boki, I bon aki raoi ataia i bon irou.
Ara auti ae uarereke i maiakin Buranti e mwaitoro ao n aomwaimwai n tain te kamwaitoro anne. Ni katoa ingabong ao te tairiki, imwaain ao imwiin banen te mwakuri n inanon ngaina, N na bae n niirai ma te burangketi ao te kooti ni wareware ao ni kamatebwaia ana Boki Moomon. I ataa ana berita Moronaai, bwa ngkana I wareware, n iangoia raoi, ao n tataro, N na kona naba n ataia. Inanon boong ma wiiki I wareware, ma akea te bwai ae riki. I aki noora te oota, I aki noora te anera, I aki ongo te bwanaa—bon akea ma tii namakinan te rau ngkana I wareware.
I reitanako au wareware ao n kanikinaei rongorongo aika a korakora nanoia ao n tataro ni kan ataia ngkana e koaua ana Boki Moomon. E a kaoti te kakai n te kabane. Ngkai e kabwarabwaraa Unimwaane David A. Bednar man te Kooram n Abotoro ake Tengaun ma Uoman, ti tebo ma taraakin otin taai nakon kauraan te taura te iti n te tai ae waekoa.4 E moanna ni kaoti te oota n au iango ao inanou. I a moanna n noora ana Boki Moomon n te anga ae kaokoro. Taian rongorongo ake I a tia ni wareki mai imwaaina a moanna n iai nanoia aika boou. Te anga ae tamaroa ae I kona ni kabwarabwaraa te taneiai anne bwa e a moanna ni kaotaaki au iango.
Riaon wiiki ma namwakaina, I kona n taekinna bwa I a ataia riki raoi nakon bwaai ni kabane ake I kakoauai bwa ana Boki Moomon bon ana taeka te Atua. I a ataia bwa e koreaki ao ni kawakinaki ibukin ara bong ao ni kaokaki bwa te kakoaua ae mwaakaroiroi ibukin Iesu Kristo ao Ana Ekaretia. Te namakin are e a manga moan roko riki irou rinanon bwanaan te Tamnei, “E bon koaua, e bon koaua, a bane ni koaua.”
Abwi te ririki imwiina, te kakoaua anne e reitinako nakoiu. I a tia ni wareke ana Boki Moomon n te tai ae mwaiti, ao n te tai teuana ma teuana—ni katoa tai—I a manga ongo naba te taeka “E bon koaua.” Aei e anganai kakoauaana raoi bwa Iesu Kristo bon au Tia Kamaiu ao bwa aei Ana mwakuri ni kamaiu ae kakannato.
N aron taian bwaarawa ae I tangiri ni kan takakaro ma ngaai ngke te ataeinimwaane ngai ngke a bane ni bwaka iaontano I notua nako are te moan, ngaia are aron naba koaua te euangkerio ni kabane a mena raoi ni nneia ngkana ti ataia bwa kiingin ara kakoaua—ana Boki Moomon—e bon koaua.