Afai na ou faamaoni i le muai olaga, aisea ua faigata tele ai ona faamaoni i le taimi nei?

O tagata uma e o mai i le lalolagi na filifili i le muai olaga e mulimuli i le fuafuaga a le Tama Faalelagi ma talia Iesu Keriso o se Faaola. Ae e le faapea ai o le usiusitai ma le amiotonu i lenei olaga o le a faigofie. Ona o le fuafuaga a le Tama Faalelagi ua fuafuaina mo lenei olaga e avea o se suega moni lava pe faapefea ona tatou faaaogaina lo tatou faitalia, o o tatou manatuaga o le muai olaga na aveesea. Ma le isi, o se vaega o Lana fuafuaga, na tatou maua ai ni tino faaletino, na e oo i ai le fiaai, manaoga faaletino, ma faaosoosoga tatou te lei iloaina ao avea ma agaga. O lenei mea e faigofie ai ona faatosina i tatou e mea na e “faaletino, nautino, ma faatiapolo” (Mose 5:13), lea e mafua ai “o le tagata o le natura o se fili i le Atua” (Mosaea 3:19).

E mafai e se tagata ona manumalo i nei luitau i le na o le “gauai atu o ia i uunaiga a le Agaga Paia, ma tuu ese le tagata natura ma avea ma tagata paia e ala i le togiola a Keriso le Alii” (Mosaea 3:19). E le faigofie, ae o Iesu Keriso o le a faamalosia oe ma liua oe ao e faalogo atu i le Agaga, ma faia filifiliga lelei, ma o mai ia te Ia.