Katak ko jān Jinō
Jān Elder Jairo Mazzagardi
Jān Jiljilimjuonn̄oul eo
Ke iaar rūtto tak, jabdewōt iien eo ewōr jāān ippam̧, jinō ekkā an būki wōnāān ko reddik tata—ko me reno̧kjekjek ak ettoon—im leļo̧k n̄an rikaki eo an kabun̄ eo kōmij jar ie. Eaar kōm̧m̧ane menin ilo aolepān mour eo an. Eaar ba, “Men kein rej an Anij.” Naan kein raar pād ippa jen tōre eo. Ke iaar peptaij ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata āinwōt juon rūm̧m̧an ded, eaar jab pen aō kōļļā juon m̧ōtta jon̄oul kōnke jinō eaar katakin eō n̄an pokake kien in.
Jinō eaar barāinwōt katakin eō bwe in m̧ool, men̄e men ko reppen. Ro ritūrum̧ raar katōk elōn̄ kain leen wōjke im pejtābōļ ko. Jet iien leen wōjke ko kijen rej eddōk tok ilo o̧ro̧r eo. N̄e ij tum̧wi jet iaan leen wōjke ko im būki ļo̧k n̄an jinō. Eaar kalimjōk eō im ba, “Ejjab ad.” Ijjab tōmak. Iaar ba “Ta meļeļein? Ej pād ilo o̧ro̧r eo ad!” Eaar bar ba, “Ejjab ad.” Innām eaar bōk peiū, im kom̧ro eaar etal n̄an m̧weo m̧ōn eo ritūrum̧. Kōm ar kajjitōk n̄an jeo̧rļo̧k bōd n̄an būki leen wōjke ko an. Jinō eaar ba n̄e kōm̧ij kōņaan jet men, kōm̧in aikuj m̧ool kake.
Bōlen ro jinōm̧ im jem̧ōm̧ rejjab ro uwaan Kabun̄ in, ak ejjōkkā am̧ errā ippāer kōn kālet ko aer. Kwoj maron̄ wōt ekkatak pedped ko rem̧ool jān er, āinwōt m̧ool, eddo, ūn̄are peim̧ make, im jerbal. Pedped kein renaaj ļap aer kōjeram̧m̧an mour eo am̧.