Kalikar
Kwojkwoj in Kijone eo Āliktata an Melva
Rijeje eo ej jokwe ilo Utah, USA.
“Kwonej ke kajjieon̄ in bōk m̧ōttan kwojkwoj eo?” Ikar kajjitōk ippān jinō.
Kōmeļeļe jān Christopher Thornock
Jinō ekar mour ļo̧k n̄an 92 iiō rūttoun im ej kab mej. Ekar pād ilo aujipitōl eo ke taktō ro rekar pepe im kwaļo̧k ke ejjeļo̧k men eņ remaron̄ bar kōm̧m̧ane ijjelo̧kin wōt kōm̧anm̧an wōt kōjeien jon̄an wōt aer maron̄ m̧ae iien enaaj ilo̧k jān mour in.
Ke rej m̧aanjabpopo wōt n̄an kōro̧o̧lļo̧k e n̄an m̧weo imōn, ruo em̧m̧aan ro rejitōn bōro jān juon iaan ward ko am rekar deļo̧n̄ e tok ruum̧ eo im kar kajjitōk ippa eļan̄n̄e jinō enej kōņaan in bōk kwojkwoj eo. Ilo jinoin ikar ba n̄an er, “Jaab, komiro em̧ool.” Jino epen an maron̄ kōddedāmi ļo̧k m̧ōn̄ā ko. Innām ikar ba, “Ļōmņak eo aō kein karuo, in mōk kajjitōk ippān.” Ikar malļo̧k n̄an lo̧jiln̄in im ba, “Ewōr ruo priesthood ro ijin.” Kwonej ke kajjieon̄ in bōk m̧ōttan kwojkwoj eo?” Ilo juon ainikien emōjņo̧ ak alikkar ekar uwaak im ba, “Aaet.”
Ālkin aer kōjeraam̧m̧an e kwojkwoj eo, ikar kotak juon m̧ōttan pilawe jān tray eo, kōjar ļo̧k jidik bukwōn, im likūt i ilo lo̧n̄iin. Ekar meeki jidik, im ikar joļo̧k an bōd ippān em̧m̧aan ro kōn an bōk iien an bōke. Rekar ba bwe ej EMMAN wōt. Ālkin aer kōm̧m̧ane jar eo kein karuo, ikar bōk juon kab in dān im leļo̧k n̄an tien. Ekar maron̄ wōt bōk jidik, bōtaab ekar ļo̧kjenaō kōn an em̧m̧an an kar oran̄ļo̧k e.
Ikar kam̧m̧oolol e em̧m̧aan ro rejitōn bōro, innām rekar em̧m̧akūt im etal n̄an ruum̧ eo juon. Jinō ekar mej ilo an aenōm̧m̧an enan̄in juon awa tokālik.
Ilo raan ko tokālik, ikar kile ke ekar juon iien ekwojarjar ilo aō kar maron̄ pād ippān jinō. Men eo āliktata ekar kōm̧m̧ane ilo mour in ekar bōk m̧ōttan kwojkwoj eo. Naan eo āliktata ekar ba “Aaet”—aaet n̄an bōk kwojkwoj eo, aaet n̄an leļo̧k katok eo an kōn “juon bōro erub im jetōb ettā” (3 Nipai 9:20), aaet n̄an bōk ioon etan Jisōs Kraist im kallim̧ur n̄an iien otemjej keememej E, aaet bōk Jetōb eo An. Men ko āliktata kar liļo̧k n̄an tien rekar kōkkaļļe ko an kwojkwoj eo.
Ewi jon̄an enno in kwojkwoj eo an āliktata ilo an kar edjon̄e! Mekarta ekar lukkuun mōjņo̧ n̄an an em̧m̧akūtkūt ak kōnono, ewi jon̄an an en̄jake an mour ilo Kraist! Ewi jon̄an an kam̧m̧oolol kōn an maron̄ en̄jake pinmuur eo An im kajoor eo ewōr an maron̄, eo ekar kotak e ilo iien ko an āliktata ilo iaļ in an ilo mour in im kar leļo̧k n̄an e kōjatdikdik n̄an mour indeeo.
Kajjojo wiik ilo ad bōk m̧ōttan kwojkwoj eo, jemaron̄ in aolep kam̧m̧oolol kōn iien ko ad n̄an kōkāāl bujen ko ad im n̄an en̄jake jeorļo̧k bōd im tūriam̧o̧ ilo ad kajjieon̄ erom āinwōt Jemād Ilan̄ im Nejin, Jisōs Kraist. Innām pilawā eo im dān eo remaron̄ n̄an kōj, āinwōt an kar aikuj n̄an jinō, “etōn̄al ilōn̄in men otemjeļo̧k eo etōn̄al, … im erreo ilōn̄in men otemjeļo̧k erreo” (Alma 32:42).