O le Tulaga Faamatua o se Tiute Paia

Ia suesue ma le agaga tatalo lenei savali ma saili mo le uunaiga ia iloa mea e faasoa atu. O le a faapefea e le malamalama i le “O Le Aiga: O se Folafolaga i le Lalolagi” ona faateleina lou faatuatua i le Atua ma faamanuiaina ai i latou e te tausia i le faiaoga asiasi? Mo nisi faamatalaga, alu i le reliefsociety.lds.org.

Na faatuina e le Tama Faalelagi aiga e fesoasoani ia i tatou e aoao mataupu faavae sao i se siosiomaga agaalofa. Na saunoa mai Peresitene Thomas S. Monson: “Faamalo atu i si au tama ma fusi atu ia te ia: fai i ai, ‘E sili atu lo’u alofa ia te oe; ia faaalia e le aunoa lou agaga faafetai. Aua nei sili atu le taua o se faafitauli e foia nai lo se tagata ina ia alofaina.”¹

Na aoao mai Susan W. Tanner, o le Peresitene aoao talu ai o Tamaitai Talavou: “O lo tatou Tama Faalelagi ua faataitaia le faatulagaga e ao ona tatou mulimuli ai. E alofa o Ia ia i tatou, aoao i tatou, e onosai ia i tatou, ma tuuina mai lo tatou saolotoga. … O nisi taimi o le aoaiga, o lona uiga ia “aoao atu,” e fenumiai ma le faitioina. O fanau—e faapea foi i tagata o soo se tupulaga—e mafai ona faaleleia ia amio ona o le alofa ma faamalosiauga nai lo le saili masei.”²

“Afai tatou te faia ma le faamaoni tatalo faaleaiga, suesuega o tusitusiga paia, afiafi faaleaiga, faamanuiaga faaleperisitua, ma le tausia o le aso Sapati,” na saunoa ai Elder Quentin L. Cook o le Korama a Aposetolo e Toasefululua, “o a tatou fanau o le a … saunia i latou mo se aiga e faavavau i le lagi e tusa lava po o a mea e tutupu ia i latou i se lalolagi faigata.”³

Mau Faaopoopo

1 Nifae 8:37; 3 Nifae 22:13; Mataupu Faavae ma Feagaiga 93:40; 121:41

Tala Mai E o Soifua

“I se tasi afiafi sa ou faitau ai i se nusipepa ae sau se tasi o atalii o lou atalii ma nofo latalata mai ia te au,” na saunoa mai ai Elder Robert D. Hales o le Korama a Aposetolo e Toasefululua. “Ao ou faitau, sa ou fiafia i lou faalogo atu i lona leo malie ao ia talatalanoa mai. Vaai faalemafaufau i lou maofa, i se taimi mulimuli ane, na ia oso mai ai i le va o au ma le pepa. Na ia uuina ou foliga i ona lima ma oomi mai lona isu i lou isu ma fesili mai, ‘Tama matua! O e i ai iina?’

“… O le i ai iina o lona uiga o le malamalama i loto o le autalavou ma fesootai ma i latou. Ma o le fesootai ma i latou o lona uiga e le na o le talanoa ma i latou ae o le faia o mea faatasi ma i latou. …

“E tatau ona tatou fuafua ma faaaoga avanoa uma o taimi o aoaoga. …

“… O le umi ou te ola ai, o le tele lea o lou iloa o le taimi o aoaoga o lou talavou, ae maise lava aoaoga na tuuina mai e ou matua, sa faavasega ai lou olaga ma le ituaiga tagata ua avea ai au.”⁴