Fausiaina o le Malo i Ausetalia

Saunia e Ben Robinson

E alala le tusitala i Iuta, ISA.

O faigata ma le logonoa na le taofia ai lenei talavou matua mai le fesoasoani e faanatinatiina le galuega a le Alii i Ausetalia.

Ao oso ae le la i luga o le Mauga o Baw Baw, o loo faia e Callan Brooks le mea e fiafia i ai: e fauina ia fale. E na te ataata ao ia faaofi atu le isi lua-i-le-fa i lona tulaga, ma lagonaina le lagona o le faamalieina mo se galuega ua lelei ona fai.

O le vaaia o Callan o galue, e te le mateina lava o ia e logonoa. Ae e le faavaivai ai o ia. Ia Callan, e foliga mai na ia fanau mai e fai lenei mea. Ma atonu lava e sao—mo le lima tupulaga o lona aiga sa fauina ia fale.

“Ina ua 15 ou tausaga, na ou tuua le aoga e amata lau galuega faataitai,” o lana tala lea. “Afai e te mauaina se galuega faataitai e te fiafia i ai, o se mea masani i Ausetalia le tuua o le aoga ae fai lena galuega i le taimi atoa,” Na fauina e Callan ia fale mai lena taimi. Pe o ia fausiaina ni fale, atiina ae lana lava molimau, pe faalauteleina se valaauga, e auai lava i taimi uma Callan i le fausiaina o le malo o le Atua.

E pei lava ona le taofia mai o ia i lona logonoa mai laga galuega fau fale, e lei faaitiitia ai foi lona manao e aoao ma talai atu le talalelei.

“Ao tuputupu ae, sa tau le mafai ona ou malalama i le 10 pasene o mea o loo fai mai i le pulelaa,” ua fai mai ai Callan. Na ia manao e auauna atu faamisiona ae na le agavaa ona o lana faalogo. Ae ui i lea, na ia tatalo ma faalagolago o le finagalo o le Alii o le a faia. Ona tupu lea o se mea faafuasei: na faateleina le leaga o le faalogo a Callan.

“Ina ua 18 ou tausaga, na ou logonoa atoatoa lava mo le umi o le ono masina. Na ou alu i le lotu mo ni lagona, aua na o le pau lena o le mea ou te maua mai ai,” ua ia faamatala mai.

I na taimi, na fausia e Callan lana molimau ma faalagolago i le Agaga. Ae o le mea na foliga mai muamua o se tofotofoga sili atu na avea ma tali i ana tatalo. Ona o le faafuasei ona leaga tele o lana faalogo, na agavaa ai o ia mo se taotoga o le taliga, lea na faaleleia ai lana faalogo e agavaa ai o ia mo se misiona. Na vave ona malaga atu Callan e auauna i Perth, Ausetalia.

O lenei ua i le fale i Moe, Victoria, ua auauna atu Callan i lana uarota i le au peresitene o Alii Talavou, lea e fesoasoani ai o ia i alii talavou e toa 10 ia tumau malosi i le talalelei i se nofoaga e matuai faigata ai lava ona tumau malosi ai. Ina ia faia lenei mea, na te faamamafa atu le matafaioi a le Agaga i le fausiaina o le liua moni.

“Matou te taumafai e taitai alii talavou ia aafia i lo latou lava liua e ala i le faitauina o le Tusi a Mamona ma le faaaogaina o polokalama a le Ekalesia,” fai mai ai o ia.

O le taua o le galuega a lenei fau fale tupulaga lona lima e iloa gofie lava, e ala atu i ana galuega fau fale, lana molimau o le talalelei, ma lona aotauina o alii talavou i lana uarota.