Loholona K. Brett Nattress

Fitopololahy Manampahefana Ambony

Mamaritra ny tenan’izy ireo ho toy ny “olona tsy tonga lafatra mitady fotoana tonga lafatra” ny Loholona K. Brett Nattress sy i Shauna Lee Adamson Nattress vadiny.

Nahita fotoana maro toy izany izy ireo nandritra ny fiainany—mifandray amin’ny Mpamonjy sy ny Sorompanavotana ny zavatra rehetra na amin’ny fomba ahoana na amin’ny fomba ahoana, hoy ny Loholona Nattress.

Nilaza ny Loholona Nattress fa nateraka ray aman-dreny tsongoin’olom-bolo izy, dia i David sy Judy Sorensen Nattress izany, ary mahatsiaro ny reniny izay mamaky ny Bokin’i Môrmôna amin’ny fianakaviana isan’andro.

Nody tany an-trano izy indray mandeha nandritra ny fialan-tsasatry ny oniversite. Nifantoka tany amin’ireo fanadinana famaranana ho avy ny sainy ka toy ny nahatsapa hoe hafahafa izy na dia tsy nahatsapa aza hoe marary.

“Raha mahatsapa hoe tsy marary ianao fa mahatsapa ho hafahafa,” hoy ny reniny taminy “dia mila mandeha manompo olona ianao.”

Natsipin’i Brett tao aorian’ilay fiarakodiaben’ny fianakaviana ilay lapely fisorohana ranomandry, dia nandeha nihodinkodina nisoroka ireo lalana manokana fidirana eo amin’ny tranon’ireo mananotena tao amin’ny paroasy izy. Nahazo aina kokoa izy.

“Diso nifantoka loatra tamin’ny tenako sy ny fanadinana famaranana aho ka hadinoko hoe ny tena tanjon’ny fiainana dia ny manompo ny hafa,” hoy izy.

Teraka tamin’ny 4 martsa 1965 tany Pocatello, Idaho, Etazonia ny Loholona Nattress. Nifindra tany Lehi, Utah, Etazonia ny fianakaviana izay toerana niainan’izy sy ny iray tampo aminy miisa dimy fiainana tany amin’ny toeram-pambolena sy fiompiana kely.

Nihaona tamin’ilay ho vadiny izy fony izy roa samy mpianatra tany amin’ny sekoly ambaratonga faharoa tany akaiky tany. Nivady tao amin’ny Tempolin’i Salt Lake izy ireo tamin’ny 24 aprily 1987 rehefa niverina avy nanompo tany amin’ny Misiônan’i Sacramento Californie nanomboka tamin’ny 1984 ka hatramin’ny 1986 izy. Manan-janaka fito izy ireo.

Nianatra tany amin’ny Brigham Young University tany Provo, Utah izy ary nahazo mari-pahaizana momba ny thérapie physique avy tao amin’ny Oniversite an’i Utah tamin’ny 1990. Niara-nanorina tamin’ny rahalahiny David ny Health Care Corp. izy tamin’ny taona 2000.

Nanompo tao anatin’ny antso maro tao amin’ny Fiangonana ny Loholona Whiting, ka tao anatin’izany dia efa filohan’ny Zatovolahy teo anivon’ny paroasy, eveka, filohan’ny Zatovolahy teo anivon’ny tsatòka, filohan’ny tsatòka ary Fitopololahin’ny Vondrom-paritra izy. Niahy ilay Misiônan’i Gilbert Arizona vao naorina izy tamin’ny fotoana niantsoana azy.