O Fea le Auala e Filifili?
O aso uma e tatau lava ona fai e Hannah se tala leaga.
O le aso muamua lea i lau aoga fou. Sa ou fiafia e faia ni uo fou ma sa lelei tele i lena mea. Sa ou oo atu i lou potuaoga ma vaaia tagata uma. Na ou manatu o le a ou maua se tausaga maoae. I le taimi o le malologa faatasi ma au uo fou, na matou nonofo uma i lalo e sosoo ma se teine mai se isi vasega. O lona igoa o Hannah. Ina ua ou nofo i lalo, na fai mai Hannah, “Oka, matuai manogi ou seevae. Na ou mafaufau pe le o le apa lapisi po o ou lavalava.”
Na ou matuai ofo lava ina ua ia faia lena tala, ma na faapena foi isi. O lea na ou tu ai ma see atu i se isi laulau i talaane o se isi uo fou.
O le isi aso i le malologa, sa i ai se isi tala leaga a Hannah na fai. Na faaauau lenei mea i aso uma, ae o taimi uma lava, ou te le toe faia atu se tala leaga ona o lou faiaoga o le Aoga Sa, o Brother Lawson, na fai mai e tatau ona e taulimaina isi e pei ona e manao e taulimaina ai oe e isi. Ina ua ou mafaufau i lena mea, na ou fesili atu ia Hannah ma le faaaloalo e faamolemole e taofi pe tau mai ia te au pe aisea ua faapea mai ai ia te au.
Ona ou alu lea i le fale ma tau i lou tina e uiga i mea uma na fai mai ai Hannnah. Na pei o le a ou pa! Na fai mai lou tina, “Abbey, na o le taumafai lava e aua le le faaaloalo atu i ai. O nisi taimi e faapena tagata ona o se mea faigata o loo tupu i le aiga.”
O lea na ou alu ai i le aoga ma mafaufau e uiga i mea na fai mai ai lou tina ma Brother Lawson. I lena aso i le aoga, na iu ai ina tau mai e Hannah ia te au faapea o loo tutupu ni mea faigata i le aiga ma na ia fai mai ni mea leaga ona sa ita o ia. Na ou faamagalo ia te ia, ma o lenei tausaga ua i ai o ia i lau vasega ma o i maua o ni uo lelei lava.
Na ou aoao o le mulimuli ia Iesu o le ala sili lea.