Savali a le Au Peresitene Sili
A Mavae le Alofa, Ona A Lea?
Saunia e Peresitene Dieter F. Uchtdorf
Fesoasoani Lua i le Au Peresitene Sili
Faamatalaga mai Na Ia Faamalolo le Toatele, saunia e J. Kirk Richards, faaaloaloga mai le Illume Gallery
O lo tatou perofeta pele, o Peresitene Thomas S. Monson, na aoao mai faapea “o le alofa o le ute o le talalelei.”1
O le alofa e matuai taua lava lea na ta’ua ai e Iesu “o le poloaiga muamua lena ma le sili” ma na faapea mai o isi vaega uma o le tulafono ma upu a perofeta e autu i ai.2
O le alofa o le faamoemoega autu lea mo mea uma tatou te faia i le Ekalesia. O polokalama uma, fonotaga uma, o faatinoga uma ua avea ai i tatou ma se vaega o soo o Iesu Keriso e tatau ona tupu mai lenei uiga paia—aua a aunoa ma le alofa mama, “le alofa mama o Keriso,” ua meanoa lava i tatou.3
O le taimi lava tatou te malamalama ai i lenei vaega i o tatou mafaufau ma loto, o le taimi lava tatou te folafola atu ai lo tatou alolofa mo le Atua ma o tatou uso a tagata—ona a lea?
Pe ua lava le lagona o le agaalofa ma le alofa mo isi? Pe mafai e le folafolaina atu o lo tatou alolofa mo le Atua ma lo tatou tuaoi ona faamalie ai lo tatou tiutetauave i le Atua?
O Le Faataoto i Atalii e Toalua
I le malumalu i Ierusalema, o faitaulaga sili ma aoao a Iutaia na o mai ia Iesu ina ia maileia o Ia i Ana upu. Ae peitai, na suia e le Faaola le tulaga i le faamatalaina o se tala.
“O se tasi tagata e toalua ona atalii,” na Ia amata ai. Na alu atu le tama i le atalii muamua ma fai atu e alu e galue i le tovine. Ae na musu le atalii. Mulimuli ane o lena atalii “na salamo o ia, ma alu,”
Na alu atu le tama i lona atalii lona lua ma fai atu e alu e galue i le tovine. O le atalii lona lua na faamautinoa ia te ia o le a alu o ia, ae lei alu lava.
Ona liliu atu lea o le Faaola i faitaulaga ma aoao ma fesili atu, “O ai ea o so laua na faia le loto o lo la tama?”
Na tatau ona latou taliina faapea o le atalii muamua—lea na fai mai e le alu ae na mulimuli ane salamo ma alu e galue i le tovine.4
Na faaaoga e le Faaola lenei tala e faamamafa ai se mataupu faavae taua—o i latou e usiusitai i poloaiga e alolofa moni lava i le Atua.
Atonu o le mafuaaga lenei na fetalai atu ai Iesu i tagata e faalogo ma mulimuli i upu a le au Faresaio ma le au Tusiupu ae aua le mulimuli ia latou faataitaiga.5 O nei aoao faalelotu e lei savavali i mea na latou aoaoina. Na latou fiafia e tautatala e uiga i mataupu faalelotu, ae o le mea e faanoanoa ai ua latou misia le ute.
Faatinoga ma Lo Tatou Faaolataga
I se tasi o lesona faaiu a le Faaola i Ona soo, na Ia fetalai ia i latou i le Faamasinoga mulimuli. O le a tuueseese e amioleaga ma e amiotonu. O e lelei o le a mautofi i le ola e faavavau; o e amioleaga o le a tuuina atu i le faasalaga e faavavau.
O le a le eseesega o ia vaega e lua?
O i latou na faaalia lo latou alolofa e ala i le faatinoina na faaolaina. O i latou e lei faia na faasalaina.6 O le liua moni i le talalelei a Iesu Keriso ma ona tulaga faatauaina ma mataupu faavae o le a molimauina e ala ia tatou faatinoga i o tatou olaga i aso taitasi.
I le iuga, o le na o le folafola atu o le alofa mo le Atua ma uso a tagata o le a tatou le agavaa ai mo le faaeaga. Aua, e pei ona aoao mai Iesu, “e le sao atu i le malo o le lagi i latou uma o e fai mai ia te au, le Alii e, le Alii e; na o le na te faia le finagalo o lo’u Tama o i le lagi.”7
O Le A Le Mea e Sosoo Pe a mavae le Alofa?
O le tali i le fesili “A mavae le alofa, ona a lea?” e mafai ona faigofie ma tuusao. Afai tatou te alolofa moni i le Faaola, tatou te tuu atu o tatou loto ia te Ia ona tatou savavali lea i le ala o le avea ma soo. Afai tatou te alolofa i le Atua, o le a tatou taumafai e tausi Ana poloaiga.8
Afai tatou te alolofa moni i o tatou uso a tagata, tatou te aapa atu i tatou lava e fesoasoani i “e ua matitiva ma e ua lē tagolima, o e ua mamai ma e ua puapuagatia”9 Mo i latou e faia nei faatinoga le manatu faapito o le agalelei ma le auauna atu,10 o i latou na o soo o Iesu Keriso.
O le mea lenei e mulimuli mai i le alofa.
O le ute lenei o le talalelei a Iesu Keriso.