O Leo o Le Au Paia o Aso e Gata Ai
Fetaomi i Luma i Taimi o le Toafimalie
Ata na tusia e Allen Garns
O gaoioiga i fafo e pei o le savaliga, tietiega uila, ma le faasee i le aisa o se vaega tele o lou olaga. Talu ai nei, na faateia ai au i le tutusa lelei o lo tatou taimi i le lalolagi i le taimi ou te naunau ai i le malosi i fafo. Ou te manao e taulai atu i le fausiaina o lou malosi ma tomai i le tasi le gaoioiga i le taimi po o se vaitaimi. Ma e ala i lea filifiliga, avanoa, po o le valaaulia, ou te suia ai i se isi mea. E tusa lava po o le a le malosi ma le mautinoa ou te lagona i se ituaiga o faamalositino, e ui, i le sui atu i se gaoioiga fou, ou te lagonaina le vaivai, toilalo e faataunuu au sini, ma lagona le malosi ou te “lei lagonaina muamua.” Ona ou fiafia lea i le ituaiga fou o malosi ma toe fausia le onosai ma tomai e manaomia.
E faapena, i le olaga tatou te mafuli e taulai atu i ni uiga faapitoa. Tatou te lagonaina le mafanafana. Ma e ala i le filifiliga, avanoa, pe valaaulia, o lo tatou taimi toafilemu ma le mafanafana e avea ma vaiaimi o le luitau ma avanoa mo le tuputupu ae.
O le tauiviga ma luitau o le olaga e mafai ona avea o se galuega fita. Ua uunaia e Nifae i tatou, i le faapea mai, “O le mea lea, e tatau ai ona outou fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma. O le mea lea, afai o le a outou fetaomi atu i luma, ma taumamafa fiafia i le afioga a Keriso, ma tumau e oo i le iuga, faauta, ua faapea ona fetalai mai le Tama: o le a outou maua le ola e faavavau” (2 Nifae 31:20).
Mai lea taimi i lea taimi, ou te mafaufau ai oka se matagofie pe ana faapea e tumau ai faavavau i le muai olaga, ma faalogo atu i le Tama Faalelagi ao faigofie lava ona tau mai ia i tatou e uiga i Lana fuafuaga maoae o le fiafia. Ae ui i lea, o lo tatou alualu i luma e manaomia ai se “potuaoga”—lalolagi—lea e mafai ona tatou aafia ai i le olaga faitino mo i tatou lava.
I le aluga o tausaga ao ou molimau atu i le moni ma le manaomia o le fuafuaga a le Tama Faalelagi, o avanoa fou ma o nisi taimi-aafiaga tiga e o mai faatasi ma lenei aoaoga i totonu o lou agaga. E foliga mai tatou te aoao upumoni o le talalelei i lea vaega ma lea vaega, ma toe suesue pea lava mataupu e tasi. O nisi taimi ou fesili ai ia te au lava ia, “O le a le loloto o le a tatou o ai iinei?” Po o le, e pei o le malosi, “E fia isi vaega o maso ou te manaomia ona faamalosia pea?”
Ae, ao suia vaitaimi o le olaga ma suia luitau, ou te iloa o le a saunia e le Alii au faatasi ma aafiaga ou te manaomia. Ma ao ou fetaomi atu i luma, o le a ou aoaoina e avea ia sili atu ona pei o Ia ma toe foi atu i Lona afioaga.