Au Paia o Aso e Gata Ai
O le Taimi Lea na Ou Faatino Loa
Ata na tusia e Stan Fellows
Na ou faamauina lau tama teine i se nofoa taavale tuai lava. Na faalelava le matou paketi, o lea sa ou faafetai ai mo mea talu ai nei na tuuina mai e isi. Na avea o se nofoa lapoa atu ona o lau tama teine ua matua tele mo lona nofoa sa i ai. Na ou tulimatai atu i le faiga o feau i lena aso matagofie.
Na ma tutu i le ma galuega muamua, o le potutusi. Ao ou tatalaina lau tama teine, na ou matauina se fafine Latina o paka i talaane o maua. O se pepe, e le mafai ona nofo lelei, na saofai tonu lava i le nofoa i tua, o loo faapupuu pei se tamai polo. Na tauivi le tina laitiiti e faamau ia mau lelei le fusipau mo lona tamai tino. E lua ni ou manatu sa i ai.
“E leai sana nofoa taavale mo lana pepe. E mafai ona ou tuuina atu ia te ia lau nofoa.”
Ona ou toe faamaamulu lea.
“Masalo e le tautala Igilisi o ia. Ou te ono faatiga ia te ia. O lau nofoa taavale ua matua tuai lava; masalo o le a le manao ai o ia. Afai e manao i ai o ia, e faapefea ona ou toe mauaina se isi [nofoa]?”
O lea sa ou le faia ai se mea.
Na ia oso i le nofoa o le avetaavale ma tietie ese atu.
Ae ou te lei taunuu i faitotoa o le faletusi, na siomia au e le salamo. Na ou iloa na ou faia se filifiliga sese, ma ua leai se auala e toe faafoi ai i tua.
Na ou tosoina faitotoa ae lei matala. E lei tatalaina le faletusi. Na ou faaaluina le taimi o isi au galuega i le toe manatuaina o le mea na tupu, na le mautonu i le mea moni faapea ou te lei faia se mea.
Ina ua maea lau galuega mulimuli, na ou filifili e toe taumafai le faletusi. Na ou alu atu i le paka lava lea e tasi muamua. I lou tei tele, na ou vaai ai i le tina lava lea e tasi ma lana tama tama o toe paka i ou tafatafa. Na ou lagonaina le faagaeetia tele i lou loto.
O le taimi lea na ou faatino e aunoa ma se faatali. Na ou tatalaina le nofoa taavale a lau tama ma agai atu i le tina talavou. Sa lei tautala Igilisi. I le faaaogaina o mata, na ou faasino atu i lana pepe ma le nofoa taavale ma lana taavale. Na ma fusia faatasi le nofoa taavale i le taavale. Ao ou faaali atu ia te ia le ala e faaaoga ai, na ou iloaina ai sa ou iloaina le faaSipaniolo e tasi na ou manaomia e iloa: “gracias.”
Na faatumuina lou loto i le faafetai i se Tama Faalelagi alofa mutimutivale mo le tuuina mai ia te au o se avanoa lona lua e fesoasoani i se tamaitai na manaomia le fesoasoani.
Na ou faaopoopo se galuega mulimuli i le lisi—o se faleoloa o oloa tuai lata ane. Na ou faamauina lau tama teine ma tietie atu ma le faaeteete i le faleoloa. I le tulimanu i tua o le faleoloa, i luga o le fola, sa i ai se nofoa taavale—e tutusa lelei ma lena na ou tuuina atu ma e tutusa foi le tuai. Na ou faatauina, i le ofo ma le lotomaualalo i taunuuga o mea na tutupu o le taeao.
E ala i le aoaoga filemu ma le aoga a le Faaola, o le lesona na totoina loloto i lou loto: mulimuli i uunaiga a le Agaga Paia—o le taimi muamua.