Seia Tatou Toe Feiloai
O Le Maa Tuia Tele o Siona
Mai le “Ia Faaeteete I le Faamaualuga,” Ensign, Iulai 1989, 4-7). Faatulagaina faailoga.
O le faamaualuga e i ai le uiga o le fiatautavā.
Ata na tusia e © Photodisc/Thinkstock
O le faamaualuga o se agasala e matua malamalama sese i ai, ma o le toatele ua agasala ai e aunoa ma le iloa (tagai Mosaea 3:11; 3 Nifae 6:18). I tusitusiga paia e leai se mea e tau o se faamaualuga amiotonu—o taimi uma lava e ta’u ai o se agasala. …
O le ‘auga autu o le faamaualuga o le ita—ita i le Atua ma le ita i o tatou uso a tagata. O le ita o lona uiga o le “le fiafia, inoino, po o se tulaga o le tetee.” O le mana lea e manao Satani e pulea ai i tatou.
O le faamaualuga e i ai le uiga o le fiatautavā. Tatou te faatautava atu o tatou loto i le finagalo o le Atua. A tatou faatūtū atu lo tatou faamaualuga i le Atua, o lona uiga ua tatou faapea atu “e faia lo’u loto ae le o lou fingalo.” …
O le faatautava atu o o tatou loto i le finagalo o le Atua, o le a faatagaina ai le le puleaina lelei o manaoga, mea moomia, ma tuinanau (tagai Alema 38:12; 3 Nifae 12:30).
E le mafai ona talia e le tagata faamaualuga le pule a le Atua e tuuina atu le taitaiga i o latou olaga (tagai Helamana 12:6). E faatautava atu o latou manatu e uiga i le upumoni e faasaga i le atamai sili o le Atua, o latou tomai e faatautava ma le pule o le perisitua a le Atua, mea latou te ausia e faasaga i Ana galuega mamana.
… E mananao e faamaualuga ia ioe mai le Atua ia i latou. Latou te le mananao e suia o latou taofi e ioe ai i le finagalo o le Atua.
O le isi vaega tele o lenei agasala taatele o le faamaualuga, o le ita i o tatou uso a tagata. E faaosoosoina i tatou i aso uma ia fia sili atu i lo isi tagata ma vaai maualalo ai ia i latou. (tagai Helamana 6:17; MF&F 58:41).
O le tagata faamaualuga, e fai tagata uma ma ona fili e ala i le sueina o ō latou atamai, manatu, galuega, oa, taleni, po o soo se isi fua faalelalolagi e faasaga i isi. I upu a C. S. Lewis: ‘O le faamaualuga na te le maua se fiafia mai le mauaina o se mea, na o le mauaina o mea e tele atu nai lo le isi tagata. … O le tulaga faatusatusa lea e fai ai oe ma tagata faamaualuga: o le fiafia i le iloa ai ua sili atu oe nai lo isi. O le taimi lava e aluese ai le agaga lea o le fiatautava, o le taimi foi lena e aluese ai foi ma le faamaualuga” (Mere Christianity [1952], 109–10). …
O tagata faamaualuluga e sili atu ona fefefe i faamasinoga a tagata nai lo o faamasinoga a le Atua (tagai MF&F 3:6–7; 30:1–2; 60:2). “O le a se manatu o tagata ia te a’u?” e sili atu ona mamafa nai lo le “O le a se finagalo o le Atua ia te a’u?” …
A mauaa le faamaualuga i o tatou loto, o le a aveesea lo tatou ola tutoatasi mai le lalolagi ma saisaitia ai lo tatou saolotoga i le nofopologa i faamasinoga ma manatu o tagata. E leotele atu le feei a le lalolagi nai lo o musumusuga a le Agaga Paia. O manatu o tagata e tafiesea ai faaaliga a le Atua, ma faamaamulu ai e tagata faamaualuluga le āi uamea (tagai 1 Nifae 8:19–28; 11:25; 15:23–24). …
O le faamaualuga o le maa tuia tele lea i Siona. Ou te toe fai atu: O le faamaualuga o le maa tuia tele lea i Siona. …
E tatau ona tatou gaua’i atu “i uunaiga a le Agaga Paia,” ma tuu ese le “tagata natura,” faamaualuga ae avea ma “se tagata paia e ala i le togiola a Keriso le Alii,” ma avea “e pei o se tamaitiiti, e usiusitai, agamalu, lotomaualalo.” (Mosaea 3:19; tagai foi Alema 13:28.)