Kabwilōn̄lōn̄ eo kōn Kijeek eo Emōjņo̧
Kokōņaan ke kiiō—ak kokōņaan ke bwe en jim̧we?
Baj ļōmņak n̄e juon ļaddik emake wōt m̧weo im ekwōle (aaet, ekwōle ak baj ļōmņake mōk) Kiiō ļōmņak n̄e ļaddik in ej kab tin baj kōm̧m̧an kijen jānuuj.1 Ļōmņak bwe jinen im jemān ļaddik in raar jab kwaļo̧k kilen kōm̧m̧an jānuuj n̄an e im bwe eaar jab loe aer kōm̧m̧ane.
Jen ba, bwe, ļaddik in eaar jim̧we an ļoor aolep iiōk ko: pilawe, jiij, jidik bōta ioon pilawe eo (im jidik maionej). Tokālik, eaar jibwe tok pireenban eo im likūti ioon stove eo. (Jen bar ļōmņak bwe ejjeļo̧k an kein ukook ak kein kōmat ko jen n̄an kōm̧m̧ane men eo kijen.)
Kiiō ļōmņak bwe ejiktok ļōmņak ilo kōļmenļo̧kjeņ eo an—kōļmenļo̧kjeņ an elōn̄ armej ro raar kowaan jidik (ak pepe ko) n̄an ļōmņake: “Eļan̄n̄e inaaj kōļapļo̧k an bwil, enaaj m̧ōkaj an mat.”
Ļōmņak ta eo enaaj waļo̧k tokālik. (Ak bōlen koban ļōmņake.)
Enaaj bōlen em̧m̧an an iiōke crispy eo, brown pilawe ak gooey eo, jiij eo—ak ejjab jim̧or. Men eo eaorōktata, ewōr kijen pilawe āinwōt (enno in wōt) lava im jiij, men̄e eaar jab jejjet.
Jorrāān eo an, eo komaron̄ loe, ekar kobain kowaan (eo ekar jidik likjab) im jab kijenmej (eo, ekar jameļeļe jidik, eo elikjab jidik). Eļan̄n̄e en kar āliji bōd in tokālik, en kar dik likjab, kōnke eban kar kowaan e ak en kar wōr tōprakin jen aolepān jab kijenmej eo.
Bwe en jim̧we, ej aikuj jeļā kabwilōn̄lōn̄ eo kōn bwil eo em̧m̧an jon̄an.
Em̧m̧an Jon̄an an Kōm̧at Ejjab Enana
Kōm̧m̧an jon̄an kōmat ioon juon jitoob em̧m̧an n̄an jiij im elōn̄ kain m̧ōn̄ā ko jet kōnke ej kōm̧m̧an bwe m̧ōn̄ā ko ren mat ilo aer jab tilļaar. Tulaļ wōt eto im ebōk iien, eo ebōk kijenmej.
Irooj eaar ba, “wōnm̧aanļo̧k wōt ilo kijenmej m̧ae ami weepān” (K&K 67:13). Ej kōnono ijin kōn kain weeppān eo em̧m̧an ļo̧k jen kōm̧m̧anin jiij jāānwuj; Ej kōņaan bwe jen erom̧ āinwōt E. Jisōs Kraist ej make wōt waanjon̄ok in kijenmej eo em̧m̧an tata. N̄an ļoor waanjon̄ok eo An meļeļein kōļapļo̧k errem̧aan ļo̧k ko ad, kalimjōk aikuj ko aetokitier im jab kōņaan ko reddik kitier, n̄an lo men ko reļļap rej itok jān kōjparok kōj make, tōmak, pokake, dim ilo kijejeto, ineem̧m̧an, im iakwe—ilo naan ko jet, bōk kijenmej.
Jān meļeļein, kijenmej ebōk kōttar, eo me emaron̄ boriin̄, ak āinwōt an Būreejtōn Dieter F. Uchtdorf, Rikakpilōklōk eo Kein Karuo ilo Būreejtōnji eo Kein Kajuon, kar katakin kōj, eļap ļo̧k jen kōttar: “Kijenmej meļeļein lukkuun kōttar im niknik. Ej meļeļein pād wōt ilo men eo im aolep men eo jemaron̄ kōm̧m̧ane—jerbal, kōjatdikdik, n̄an kōjerbal tōmak; ineek edodo kōn peran, men̄e ikidelel ko an būruwōd rerūm̧wij. Kijenmej ej jab baj niknik wōt; ej lukkuun niknik!”2
Ejjab baj iieek wōt jāānuuj jiij eo ioon paan eo im meļo̧kļo̧k e; ej mije im ukōte ilo iien eo ekkar.
Ejjab baj wōt etal n̄an jikuuļ ak jemenere ak jar; ej lukkuun ekkatak ak kabun̄jar.
Ejjab baj wōt kōttar n̄an bōk juon naan in kam̧ool kōn Bok in Mormon bwe en iwōj n̄an eok kōnke kwaar kajjitōk; ej waļo̧k ilo riit, ekkatak, kōļmenļo̧kjeņ, jar, im mour kaki ekkar n̄an kain̄i ko ilo bok in.
Ejjab baj jijet wōt ijeņ ilo an ro m̧ōttam̧ kōm̧m̧an kōjak kōn kabun̄ eo am̧; ej jar kake er im lukkuun kōņaan bwe ren ukōt būruweer im kōm̧m̧ane ta eo komaron̄e n̄an kwaļo̧ke.
Ejjab baj wōt kōttar m̧ae 16 im jerā; ej jeļā kilen iakwe pokake im kajieon̄ n̄an meļeļe kilen ļoor kapilōk eo an rikanaan eo enaaj kōjeraam̧m̧an eok.
Kadikļo̧k an Bwiļ
Kijenmej im ettā bōro, ak kōjparok kōj make, rej jim̧or m̧ōttan “leen ko an Jetōb” (lale Galatia 5:22–23). Men̄e ewōr menin ekkairiir ko me ebōk em̧m̧akūt eo em̧ōkaj ak juon uwaak eo epojak (āinwōt n̄e ewōr jet m̧ōn̄ā me eaikuj in lukkuun kōmat), kwoj aikuj lo eok make m̧aanļo̧k kōn eļap kijenmej n̄an kōjparok kōj make. Eļan̄n̄e kwojeļā menin ej waļo̧k, ej kōkaļļe an Jetōb jerbal ilo mour eo am̧.
Kabwilōn̄lōn̄ eo kōn bwil eo em̧m̧an jon̄an emaron̄ in lewaj n̄an eok juon iiek in jāānwuj jiij eo enno, hamburger ko me rejjab āinwōt hockey puck ko repiin̄ io̧lepāer, relukkuun buraun ijjelo̧kin an lukkuun kilmeej, im rice eo en pidodo ijjelo̧kin an pen im kan̄urn̄ur. Ak kijenmej enaaj “weeppān an jerbal” (Jemes 1:4) ilo mour eo am̧, jipan̄ eok wōnm̧aanļo̧k n̄an erom̧ āinwōt Jisōs Kraist, bōktok im̧we eo an Jetōb Kwojarjar, im jipan̄ eo ejjeļo̧k jem̧ļo̧kin naaj tōl eo n̄an mour indeeo.
Ilo am̧ jeļā ta men ko rekōm̧m̧an bwe kwon jab kijenmej, ļōmņak kōn iieōk in jāānwuj jiij eo (ak jabdewōt m̧ōn̄ā kojeļā kake) im ta eo kwomaron̄ wūjlepļo̧k n̄an joļo̧k bwe jab kijenmej en tōl m̧akūtkūt ko am̧. Eļan̄n̄e emakijkij am̧ leļo̧k am̧ n̄an jab kijenmej, kwojeļā ej bar waļo̧k n̄an elōn̄ armej. Kwomaron̄ ukweļo̧k im bar kajjieon̄ ļoor waanjon̄ok im katak ko an Jisōs Kraist. Elōn̄ ļo̧k jen juon iieōk in jāānwuj in jiij n̄an kōm̧m̧ane, im ejāmin rum̧wij n̄an ekkatak kōn weeppān eo ekkar kōn kijenmej.