O Le Faatalitalia o se Masaga, Mauaina o le Vavega

Saunia e Cheryl Lapating-La Torre

E alala le tusitala i Filipaina.

Sa ma faapea o le a sologa lelei mea uma i o maua olaga, ae na vave ona oo mai ni faafitauli ma sa ou fefe po o a nisi mea e ono faaletonu.

I se tasi po a o ou matamata i talafou, sa i ai se mea na faateia lau vaai. Sa ou iloaina le tagata failipoti o se tasi o tagata o lau vasega i le kolisi. Na ia ausia lana miti o le avea ma se tagata faasalalau o talafou!

“Ae a au?” Sa ou fesili ia te au lava. “O le a se mea ua ou ausia?” Sa ou tilotilo atu i le pepe o momoe i o’u lima ma mafaufau e uiga i mea na tutupu o le tolu tausaga ua mavae.

Sa ou mafaufau lava i taimi uma o le a ou faigaluega, ae ina ua fanau le ma tama teine muamua ma lo’u toalua, o Charles, sa suia mea sa ou faamuamuaina. Sa ou faamavae i la’u galuega e tausia o ia. Sa ma faatuatua ia Iesu Keriso faapea a ma totogia lava le ma sefuluai ma usiusitai i poloaiga, o le a lelei mea uma.

Sa sologa lelei lava mea uma seia oo i se tasi aso, na faamalolo mai ai Charles mai lana galuega. Sa ma faatuatua o le a manuia i maua, ae sa ma iloaina sa manaomia ona ma faia se faatinoga. Sa ma filifili e tatau foi ona sue sau galuega, o lea sa amata ai ona sue ni ma galuega ma Charles. Ina ua mavae ni nai vaiaso, sa faafaigaluegaina au o se tali telefoni. Sa ou le fiafia i le tuua ai o la’u pepe iva masina i se tausi tama i aso uma, ae o se tali sili lea mo i maua.

I le na o le tasi le masina i la’u galuega, na ou iloa ai ua ou maitaga. O le mea e lelei ai, e lei umi ae maua le galuega a Charles. E le tele se totogi, ae na fesoasoani. Mo sina taimi sa ma lagona le agaga faafetai.

Sa matuai faigata lava lo’u maitaga, ma sa ou faamavae i la’u galuega. I lo’u siaki faalemasina, sa faateia i maua i le iloa ai e masaga lau fanau. Sa ma fefefe ma Charles, ae sa ma faalagolago i le Tama Faalelagi.

E tusa ma le tolu ma le afa masina i totonu o lo’u maitaga, sa ou ala ae i luga ua ou piliki. Sa ou faapea o le a faaletonu lou maitaga, o lea sa ou alu ai i le falemai. Sa manuia ia pepe, ae na fai mai le fomai e tatau ona faataotolia au i le moega mo le vaega o totoe o le maitaga.

Sa amata ona matua faigata ia mea. O pili o le falemai na leai ai ni tupe ia ma teugatupe, ma sa le lava le tamai totogi o Charles e faatau ai mea matou te manaomia. Sa ou lagona le faatauvaa. Sa le mafai ona ou fesoasoani e saili ni tupe pe tausi ia Chevy. O nisi taimi e galo ai ia te au o loo ou tauaveina ni fanau agaga faapitoa se toalua. Sa ou aioi atu i aso ma po taitasi i lou Tama Faalelagi mo se toomaga. Sa ou fefe i se isi mea e ono faaletonu. Ae e tasi se manatu e toe foi mai pea lava pea i lo’u mafaufau: o loo soifua le Tama Faalelagi ma Na te silafia mea tatou te manaomia.

Sa tauivi foi Charles, ae sa ia tumau malosi pea. Sa ia fesoasoani ia te au, ma tausia Chevy e faaopoopo i luga o lana galuega. O ana faamanuiaga faaleperisitua na faamanafanaina au, ma faamalosia au e lona alofa. Sa ma fefefe, ae sa ma fetaiai faatasi ma lenei suega fou.

Sa ou faia le mea sili e talia ai le mea na tupu. Nai lo le faaaluina o le taimi i le faia o mea e le aoga, sa ou faitau i tusitusiga paia, mekasini a le Ekalesia, ma tusi lelei. Sa ou usuina foi ni viiga—“Le Faavae Malosi” (Viiga, nu. 45) na faapitoa lava ona faia se eseesega tele. Na ou latalata atili atu ai i lo’u Faaola. Sa ou iloaina le tele o mea na tatau ona ou faafetai ai e ui lava i o matou tulaga.

A o gasolo pea ia aso, sa ma lagonaina le aao o le Atua o galue i o maua olaga. Sa oso ae i soo se mea ia vavega tetele ma laiti. Sa totogiina e o maua aiga ma uo nisi o a matou pili ma faatauga. Sa ou lagonaina lo latou alolofa ma popolega mo lo matou aiga. Sa tofia e le au peresitene o le Aualofa se tasi pe toalua foi uso e asia au i aso taitasi. Sa latou aumaia ni faatauga o meaai, kukaina ma tapenaina le fale, tausia Chevy, faasoa mai ni mafaufauga faaleagaga, ma faamalosiau ia te au. Sa latou tatalo mo lo’u manuia atoatoa ma le saogalemu faifai pea o le masaga. Matou te lei fiaaai. E le iloa e nei tuafafine le auala na fesoasoani ai a latou auaunaga ia te au e tauave lau avega. Ina ua oo mai le taimi, sa faafaigofie e le Faalelagi lo’u fanauga, ma sa maloloina uma teineiti e toalua.

Ua tele tausaga talu ona mavae na taimi faigata o o maua olaga, ae e lei i ai lava se aso ma te lei lagona ai le alofa o le Atua. Ua sili atu le lelei o o maua tulaga tau tupe i le taimi nei, ma ua tuputupu ae le ma fanau ina ia atamamai ma talenia. Ua ma malolosi atu ma sili atu ona saunia lelei mo luitau o le lumanai aua ua ma iloa e faamanuia e le Tama Faalelagi Ana fanau i Lona lava taimi ma e Na te le tuulafoaia i latou e aunoa ma se fesoasoani po o le faamafanafanaga. O le olaga e le o se malaga faigofie, ae o le a i ai pea le Atua e faatasi ma i tatou ma taialaina i tatou.