Ainikien ko an Armej ro Rekwojarjar ilo Raan-ko Āliktata
Kapen Moronai eaar Jipan̄ Eō Katakin Middle School
Kōmeļeļe jān Allen Garns
Iaar tōpar lukōn iiō eo epen ilo aō katakin 13- im 14-iiō-rūttoer. Ejkab dedeļo̧k aō pād ilo juon kweilo̧k iaar inepata kake ippān rijipan̄ principal eo ilo kar amro etale juon jerbal in kōkm̧anm̧anļo̧k. Erom juon rikaki ekāāl im aikuj n̄an ejaake elōn̄ katak ko aō, Iaar lo bwe ekar pen aō eleļo̧k jerbal n̄an rijikuul ro aō im kōm̧m̧an bwen itok limoier. Ekōnono ko am kar kōnono kōn aō aikuj in iuun rijikuul ro nejū n̄an kōm̧m̧ane kālet eo aer—kōm̧m̧ani jerbal ko aer ak pād ilo jorrāān—im n̄an ļoore ekkar n̄an kakkōl ko aō.
Iaar etal jen kweilo̧k ilo aō kar ebweer im edodo. Iaar kōm̧m̧an bwen kweilo̧k in en erom juon kajjitōk an raan eo ilo aō kar ekkatak jeje ko rekwojarjar raan eo juon. Kabwilōn̄lōn̄ eo, uwaak ko raar itok n̄an eō ilo aō kar riit jān Bok in Mormon.
Iaar jar n̄an ekkatak jān jeje ko rekwojarjar jibbon̄ eo kōn wāween bwe in erom juon rikaki em̧m̧an. Jetōb Kwojarjar eaar katakin eō ke ij riit kōn Kapen Moronai ilo Alma 44. Ilo meļeļe in ilo bwebwenato in, Kapen Moronai im RiNipai ro raar jepooļe RiLaman ro ilo reba Sidon im kamijak er n̄an kōm̧m̧ane bwe RiLaman ro ren julo̧k kein tariņae ko aer. Iaar wōnmaanļo̧k wōt im riit, ļōmņak wāween aō kōņaan bwe in āinwōt Kapen Moronai ilo kūlaajruum eo: kakien, lōke, im jeraam̧m̧an.
Ij riiti bwebwenato in im lo bwe Moronai ej ba n̄an Zerahemnah im RiLaman ro bwe em̧ōj iuun er n̄an kōm̧m̧an juon aer kālet: “Kom̧in litok kein tariņae ko ami n̄an kōm, im … kōm naaj dāpij mour ko ami, eļan̄n̄e kom̧ naaj ilo̧k ilo iaļ eo ami im jab bar itok n̄an tariņae ņae kōm” ak “eļan̄n̄e kom̧ij jab kōm̧m̧an men in, … inaaj jiron̄ em̧m̧aan rein aō bwe ren naaj wōtlo̧k ioomi” (Alma 44:6, 7). Iaar kile bwe eaar kōm̧m̧ane ta eo kom̧ja eo eaar ba en kōm̧m̧ane! “Leļo̧k n̄an er ruo kālet, im ļoore,” eaar ba. Kōn ļōmņak in, iaar kōjerbal m̧ato in an Moronai, “Lo, jenaaj kōjjem̧ļo̧k pata in” (Alma 44:10).
Iaar lukkuun pojak kōn katak ko iaar ekkatak jān bwebwenato ko ilo jeje ko rekwojarjar kōn juon iaan kajoor ro aō, iaar jepļaak n̄an kūlaaj eo ilo aō lōke karōk in kapopo ko aō. Ekar wōr pijaan Kapen Moronai ippa, im ej elļo̧k ilo pōjo in jōōt eo aō ilo aolepān iiō in jikuuļ ko aō āinwōt juon kein kakeememej an kar Kapen Moronai kar katakin eō n̄an kōjeikiik kūlaajruum eo aō ilo middle school. Ke ij leļo̧k n̄an er ruo kālet, m̧wil ko m̧wilier raar em̧m̧anļo̧k, raar kōm̧m̧ani jerbal ko aer, im ekar em̧m̧an am jerbal ippān doon. Eaar jem̧ļo̧k iiō eo, ak ekar pen wōt, ak kōn uwaak in jar eo im kōn kajoor in jeje ko rekwojarjar, iaar maron̄ “kōjjem̧ļo̧k pata eo.”