Fesoasoani i le Vaaiga o Elise
E alala le tusitala i Oregon, ISA.
“Ta savavali. Ta talanoa. E faaalia ai lou alofa” Tusipese a Tamaiti, 78).
Na faataupupula atu Daniel i fafo o le faamalama. Na ia vaaia ana uo ua agai atu i le paka ma a latou polo pasiketi. Sa ia fia alu foi.
“E le mafai ona ou avea oe nei, Daniel,” o le tala lea a Tina. “Ua fulu tele lou tuafafine. Ma e lei lava lou matua e te alu ai nao oe. Ou te faamalie atu.”
Na faanonou atu Daniel i lona tuafafine, o Elise. Na nofo o ia i lona nofoafaataavalevale ma ana meataalo i luga o ona vae. Ua lima ona tausaga, ae sa lei mafai ona ia savali pe talanoa foi. Na tale malosi Elise. E tele lava ina mai o ia, ma e le mafai ona ia alu i fafo pe afai e vevela tele pe malulu tele. Ma e ai o ia e ala atu i se faagaau i lona manava.
Na alofa Daniel i lona tuafafine, ae o nisi taimi na ia lagona ai foi le ita. Na faigata le faia soo o le mea sili mo Elise. Nao lona manao lava e taaalo ma isi tamaiti. Na ia lagonaina le faanoanoa tele.
“E le fetaui!” na ia fai atu ai i lona Tina. “O mea uma lava e mo Elise!” Na ia tamoe i lalo i le auala i lona potu.
E lua aso mulimuli ane ae faateteleina le leaga o le tale o Elise, ma na manaomia ona ia alu i le falemai. Na o mai matua matutua o Daniel e faamuli atu ma ia. Na faaalu e Tina ma Tama le tele o lo la taimi i le falemai faatasi ma Elise mo aso o totoe o le vaiaso.
Na mafai e matua matutua o Daniel ona ave o ia e taaalo faatasi ma isi tamaiti. Ae o lenei ua popole Daniel mo Elise. Na salamo o ia mo mea na ia fai atu i lona tina i lena aso. Na le fiafia o ia ona o nisi taimi na le mafai ai ona ia alu e taalo ona o Elise. Ae na fiafia Daniel i le ala e ataata ai o ia pe a ia talanoa ia te ia, ma o le faatasi ma ia na ia maua ai le fiafia.
Na vaavaai atu Daniel i fafo i le faamalama, ma faamoemoe e vaai ia Tina ma Tama o aumaia Elise i le fale.
Na faafuasei lava ona vaai atu Daniel i le taavale a Tina ua afe mai i le auala taavale. Na ia tamoe atu e faafeiloai o ia.
“Tina, ou te faamlie atu i mea na ou fai atu ai e uiga ia Elise i lena aso na ou ita ai,” na ia fai atu ai, ao opo mau mai o ia.
“E le afaina,” na fai atu ai Tina ao ia toe opo maia o ia. “Ou te iloa e te alofa ia te ia. E le foliga mai e fetaui lo tatou le mafai ona faia i taimi uma mea tatou te mananao e fai. E faigata i nisi taimi mo tagata uma. Ae ou te iloa ua faamanuiaina i tatou i le i ai o Elise i lo tatou aiga.”
Na fai atu Daniel, “Ua ou misia o ia.”
“ E faapena foi au,” na fai atu ai Tina. “Na fai mai le fomai atonu e mafai lava ona sau o ia i le fale taeao.”
I le lua vaiaso mulimuli ane na i ai uma Daniel ma Elise i le Peraimeri.
“Tagata uma sue se paga ma fai se lio!” na fai mai ai le peresitene o le Peraimeri.
Na faavave atu Daniel ma uu mai le nofoafaataavalevale o lona tuafafine.
“O lau paga Elise,” na ia tau atu i lona faiaoga. Na ia tulei atu o ia i luma e faatasi i le lio a tamaiti.
Na ia fesoasoani e tausia Elise. Na ia ataata atu ia te ia, ma na ia ataata ia te ia.
Na fiafia Daniel na mafai ona toe i ai Elise i le fale. Na ia manao e avea ma se tuagane faapitoa ia te ia.