Faatino le Tapuaiga Mama

Saunia e Elder Don R. Clarke

Na auauna atu o se tasi o Fitugafulu o le Pulega Aoao mai le 2006 i le 2015

Mai se saunoaga i le faigalotu, “Pure Religion,” na tuuina atu i le Iunivesite o Polika Iaga–Idaho ia Ianuari 13, 2015. Mo le saunoaga atoa i le gagana Peretania, alu i le speeches.byu.edu.

Afai e te manao e maua le fiafia, lagona le Agaga Paia, ma ola latalata atili i le Faaola, ona faatino lea o le tapuaiga mama.

I le lua tausaga talu ai, o se alii talavou o le a ou faaigoa ia John na sau i lou ofisa i le faatoa ia foi mai i lana misiona.

“Elder Clarke, ou te manaomia lau fesoasoani,” na ia fai mai ai ia te au ma le popole tele. “Na ou fiafia i lau misiona. Sa suia ai au. Ae ui i lea, ua ou le mauaina nisi o na lagona paia ma faapitoa na ou lagonaina i le misiona. O le a se mea e mafai ona ou faia e lagona ai pei ona ou lagona i le misiona?

Ua ou vaaia le tupu o lenei mea i le tele o taimi. O le mea na ia fesili mai ai o le, “O le a se mea e mafai ona ou faia ia maua ai le fiafia, lagona le Agaga Paia, ma latalata atu ai i le Faaola?” O se fesili lenei e tatau ona tatou fesiligia i aso uma.

I lena aoauli i lou ofisa, na ma sue ai i le Iakopo 1:27 ma faitau, “O lenei lava le amio Atua e lelei ma le faamaoni i luma o le Atua o le Tama lea, ina ia tauasiasi atu i e matua oti o fafine ua oti a latou tane i o latou tiga, ia leoleo foi o ia ia te ia ina nei pisia mai o ia i le lalolagi.”

Ona ma faitau lea Alema 34:28: “Afai tou te liliu ese e ua le tagolima, ma e ua le lavalava, ma le asiasi atu i e ua mamai ma puapuagatia, ma le faasoa atu a outou mea, pe afai ua i ai ia te outou ni mea e faasoa atu ia i latou o e ua tutu le tagolima—ou te fai atu ia te outou, afai tou te le faia se tasi o ia mea, faauta, ua le aoga lau tatalo, ma ua leai se mea e te maua mai ai, ma ua tusa outou o ni tagata pepelo o e ua faafitia le faatuatuaga.”

Ona ma iloiloina lea o le tala i le Tusi a Ioane lea na o ai Peteru ma isi soo e fagogota ma na leai se ia na latou maua ae ina ua tau atu e le Faaola ia i latou e tuutuu atu la latou upega i le isi itu o le vaa ma maua ai ia e 153. Ina ua uma ona latou aai, na talanoa Peteru ma le Faaola. Na silafia e le Faaola o loo Ia faatonuina lenei perofeta ma le peresitene o le a i ai i le Ekalesia mo se tasi o taimi mulimuli.

“Pe e te alofa mai ia te au?” na fesili ai le Faaola.

Na tali atu Peteru, “Ioe, le Alii e; ua e silafia ou te alofa ia te oe.”

Ona fetalai atu lea o le Faaola, “Ia e fafaga i au tamai mamoe.”

Na toe fesili faalua le Faaola i le fesili lava lea e tasi ona faatonu atu lea: “Fafaga au mamoe” (tagai Ioane 21:3-17).

Na faatonuina moni lava Peteru ia faatino le tapuaiga mama, po o le tausia o tagata. O le perofeta a le Atua i le aso e popole foi ma alofa i tagata. O Peresitene Thomas S. Monson o se faataitaiga maoae o se tasi e faatinoina le tapuaiga mama. Ua ia faaaluina lona soifuaga atoa i le alofa ma le tausia o tagata.

Ua ou vaaia le tele o faifeautalai ua maea misiona e pei o lau uo o John. Afai e te fesili ia i latou pe aisea na latou fiafia ai i a latou misiona, e toeitiiti lava o taimi uma latou te fai mai ai ona o lo latou alofa mo tagata. O le aso e amata ai e faifeautalai ona sili atu le popole mo isi nai lo o i latou lava, latou te fiafia ai. E faapena mo i tatou uma lava. O o tatou olaga o le a sili atu le fiafia pe afai tatou te tausia ma alolofa i isi.

O le faafeagai o le tausia o isi o le mafaufau na o au lava: lau taavale, lau suesuega, lau galuega, o ou faafitauli. Pe afai o taimi uma e faatatau ia i tatou, o lo tatou fesootaiga ma le lagi ua le malosi e pei ona tatau ai.

Na ou tau atu ia John afai na te faatinoina le tapuaiga mama, o le a ia fiafia ma lagona e pei ona ia lagonaina i lana misiona. E faapena, afai e te manao e maua le fiafia, lagona le Agaga Paia, ma ola latalata atili i le Faaola, ona faatino lea o le tapuaiga mama. Mai mau o loo i luga ua tatou aoao ai faatinoga autu e fa na e mafai ona faamatalaina o le tapuaiga mama.

1. Asiasi ma Tausia Fafine ua Maliliu ia Tane

Na toe foi John i le kolisi ma faatino mea na ma talanoaina. Mulimuli ane na ia auina mai ai se imeli lea na ia faasoa mai ai lona aafiaga i le faitauina o tala musuia mai mekasini a le Ekalesia i tagata matutua i se fale e tausia ai i latou.

“E toatele tagata na lagonaina le tele naua o le alofa ma le lagolago mai le Faaola ao molimau atu le Agaga i upumoni faigofie ma molimau,” na ia tusi ai. “Ou te lei iloaina na ou mafaia ona lagona se alofa faapea mai ni tagata ese ma mo i latou na itiiti lava sou iloaina. Ae na ou lagonaina le alofa o le Faaola mo i latou, mo na ituaiga o agaga. Na foliga manino mai ia te au o le a ou feiloai i nei tagata—ua matuai aafia lava i mai faalemafaufau ma faaletino—i le isi olaga. O le a ou vaai i a latou tane ma ava, na vaavaaia i latou mai le isi itu o le veli. Na ou lagona moni lava le faatasi mai o lou tamamatua—ou te lei vaai lava i ai—ao ma nofonofo ma lou tinamatua, ma o lona agaga [Tamamatua] na faamalosia ai au ma lagolagoina ai au. Na ou iloa sa ia faafetaia lau asiasiga puupuu.”

Na ia faaauau: “O ai na te iloaina pe ou te maua lena alofa mutimutivale agamalu. E foliga mai e matuai leai lava se uiga o le sau i le fale i le mavae ai o se mea faapena ma tau lava o le ki o le TV pe fiafia foi i se isi lava mea. Na suia ai au i le iloaina o nei aafiaga agamalu e maua i taimi uma lava o le aso ao tatou, tauivi e taulai atu ma fesoasoani atu i isi i se auala, i le avea ai o ni Au Paia.”

E mafai foi ona e faia lenei mea, ma o le a faamanuiaina oe e le Alii e pei ona Ia faamanuiaina John.

2. Fesoasoani i Fanau Matua Oti

E toatele fanau ua matua oti i le lalolagi atoa. Pe le ofoofogia ea pe afai e mafai ona tatou fesootai atu pe tusi soo atu i se tasi o i latou?

Ina ua foi mai le ma tama, o Nate, mai lana misiona, na tutusa ona lagona ma lau uo o John. Na filifili Nate e ofo fua atu e avea ma fautua i se polokalama lena e faipaga ai tagata matutua ma tamaiti e manaomia le lagolago i se sootaga e faia i le tulaga taitoatasi. O lena auaunaga na suia ai lona aafiaga i le kolisi. O lenei ua faaipoipo o ia, o Nate ma lona toalua, o Carla, ua toe “vaetamaina” foi e ala i le polokalama. O se faamanuiaga tele mo i laua i le la faaipoipoga le faasoa atu o mea la te maua ia i latou e manaomia le fesoasoani.

Ao ma auauna atu ma lou toalua, o Mary Anne, i le Misiona o Bolivia Santa Cruz, na i ai se ma faifeautalai o se tama na matua oti. Na leai sona aiga. Na tofia o ia e le Alii e avea ma taitai ia Elder Hawkins. Ou te le manatu o ia o se taitai sili, ae o Elder Hawkins o se soa sili mo se tama matua oti ua avea ma faifeautalai a le Alii.

Na tusi atu matua o Elder Hawkins i lenei faifeautalai i lana misiona ma faaauau pea ona tusi atu ia te ia mo le 15 tausaga ua tuanai. Ona o Elder Hawkins ma lona aiga, o lenei tama matua oti na alofaina ma tausia ma ua faaipoipo nei ma le fiafia, faigaluega, ma toaga i le talalelei a Iesu Keriso. E mafai ona tatou fesoasoani uma lava e suia fanau matua oti.

3. Tausiga o e Matitiva ma e le Tagolima

Ua faamanatu mai pea e tusitusiga paia ia i tatou le taua o le fesoasoani i e matitiva ma le tagolima. Ua ia i tatou uma lava lenei tiutetauave.¹ O le tasi ala e mafai ai ona tatou faateleina la tatou fesoasoani i e matitiva ma le tagolima o le totogi lea o se taulaga anapogi limafoai. Na saunoa mai Peresitene Polika Iaga (1801–77):

“O le tausaga muamua na ou sau ai i lenei vanu na le lava ni au falaomata mo lou aiga seia oo i le seleselega … , ma na o mai tagata i lou fale i aso uma mo falaoa. Sa ou faavauvau [ai] i se tasi aso; na ou alu i lalo i le fale tuai ma e oo atu i le taimi na ou toe foi mai ai i le fale na faamaloloina atoatoa lava au. Na ou fai atu i lou toalua, ‘Aua nei tuu atu i se tagata e sau iinei mo meaai e aluese atu e leai se mea, aua afai e te faia faapea o le a tatou puapuaga ae lei oo i le seleselega; ae afai e te tuu atu i tagata taitasi e o mai o le a lava tatou meaai. …

“Ou te manao e faaauau le faia pea, ina ia lava ai pea lau falaoa, aua afai ou te le faia o le a le lava.

“Pe e te talitonu i lena mataupu faavae? Ou te iloa e moni, aua ua ou faamaonia i le tele o taimi.”²

O le aafiaga lenei na tuu i luga i se uepisaite Kerisiano e se fomai i Kolorato, ISA, lea na faatoa oo atu i se fale kesi ina ua faaletonu lana taavale ma pe ai. Ao ia saunia e valaau i se taavale toso taavale, na ia vaaia se tamaitai, o lana taavale tuai na tu i le fale kesi, ua sulu ma pau i lalo.

“Na ou alu atu e vaai pe o afaina o ia. Ina ua ou taunuu iina, na foliga mai na sili atu lona afaina i masusu o le tagi nai lo le pau; o ia o [se] tamaitai talavou na foliga lelava lava ma ni lio uli i lalo o ona mata. Na pau sana mea totino ao ou fesoasoani ia te ia e tu i luga, ma na ou aveina i luga ma tuu atu ia te ia. O se lima sene.

“I le taimi lena, na manino mai mea uma mo au: o le fafine o loo tagi, o le [taavale] tuai ua tumu i mea totino ma tamaiti e toatolu i tua (toatasi i se nofoa taavale), ma le pamu kesi ua faitauina [I.S.] $4.95. Na ou fesili ia te ia pe o afaina ma pe manaomia se fesoasoani, ae na faaauau lona fai mai, ‘Ou te le manao e vaai mai lau fanau ia te au o tagi.’”

I le malamalama ai i lona tulaga, na ave ae e le fomai lana kata fai faatau, faatumu lana taavale i le kesi, ma faatau taga meaai tetele e lua ma ni pepa meaalofa mo ia ma lana fanau i se fale aiga o meaai i talaane o le fale kesi.

“Na ia tau mai lona igoa, ma e nofo i Kansas City [Missouri, ISA],” na ia fai mai ai. “O lana uo tama [na] aluese i le lua masina talu ai, ma sa le lava lana faasoa. … I le popole tele na iu ai ina [ia] valaau i ona matua, na te lei toe talanoa i ai mo le lima tausaga. La te nonofo i Kalefonia ma na fai mai e mafai ona ia sau latou te nonofo ma taumafai ina ia toe tutoatasi iina. O lea na ia teuina ai ana mea uma i le taavale.”

Na opo mai o ia e le fomai ma ofo atu se tatalo mo lona saogalemu i le auala. Ao ia savali i lana taavale, na fesili mai le tamaitai, “Pe o oe e pei o se agelu pe a?”

Na tali atu le fomai, “O nisi taimi e faaaoga e le Atua tagata masani.”

Ona ia matauina lea: “Sa matua ofoofogia le avea ma se vaega o se vavega a se tagata. Ma e moni lava, …ina ua ou oo i totonu o lau taavale na ola loa ma na ou taunuu ai i le fale e aunoa ma se faafitauli. O le a ou tuuina i le fale enisinia taeao e siaki, ae ou te masalo o le a le maua e le enisinia se mea o faaletonu.”³

Pe faatuatuaina e le Alii i tatou e avea ma tali i se tatalo a se tasi? Pe mafai ona Ia faamoemoe ia i tatou e mulimuli i uunaiga a le Agaga Paia? O le tele ona tatou mulimuli i uunaiga a le Agaga, o le tele foi lea o avanoa o le a tuu mai e le Alii ia i tatou e avea ma tali i se tatalo a se tasi.

4. Fafaga Ana Tamai Mamoe ma Mamoe

Ina ua faia e Iesu Lana talanoaga ma Peteru, o Lana fautuaga muamua lava o le, “Fafaga au tamai mamoe.” E silafia e le Faaola afai tatou te fafaga tamai mamoe, tatou te le toe tau saili mo mamoe ua leiloloa. O nisi o tatou atonu e i ai ni uso ma tuafafine laiti, fanau a uso ma tuafafine, po o isi tagata tatou te iloa e manaomia le fesoasoani. E mafai ona avea i tatou ma faataitaiga maoae mo i latou, ma tau ina ia tatou maua tamai mamoe na e manaomia la tatou fesoasoani.

Pe o le a outou sue ma fesoasoani i se tamai mamoe? Pe o le a e, o se leoleo mamoe, ona lava le faatuatuaina e tausia tamai mamoe ma mamoe, e pei ona finagalo ai le Faaola ia i tatou?

O le fesili na fai e le Faaola ia Peteru e mafai ona fesiligia ai i tatou taitoatasi: “Pe e te alofa mai ea ia te au?” Ao tatou faatinoina le tapuaiga mama i le asiasia ma tausia fafine ua maliliu a latou tane, fesoasoani i fanau ua matua oti, tausia e matitiva ma le tagolima, ma fafaga Ana tamai mamoe ma mamoe, o le a tatou faaali atu i le Faaola tatou te alolofa ia te Ia! Ao tatou faia lenei mea, o le a tatou maua le fiafia, lagona le Agaga Paia, ma lagona le latalata atili ia te Ia.