Tali mai Taitai o le Ekalesia
O Le Ala e Faaalia ai le Loto Faafetai
Saunia e Elder Robert D. Hales
O Le Korama a Aposetolo e Toasefululua
Mai se saunoaga i le konafesi aoao ia Aperila 1992.
O lau faafetai sili ona loloto e mo le taulaga togiola a lo tatou Alii ma le Faaola, o Iesu Keriso. O le Togiola o le faavae lea e faalagolago i ai upumoni uma o le talalelei. …
O le loto faafetai o se tulaga o le talisapaia, o se faatinoga o le faafetai, lea e mafua ai ona lotomaualalo ona ua tatou iloa se faatinoga agalelei, auaunaga, po o le popole mai se tasi lea e siitia ai i tatou ma faamalosia ai i tatou.
O le le loto faafetai o le uiga o le le nofouta po o le le iloaina pe a auauna mai se tasi ia i tatou pe fesoasoani mai ia i tatou, ae sili le leaga, pe a tatou iloa ua fesoasoani mai se tasi ae le tuuina atu i ai le faafetai faalilolilo pe faalauaitele.
I se auala filemu, o le faaleoina ma lagona o le loto faafetai e i ai se natura matagofie faamamaina ma faamaloloina. O le loto faafetai e aumaia le mafanafana tutusa i le e tuuina atu ma le e taliaina.
O le loto faafetai e faaleoina i lo tatou Tama Faalelagi i tatalo mo mea ua tatou maua e aumaia le filemu mafanafana—se mafanafana lea e faatagaina i tatou e le faaleagaina o tatou agaga mo mea tatou te le o maua. O le loto faafetai e aumaia se filemu lena e fesoasoani ia i tatou e faatoilalo le tiga o le fili ma le toilalo. O le loto faafetai i aso taitasi o lona uiga tatou te faaleo atu le faafetai mo mea ua tatou maua i le taimi nei e tusa lava po o a mea na tatou maua i le taimi ua tuanai po o manaoga i le lumanai. O se faailoaga ma le talisapaiaina o a tatou meaalofa ma taleni ua tuuina mai e faatagaina foi i tatou e faailoa atu le manaomia mo le fesoasoani ma le lagolagoina mai meaalofa ma taleni ua maua e isi.
O le loto faafetai o se mataupu faavae mamana:
“Ia e faafetai atu i le Alii lou Atua i mea uma” (MF&F 59:7).
O lenei mau o lona uiga tatou te faaleo atu le agaga faafetai mo mea o loo tutupu, e le gata i mea lelei i le olaga ae faapea foi le faafeagai ma luitau o le olaga na e faaopoopo i lo tatou aafiaga ma le faatuatua. Tatou te tuu atu o tatou olaga i Ona aao, ma le iloaina o mea uma e tutupu e mo lo tatou aafiaga.
Pe a tatou faapea atu i le tatalo, “Ia faia Lou finagalo,” o loo tatou faaleoina atu moni lava lo tatou faatuatua ma le loto faafetai ma faailoaina atu o le a tatou taliaina soo se mea e tupu i o tatou olaga.
Tau ina ia tatou lagonaina le loto faafetai moni mo le agalelei o le Atua mo faamanuiaga uma ua tuuina mai ia i tatou ma faaleoina atu na lagona o le faafetai i le tatalo i lo tatou Tama Faalelagi.