Manatunatuga
O Loo Pese Sister Mabel
O le fiafia o Sister Mabel mo le pese na matuai le mafai ona taofiofia.
O lau uo mamae na sosoa mai lona tulilima i lou itu e taofia au mai le ata faamaela. Na ma i ai i le sauniga faamanatuga, ma na, matou pepese i le viiga o le faamanatuga.
Ae na faigata ona le ata, ma o Pat foi na faigata nai lo au ona taofiofia lona ata.
Na 15 o ma tausaga, ma na ma iloa mea uma. Na ma iloa o tagata uma i la matou uarota na tatau ona atoatoa—ae lei faapena. Na ma iloa o lauga i le sauniga faamanatuga na tatau ona musuia—ae na tele lava ina le manaia. Ma na ma iloa o le tagata pese e sili ona leaga le leo i le lalolagi na saofai i totonu o i matou, na faaleagaina viiga na tatau ona aumaia o matou mafaufauga faaleagaga—ae na masani lava ona auina atu i le isi itu.
Na ona mafai lava ona ma pupunia o ma taliga ma faamimigi. Na foliga mai e fesoasoani sina ata mai lea taimi i lea taimi.
Na ma le mautinoa po o Sister Mabel (lona igoa muamua, ma na o le pau lea o le igoa ou te manatua na faaaogaina e soo se tasi mo ia) na iloaina na faatiga taliga le faalogo ia te ia ma e lei popole pe na ia mautinoa lava le aafiaga o lana pese ia i matou uma. Atonu o le mea moni e leai lava se tasi na talanoa atu ia te ia i lena mataupu. E ui lava ua matua, ae o ia o se tamaitai faigata. E le o le lapoa, ae o le malosi. O mea uma na ia faia na malosi ma leotele. Ae maise lava lana pese.
O lona fiafia e pese na i ai se aafiaga e le gata i pese a la matou aulotu ae faapena foi i le aufaipese a le matou uarota. O lona naunautai sa lei muta ai iina. E ui ou te le manatua o lana pese na lei taofiofia lava i le aulotu, i le aufaipese na saoloto lava ia, na oo i luga ma lalo ma ou te le mailoa pe sa ausia e se tamaitai pese lauiloa i le lalolagi. Pe manao foi i ai.
Ia, ua leva lava lena taimi. I tausaga talu mai lena taimi, na maliu Sister Mabel. Na ma taufai o eseese ma Pat i o ma ala. Ma o au, lava ia, ua iloaina ou te lei iloaina lava le tele o mea i le 15 e pei ona ou manatu ai. Ou te talitonu ua ou aoaoina ni nai mea e uiga i le olaga—ma le pese—i le aluga o le 50 tausaga ua tea.
Ua ou iloaina o le olaga e manaomia le ola ma le naunautaiga ma le malosi. O minute uma o se oa, ma o le taimi lava e uma ai, ua uma e faavavau, ma e manatua i ni nai manatunatuga vaivai. Ua ou iloaina afai e te auauna atu i isi pe tapuai i le Alii, e sili lou fiafia ma e sili le aoga pe a e faia ma le olioli uma ma le malosi e te mafaia.
Ua ou aoaoina e leai se tasi i lenei itu o le veli e atoatoa. Pau lava le mea e finagalo ai le Alii mai ia i tatou o o tatou loto, manatu, mafaufau, ma le malosi—i le maualuga e mafai ona tatou ofoina atu. Na te taliaina a tatou taulaga e le taofiofia, po o le a lava le leaga atonu e i ai, o le fua atoatoa o lo tatou naunautaiga.
E malie lava, i lou manatu, i lou iloaina foi e le o au o se tagata pese e sili atu nai lo le tulaga na i ai Sister Mabel. Ou te faamoemoe o ou uso a tagata i le uarota o le a sili atu le alolofa mo au nai lo lou alofa mo Sister Mabel. Ana faapea o i ai pea o ia iinei, ou te valaaulia o ia e pese mo au. Ou te misia lona leo agelu.