Poloaiga = Alofa
O le a le mea e faia e poloaiga i le alofa?
Pe a e mafaufau e uiga i poloaiga, atonu e te mafaufau i papa maa, tulafono, tuaoi, manaoga, po o mea e manaomia. Atonu e te le mafaufau loa lava i le alofa. O le a le mea e faia e poloaiga i le alofa?
Ia, o mea uma a.
Ona e Alofa o Ia Ia i Tatou
Manatua ao e laitiiti ma e lei faatagaina e ou matua oe e taalo i se auala pisi? po o lo la taumafai ia tele atu fualaau fai sua e te aia po o le alu vave e moe nai lo le mea na e manao i ai?
Atonu na e le malamalama pe aisea na la fai ai le tele o tulafono. Ma atonu na e le fiafia i taimi uma ia i laua, foi. Ae o lenei ua e matua atu, pe mafai ona e vaai pe aisea na tuu atu ai e ou matua na tulafono uma?
Aua sa la alolofa ia te oe ma na mananao i le mea sili mo oe.
I le avea ai ma se matua e sili ona atoatoa, ua tuu mai e le Tama Faalelagi ia i tatou ni tulafono po o ni poloaiga mo le mafuaaga lava e tasi: e alofa o Ia ia i tatou ma e finagalo mo le mea sili mo i tatou. Ma e sili atu foi nai lo lena, e finagalo o Ia ia i tatou ia avea faapei o Ia ma maua uma mea o loo ia te Ia.
Na faamatala mai e Elder Dallin H. Oaks o le Korama a Aposetolo e Toasefululua lenei mea i se faataoto:
“Na iloa e se tama mauoa afai na te tuuina atu ana oa i luga o se tamaitiiti o le e lei atiina ae le atamai ma le malosi na manaomia, atonu o le a maumau ia tofi. Na fai atu le tamā i lona atalii:“
‘O au mea uma ua i ai, ou te manao e tuuina atu ia te oe—e le gata i lo’u tamaoaiga, ae faapea foi lou tulaga ma le tauleleia i luma o tagata. O na mea ua ia te au e faigofie ona ou avatu ia te oe, peitai o le ituaiga tagata ua i ai au, o le mea lena e tatau ona maua e oe lava ia. O le a e agavaa mo lou tofi e ala i lou aoaoina o mea sa ou aoaoina, ma ola e pei ona ou ola ai. O le a ou tuuina atu ia te oe tulafono ma mataupu faavae na ou maua ai le poto ma lou tauleleia. Ia e mulimuli i au faataitaiga, ia ausia mea ua ou ausia, ona avea ai lea o oe e faapei o au ma o mea uma foi ua ia te au o le a fai ia mou.’”1
E pei o le tama i le tala a Elder Oaks, e finagalo le Tama Faalelagi ia i tatou ia maua mea uma ua ia te Ia ma avea ma mea uma o i ai o Ia. O Ana poloaiga e pei o maa e laa ai i luma e fesoasoani ia i tatou e aoao ma tuputupu ae ai ma avea faapei o Ia.
“Ou te tuu atu ia te outou se poloaiga fou, … pe, i se isi faaupuga, ou te tuu atu ia te outou ni faatonuga i le ala tou te amio ai i ou luma, ina ia liliu ai ia te outou mo lo outou faaolataga” (MF&F 82:8–9).
E pei o se tamaitiiti e le malamalama pe aisea e le faatagaina ai e taalo i le ogatotonu o se auala pisi, ma matautia, atonu tatou te le malamalama i taimi uma i le mafuaaga i tua atu o poloaiga po o tulaga faatonuina faapitoa. Ae afai tatou te malamalama ua tuuina mai e le Atua ia i tatou poloaiga aua e alofa o Ia ia i tatou ma finagalo e taitai i tatou ina ia avea i tatou faapei o Ia, o le a faigofie atu ona usiusitai ia te Ia.
Aua Tatou Te Alolofa Ia Te Ia
E mafai ona e mafaufau i poloaiga taitasi o se faailoga tele “Ou te alofa ia te oe!” mai le Atua. Ma afai tatou te filifili e tausi Ana poloaiga, e pei o loo tatou toe faapea atu “Ou te alofa ia te oe!” ia te Ia.
Na faigofie lava le faamatalaina e Peresitene Dieter F. Uchtdorf, le Fesoaoani Lua i le Au Peresitene Sili, ina ua ia taliina le fesili, “Aisea e popole ai fua i poloaiga a le Atua?”
“Tatou te usiusitai i poloaiga a le Atua—ona o lo tatou alolofa ia te Ia! …
“… O lo tatou usiusitai i poloaiga a le Atua e sau mai se taunuuga masani o lo tatou alolofa ma le lotofaafetai le mafaamutalia mo le lelei o le Atua.”2
Ua tuuina mai e le Tama Faalelagi ia i tatou mea uma ua tatou maua—mai le malosi e gaoioi ai e oo i le ea tatou te manavaina—ma pau lava le mea ua Ia finagalo mai ai o lo tatou tausia lea o Ana poloaiga (tagai Mosaea 2:21–22). O le auala sili lea e mafai ona tatou faaalia ai lo tatou alofa ma le loto faafetai ia te Ia.
Na fetalai mai ai Iesu Keriso lava ia (tagai Ioane 14:15).
Aisea e tuu mai ai e le Tama Faalelagi ia i tatou poloaiga? Ona e alofa o Ia ia i tatou.
Aisea tatou te tausia ai Ana poloaiga? Aua tatou te alolofa ia te Ia.
Poloaiga e tutusa ma le alofa.
O le faigofie lena.