“Faapotopoto faatasi i Lou Igoa”
E alala le tusitala i Kalefonia, ISA.
Ua tofia e le Alii aufono a uarota ma paranesi e fesoasoani ia i tatou e auauna i le alofa ma le lotogatasi.
Ata na tusia e Julie Rogers
E lei leva talu ai nei na ou auai i se afiafi faaleaiga faatasi ma se aiga ou te alofa tele i ai: o se tane talavou ma le toalua ma le la tama teine laitiiti. I le avea ai ma lo latou epikopo na ou sau i lo latou fale o se faatinoga laitiiti i se uunaiga mai le Agaga ma e tele lava o se uunaiga mai le tina ma le tuafafine popole o lenei tama talavou, lea na faatasi ai foi. Na galue le Atua i lenei aiga ia faia ni suiga tetele i o latou olaga ma toe aumaia ia i latou ia faamanuiaga o le talalelei ma le Ekalesia. Ae na tupu se mea i lena aso.
Sa matuai popole lenei tamā talavou mo le tele o masina e uiga i le tausia o lona aiga. O lana galuega na fuafuaina e faamuta vave, ma o ia ma lona toalua ua i ai i le faia o se filifiliga pe tatau ona toe see atu lo latou aiga i se isi setete. O le uiga o lena mea o ni suiga taua mo le aiga. Na vave iloa e lenei tama i lena aso o se fesoasoani tele o mea tautupe na fuafuaina o le a le maua; o se tala faanoanoa tele.
Ina ua ou taunuu atu i lo latou fale mautotogi, na mafai ona ou vaaia le lotovaivai tele i ona fofoga. O le tiutetauave o le tausia o se aiga ma le tala le manuia na mamafatu i tauau o lenei tama talavou.
O lona toalua na filifilia se mataupu o tusitusiga paia mo le lesona e faaalia ai o latou popolega o le lagona lofituina. Na faitau e le tama le mataupu atoa. Atonu e te silafia nei upu mai le Isaia 55:
“Outou uma o e fia inu, o mai ia i le vai, atoa ma outou ua leai ni tupe, o mai ia, ina faatau ma aai; ia outou o mai lava, ma faatau … a e leai se tupe, e leai foi se tau e faatau ai. …
“Aua o o’u manatu e le o outou manatu o o’u ala e le o outou ala, ua fetalai mai ai Ieova” (fuaiupu 1, 8).
Ma ona talanoaina lea e le aiga le uiga o na fuaiupu ia i latou. Na faatumuina lena fale mautotogi laitiiti i le Agaga o le Alii ao liua lenei afiafi faaleaiga i se aufono faaleaiga. Na faasoa mai e lenei tama talavou ona popolega ma atugaluga ma manaoga, ma na faasoa atu e tagata uma lo latou alolofa ma le popole mo le tasi ma le isi. Na latou talanoa e uiga i le mea e fai, po o a filifiliga na ia i latou, po o a faatinoga e fai.
Sa avea o se talanoaga faalauaitele. Na i ai ni feeseeseaiga. Na uunaia au e na o le faalogo lava ma vaavaai. Mulimuli ane, i le lotogatasi na filifili le tane ma le ava ua tatau ona la faia faatasi le filifiliga ma le Alii e ala i le tatalo. Na masani ona ou ofoina atu upu o le lagolago ma le faamalosiau.
O le Mamanu a le Alii o Faaaliga
E mafai ona ou manatua ni nai taimi na ou iloaina ai le Agaga o le Alii e sili atu le malosi nai lo lena tamai fale mautotogi i lena afiafi faatasi ma lena aiga lotomaualalo, ma le pagatia. O se faataunuuina o le folafolaga a le Alii na tuuina i Ona soo i aso ua mavae: “O le mea e potopoto faatasi ai le toalua po o le toatolu i lou igoa, e faatatau i se mea e tasi, faauta, o iina o le a Ou i ai i le lotolotoi o i latou—e faapei lava ona Ou i ai ia te oulua.” (MF&F 6:32).
O na upu mai le Faaola e le na o se fautuaga lelei pe na o ni nai upu o le faamafanafanaga. Mo le perofeta talavou o Iosefa Samita ma Oliva Kaotui, o na upu a le Faaola ua faatuina mai ai le aoaoga faavae ma le mamanu mo le mauaina o faaaliga ma le taitaiga ma mo le faia o filifiliga i le malo o le Atua.
Na i ai le Alii i totonu o lena aufono a le aiga i lena po. Na latou valaaulia Lona Agaga e ala i le tatalo ma le suesue i tusitusiga paia. Na lotogatasi i latou i le faamoemoe. Na faatumuina i latou i le alofa mo le tasi ma le isi. Na latou aumaia o latou manatu sili ma aafiaga ma faataatia i luma o le tasi ma le isi ma luma o le Alii ma ole atu mo Lana taitaiga. Na latou faia filifiliga i le lotogatasi ona faia lea o le faatinoga.
O le Ekalesia e Faatautaia e Ala i Aufono
O le tusitaulima a le Ekalesia ua aoao mai ai le aoaoga faavae o aufono:
“O le Ekalesia a le Alii e taitaia e ala i aufono i pulega aoao, eria, siteki, ma uarota. O nei aufono e taua i le faatulagaga o le Ekalesia.
I lalo o ki o le taitaiga a le perisitua i faatulagaga taitasi, e soalaupule faatasi taitai mo le manuia o tagata taitoatasi ma aiga.”1
I tulaga uma o lenei Ekalesia, tatou te tauivi e faatautaia e ala i na mataupu faavae na aoao mai e le Faaola i Ona soo ma Oliva ma Iosefa—e o mai faatasi i le lotogatasi ma le aufono.
O uarota taitasi e i ai se aufono e “aofia ai le au epikopo, failautusi a le uarota, failautusi faapitoa a le uarota, taitai vaega o faitaulaga sili, peresitene o le korama a toeaina, taitai misiona a le uarota, ma peresitene o le Aualofa, Alii Talavou, Tamaitai Talavou, Peraimeri, ma le Aoga Sa.”2
O galuega uma e fai e lenei vaega o taitai o le uarota e faatumutumuina lava le taulai atu i le fesoasoani i “tagata taitoatasi e fausia a latou molimau, ia maua sauniga faaola, tausia feagaiga, ma avea ma soo faapaiaina o Iesu Keriso.”3
Atonu na e faalogo i le fuaitau “E i ai le saogalemu i aufono.”4 Aisea? O se tasi o mafuaaga o le mea moni faigofie faapea e leai se tasi o i tatou e poto e pei o le toatele o i tatou faatasi. O i tatou taitoatasi e aumaia se manatu faapitoa ma ni aafiaga ma manatu.
O le tusitaulima a le Ekalesia e aoaoina foi pe faapefea e fonotaga a aufono a uarota ona mafai ona sili ona aoga i le faaaofiaina ai o manatu faapitoa o tagata taitoatasi o le aufono: “I le taimi o le fonotaga, e faamalamalama ai e le epikopo mataupu taitasi ua mafaufauina, peitai e le masani ona ia faia le tonu pe faapefea ona foia le mataupu sei vagana ua faafofoga o ia i le talanoaga. Na te uunaia isi sui auai e faaali o latou manatu i le talanoaga e aunoa ma lona faoa uma o le taimi. Na te fesili atu fesili ma e mafai ona talosagaina ni sui auai faapitoa mo a latou fautuaga. E faalogologo o ia ma le toto’a a o lei faia se faaiuga. O nei talanoaga e tatau ona siitia ai se agaga po o se siosiomaga o musumusuga.”5
I se faaupuga faigofie, tatou te aumaia a tatou taleni faapitoa ma malosiaga ma manatu. Tatou te augani atu i le Alii ia faatasi ma i tatou, e taitaia i tatou e Lona Agaga, ia faia se eseesega i mea tatou te le mafaia, ma ia iloa manaoga o tagata o loo tatou auauna atu i ai. Tatou te talanoaina manaoga o aiga ma tagata taitoatasi ma taumafai ia oo i ni filifiliga i le lotogatasi. Ona tatou o loa lea e galulue ma ole atu i le Alii e faamanuia tagata o le uarota.
Fefautuaai Faatasi i le Aufono a le Uarota
I le valu masina ae ou te lei auai i lena afiafi faaleaiga faatasi ma lena aiga talavou, na potopoto le aufono a le uarota i se tasi taeao o le Aso Sa. Na matou amata i le tatalo ma matamata i se vitio e uiga i le fesoasoani i tagata taitoatasi ma aiga ia maua faamanuiaga ma sauniga o le talalelei. Na ou fesili i tagata o le aufono pe na i ai se tagata na oo mai i le mafaufau ao matou matamata i le vitio. O lena mea na taitai atu ai i se talanoaina o lenei aiga. Na matou faaalia lo matou alolofa mo i latou. Na matou talanoaina ni valaauga talafeagai, pe faapefea ona matou fesoasoani i le tama e galue i le faauuina i le Perisitua Mekisateko, ma pe faapefea ona matou fesoasoani i le ulugalii e galulue i le mauaina o sauniga o le malumalu.
I le avea ai ma epikopo na ou faia ni tofiga. Na foliga mai ua toeitiiti uma le talanoaga, ae na i ai lava se mea na lagonaina e fai si le sao. O le peresitene o Tamaitai Talavou lea na iu ina fai mai, “Ou te manatu ua televave tele la tatou faaiuga. Ou te tau lagonaina e pei tatou te manaomia le taulai atu i mea faavae mo i latou, e pei o afiafi faaleaiga ma le suesueina o tusitusiga paia ma le tatalo. Ona alu ese ai lea o lena lagona “e fai si le sao”. Na ia saunoa, e le mo le faalapotopotoga a Tamaitai Talavou, ae ona o le alofa mo lenei aiga, ma i lena taimi na molimau mai ai le Agaga ia i matou i le moni o lana fautuaga.
O le faamatalaga a lenei tuafafine na toe amata ai le talanoaga. Na matou talanoa e uiga i le ala e fesoasoani ai i le aiga e atiina ae se mamanu o le suesue i tusitusiga paia, tatalo, ma afiafi faaleaiga. O le tuafafine o le tama talavou na auauna atu o se tasi o faifeautalai o la matou uarota, o lea na tuu atu ai le tofiga i le taitai misiona e galue ma ia ma faiaoga o aiga e faatulaga ni afiafi faaleaiga faisoo. Na ma momoliina ma lou toalua se kopi o le risosi taiala o le Afiafi Faaleaiga ma se tusipese i lo latou aiga.
O le lagolago ma le malosi na sili le faatumauina na sau mai le tina ma le tuafafine o lenei tama talavou ao la auai pea i afiafi faaleaiga ma le aiga, ma iu lava ina taitai atu i lena afiafi faaleaiga taua lena na faamanuiaina au e auai.
Ua tau mai e le tusitaulima: “E tatau ona tofu lagona e alii ma tamaitai e faatauaina o latou finagalo o ni sui auai atoatoa. … O manatu o tamaitai o nisi taimi e ese ai mai manatu o alii, ma e faaopoopo atu ai se vaaiga taua i le malamalamaaga ma le tali atu i manaoga o tagata o le au paia.”6 I le avea ai ma se epikopo talavou ou te nofo i le aufono faatasi ma peresitene o le Peraimeri, Tamaitai Talavou, ma le Aualofa o e ua i ai le poto e sili atu ma aafiaga o le olaga ma manatu nai lo au. E masani lava o i latou o ou faiaoga i uiga faaKeriso ma e oo lava i le ala e avea ai ma se tama lelei ma se tasi e umia le perisitua.
Ou te matuai faafetai lava mo tamaitai o lenei Ekalesia. Ou te faamoemoe o le a le lagonaina e o tatou tuafafine le le taua po o le le amanaia foi ia tatou fonotaga o aufono. O tagata o le aufono a le uarota e galulue o ni tagata tutusa. O ki o le au peresitene ua tuuina i se epikopo o se mataupu o le faatulagaina tatau, faalapotopotoga, ma se tiutetauave tofiaina ae le o se faailoga o le pule po o le maualuga faaleagaga.
Lotogatasi
Ua faamatalaina e le tusitaulima le taua o le lotogatasi: “A maea se talatalanoaga, e mafai e le epikopo ona faia se faaiuga, pe e mafai foi ona ia faatali e talanoaina atili ma ona fesoasoani le mataupu. A uma ona ia faia se faaiuga, e tatau i sui auai o le aufono ona lagolagoina i se agaga o le aufaatasi ma le lotogatasi.
“Afai e malosi ni lagona lē mautinoa o sui auai o le aufono e uiga i se faaiuga taua, e mafai ona faatali le epikopo mo le isi fonotaga a le aufono, e iloilo atili ai le mataupu ma sailia le faamautinoaga faaleagaga ma le lotogatasi.”7
O le lotogatasi o se isi mafuaaga o le saogalemu i aufono. O nisi taimi i le avea ai ma tagata taitoatasi tatou te manatu tatou te iloa po o a faatinoga e manaomia le faia, ma e masani ona tatou mananao e oso sao i le taunuuga i le faaiuga. E galo ia i tatou o le sini faaiu a le Alii e le o lo tatou faia o se atiina ae o se fuafuaga o faatinoga. E faapea o Ana fanau taitasi e oo ina iloa o Ia. E te manatua le ala na tatalo ai le Alii mo Ona soo:
“O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea. …
“Ou te tatalo mo i latou: ou te le tatalo mo le lalolagi; ao i latou na e foaiina mai ia te au; aua o ou tagata lava i latou. …
“… Le Tama Paia e, ia e tausi ia i latou i lou suafa o e na e foai mai ia te au, ina ia tasi o i latou, faapei o i taua. …
“O au i totonu o i latou, o oe foi o i totonu ia te au, ina ia faaatoatoaina i latou ia tasi” (Ioane 17:3, 9, 11, 23).
O le faamoemoega a le Alii ia avea i tatou Mona—ia tasi i tatou ma Ia, ma lo tatou Tama Faalelagi, ma le tasi ma le isi. O le faagasologa e taua e pei o le taunuuga. O aufono o se vaega o le faagasologa paia ua tofiaina lea e ausia ai le lotogatasi lea e avea ai i tatou faapei o Keriso. Ua fetalai mai le Alii, “ia tasi outou; ma afai tou te lē tasi e lē a au outou” (MF&F 38:27).
O lena poloaiga atonu e faaaogaina o se suega. Mo se faataitaiga, atonu na saunoa mai le Alii, “Tou te iloa ai e a au outou, pe a tasi outou ma le isi ma tasi ma au.”
O le tama o se aiga e mafai ona maua faaaliga o le toe malaga ese o le aiga o le a aumaia faamanuiaga ma le lotogatasi. Ae a aunoa ma le lotogatasi o lona toalua ma le fanau, atonu o le a le aumaia e lana fuafuaga ni taunuuga na faamoemoeina.
O se epikopo atonu e maua faaaliga mo se fuafuaga o le misiona a le uarota, ae seiloga e autasi le aufono a le uarota ma lena faaaliga, o le a le oo mai ni faamanuiaga, ma o le epikopo o le a tuua e mafaufau po o le a le mea na sese.
O le ala lenei na faamatalaina ai e Peresitene Russell M. Nelson, le Peresitene o le Korama a Aposetolo e Toasefululua, le ala e faatautaia ai le Aufono a le Au Peresitene Sili ma le Korama a Aposetolo e Toasefululua:
“O le valaauina o tamalii e 15 i le valaauga paia faaaposetolo ua tuuina mai ai se puipuiga tele mo i tatou o tagata o le Ekalesia. Aisea? Ona o faaiuga a nei taitai e tatau ona autasi. E mafai ona e mafaufauina le manaomia e le Agaga ona musuia tamalii e 15 ia maua ai le autasi? O nei tamalii e 15 e eseese uma o latou tulaga faaleaoaoga ma faalegaluega, faatasi ai ma manatu eseese e uiga i le tele o mea. Talitonu mai ia te au! O nei tamalii e 15—o perofeta, tagatavaai, ma talifaaaliga—latou te silafia le finagalo o le Alii pe a ausia le autasi!”8
Ou te molimau atu o le Alii e fia silafia faamatalaga o olaga o o tatou tagata taitoatasi. Ou te ofo pea lava i le tele o le fesoasoani ua naunautai le Faaola e fai, po o le auina mai o se tasi o Ana auauna, e laveai se tasi o Ana fanau. Ou te matuai faafetai lava mo aufono ua tofia faatasi ma le tiutetauave e tausia fanau a le Tama Faalelagi.
Ina ia aoao atili e uiga i aufono faaleaiga, tagai i le saunoaga a Elder M. Russell Ballard o le konafesi aoao ia Aperila 2016, “Aufono Faaleaiga.”