O La Tatou Avanoa
Na Silafia e le Atua Lou Faanoanoa
Saunia e Danelys W. Rodriguéz, Dominican Republic
I se tasi aso Sa i le lotu na ou iloaina ai o lou taimi faatasi ma le polokalama a Tamaitai Talavou ua toeitiiti uma ma ua lata ona ou faatasi ma talavou nofofua matutua. Na ou faanoanoa aua na ou iloa o mea o le a le toe tutusa. Ina ua uma le Aoga Sa, na ou taumafai ia fiafia, ae sa le mafai ona ou fiafia. Na ou taumafai e tau ia te au lava ia faapea e le finagalo le Tama Faalelagi ia ou lagona le faanoanoa ae o le olioli (tagai 2 Nifae 2:25).
Na tau amata ona ou tagi i le tauau o lau uo i le alasavali ae oo mai le failautusi a le uarota ia te au ma fai mai, “Sister Danelys, o le meli lea!” Na ia tuu mai ia te au se teutusi paepae o loo i ai na o lou igoa i luga. Na ou fia iloa po o le a, o lea na ou fesili ai i le failautusi po o ai na auina mai. Ao ia savali ese atu, na ia tau mai ia te au na aumai le peteriaka ma o se kopi o lou faamanuiaga faapeteriaka. Na ou tagi, ae o ou loimata o loimata o le olioli aua na ou iloa na silafia e le Atua lou faanoanoa ma na saunia se ala mo au ia maua ai le olioli i lou faanoanoa. O lou faamanuiaga faapeteriaka na iu ina taunuu mai ua tusiaina, i le taimi tonu lava na sili ai ona ou manaomia ai.
Ina ua ou taunuu i le fale ma faitau i ai, na ou toe tagi ma tatalo ma faafetai i le Atua mo le faamanuiaga ma le fesoasoani ia te au ia manatua lou faamanuiaina tele i le avea ai o Sona afafine ma le i ai o le malamalama o le talalelei e faavavau i lou olaga.
Pe a oo mai taimi faanoanoa, e ui atonu ou te le malamalama i ai i lena taimi, ou te iloa o le Atua e mafai ona fesoasoani ia te au ia maua le fiafia. Na ou aoaoina lenei mea e ala i le alofa o le Atua na ofoina mai ia te au i lou olaga. Ua Ia ofoina mai lenei alofa ia i tatou taitoatasi, ma o la tatou tiute le taliaina o lenei lagona ofoofogia. E mafai ona tatou faatoilaloina faigata i le taitaiga a le Atua. E mafai ona tatou ataata ma ia fiafia.
Ata na tusia e Ben Simonsen
O Le Mau e Sili Ona Ou Fiafia i Ai
Saunia e Kwamena Koomson, Kana
O lenei mau ua fesoasoani ia te au e malamalama ai ua na o le faatotonugalemuina o o tatou olaga ia Iesu Keriso e mafai ai ona tatou faatoilaloina le fili. E tusa lava pe oo mai faigata ia i tatou, afai ua fausia i tatou i luga o le papa o Iesu Keriso, e mafaia mea uma lava.
O lenei mau na fesoasoani ia te au e tumau mausali ai i taimi faigata.
Ou te iloa o loo soifua le Atua ma na Ia auina mai Lona Alo e Toatasi na Fanaua i le lalolagi e togiola mo agasala a tagata.