Menmenbwij an Baam̧le: Aenōm̧m̧an, Kōjparok, im Kallim̧ur ko
Jān Elder Bradley D. Foster
Jān Jiljilimjuonn̄oul eo
Jān juon kōnono, “Aiintok, Kōmour, im Liāpe Baam̧le ko,” kar kwaļo̧k ilo RootsTech Family History Conference ilo Salt Lake City, Utah, USA, ilo Pāpode 14, 2015.
Ilo an baam̧le eo am̧ bōk koņaer aiintok reko̧o̧t ko, kōmour bōro ko, im liāpe ro uwaan baam̧le eo, kwe im ro ineem̧ renaaj jeraam̧m̧an n̄an indeeo im indeeo.
Kōmeļeļe ko jān Carolyn Vibbert
Bwebwenato eo kōn Kabun̄ eo an Jisōs Kraist im Armej ro Rekwojarjar ilo Raan-ko Āliktata ej juon bwebwenato kōn baam̧le ko. N̄e ij ba baam̧le ko, Ijjab kōnono kōn jekjek eo raan kein me ej Mama, Baba, im ajri ro nejier.
Ij kōjerbal meļeļe eo ilo wāween an Irooj kōjerbal e, āinwōt juon naan eo epaake ļo̧k nukwier ak elōn̄ baam̧le ko, kōnke aolep elōn̄ juon an baam̧le. Karōk eo an Jemedwōj Ilan̄ n̄an ajri ro Nejin ej pedped wōt ioon kain baam̧le rot in—elōn̄ ajri ro rej bōktok kajoor jān rūtto ro jibūer im jim̧aer elōn̄ epepen ko likļo̧k im ro jineer im jemāer ro rej pukot wāween ko n̄an kōjeraam̧m̧an ro ineer n̄an epepen kane rej itok.
Ilo meļeļe in bwe Bok in Mormon ej barāinwōt kwaļo̧k kōn bwebwenato ko an baam̧le. Ilo ad riiti bwebwenato kein, jej loe bwe baam̧le kein rej jan̄in oktak ium̧win elōn̄ iiō ko. Barāinwōt ro rekar mour ilo bar juon tōre im jikin rej āinwōt kōj—im kōņaan eo an Anij n̄an ajri ro Nejin n̄an mour im m̧ōņōņō, baam̧le indeeo ejjan̄in wōr oktak.
Etke Irooj ej kejparok reko̧o̧t ko an bwebwenato kein? Ta eo Ekōņaan bwe jān ekkatak jān er? Ewōr ke ilowaan māākjiin kein katak ko me remaron̄ jipan̄ kōj kijejeto ko ad n̄an aiintok, kōmour, im liāpe baam̧le ko ad?
Juon Katak jān Liai
Ij tōmak bwe baam̧le eo jinoin tata ilo Bok in Mormon—Baam̧le eo an Liai—ewōr juon katak eo ekajoor n̄an kōj ro me remaron̄ jab kile. Baam̧le eo an Liai emaron̄ katakin kōj juon jerbal eļap kōn reko̧o̧t ko an baam̧le—etke rej aorōk n̄an Irooj im etke jej aikuj rej aorōk n̄an kōj.
Ke bwebwenato in ekar ijjino, Liai im Saraia rekar kōkaajririik leddik ro nejier im emān nejier ļaddik ilo Jerusalem, mour juon mour eaenōm̧m̧an ilo bukwōn in eļap. Mour ko aer rekar oktak n̄an indeeo ke Irooj ekar kean̄ Liai bwe en bōkļo̧k baam̧le eo an n̄an ānejam̧den.
Liai ekar pokake, im e im baam̧le eo an rekar likūt men ko m̧weier im jibadōkļo̧k āne jam̧dān. Ālkin aer kar ito itak ium̧win juon tōre, Liai ekar ba n̄an ļaddik eo nejin Nipai:
“Lo iaar ettōņak juon tōņak, eo ie Irooj eaar kean̄ eō bwe kwe im ļōm̧aro jeiūm̧ naaj ro̧o̧l n̄an Jerusalem.
“Bwe lo, ippān Leban epād ļo̧o̧k eo kōn riJu ro im barāinwōt menmenbwij eo an ro jim̧m̧aō, im kar m̧wijit ioon pileij brass ko” (1 Nipai 3:2–3; eoon eo eaorōk kar kobaiktok).
Kōnke kien in, baam̧le ko am̧ rej jeraam̧m̧an kōn naan in kōmelet in eļap kōn tōmak im pokake jān Nipai: “Inaaj ilo̧k im kōm̧m̧ani men ko Irooj eaar kean̄, bwe ijeļā Irooj ejjāmin letok kien ko n̄an ro nejin armej, eļan̄n̄e Ejjab kōpooj juon iaļ n̄an aer kōtōprak men eo Ej kean̄ er” (1 Nipai 3:7).
Piliej brass ko rekar juon ļo̧o̧k. Rekitbuuj jeje ko rekwojarjar, ak rekitbuuj barāinwōt bwebwenato eo an baam̧le eo an Liai. Irooj ekar jeļā ewi jon̄an an naaj aorōk n̄an kōjparoki ļo̧o̧k kein n̄an elōn̄ epepen ko renaaj itok.
Konan̄in ke kar ļōmņak etke Irooj ekar jab kakien Liai bwe en bar ro̧o̧lļo̧k im bōktok ļo̧o̧k ko, ijjelo̧kun, ekar kakien ļaddik ro nejin? E eaar petriak eo an baam̧le eo. Irooj ekar leļo̧k n̄an e ettōņak eo. Ejjab ļapļo̧k an Liai kajoor ioon Leban ke jān ļaddik ro nejin?
Jejjab jeļā etke Irooj ekar kean̄ ļaddik ro nejin Liai bwe ren ro̧o̧l ļo̧k n̄an Jerusalem, ak jej jeļā bwe rekar en̄taan im pen aer kōttōprak ta eo Irooj ekar kajjitōk ippāer bwe ren kōm̧m̧ane. Jerbal eo ekar pen, im ekar mālijjon̄e tōmak eo aer. Rekar katak katak ko raorōk me renaaj jipan̄ er ilo aolepān iien ito itak eo aer ilo āne jam̧dān. Bōlen men eo ekar lukkuun aorōk, rekar katak bwe n̄e Irooj ej kean̄, Ej kōpooj juon iaļ.
Bōlen jemaron̄ kajjitōk ippād make, ta eo Irooj ekōņaan bwe ļaddik im leddik ro nejin ren katak ilo aer “ro̧o̧lļo̧k” im kōro̧o̧ltok ļo̧o̧k ko an baam̧le eo am? Ewi wāween An kōpooje juon iaļ n̄an er? Elōn̄ ke en̄jake ko Ekōņaan bwe ren būki? Jej ke karuwaineneik tok er bwe ren būki en̄jake kein? Ta kōjeraam̧m̧an ko Ej kōjatdikdik kaki n̄an leļo̧k n̄an ļaddik im leddik ronejūm̧ jān tampeļ eo im jerbal in menmenbwij eo?
Ke Nipai im ļaddik ro jein rekar ro̧o̧lļo̧k n̄an imōn kōppād eo an jemāer, Liai “eaar bōk ļo̧o̧k ko im kar m̧wijit ioon pileij brass ko, im eaar lin̄ōri jān jinoier.” Im eaar lo bwe eaar wōr “bok ko an Moses ļalem ie,” “kanaan ko an rikanaan ro rekwōjarjar,” im “juon menmenbwij an ro jemān; kōn menin eaar jeļā bwe e bwijjin Josep … eo kar wiakake ilo Ijipt.” Im ke Liai “eaar lo men kein eaar obrak kōn Jetōb” (1 Nipai 5:10, 11, 13, 14, 17).
Innām Liai ekar katakin baam̧le eo an kōn ta eo ekar katak jān pileej ko. Komaron̄ in ba bwe imōn kōpād eo an ekar erom juon center n̄an ekkatak im bwebwenato an baam̧le—āinwōt an naaj mōko imōd barāinwōt.
Epidodo n̄an loe etke Irooj ekar kōņaan bwe baam̧le eo an Liai ren būki ļo̧o̧k kein. Rekar leļo̧k n̄an ro ineen juon en̄jake n̄an maron̄ kile, im ekkejel ippāer n̄an petriak ro retiljek rekar mour m̧okta im bwe ren kalōk ilo būruweer “kallim̧ur ko kar kōm̧m̧ani n̄an ro jim̧m̧aer” (K&B 2:2; Josep Smith—Bwebwenato 1:39). Ļo̧o̧k kein rekar lukkuun aorōk n̄an tōmak eo an epepen ko rejjan̄in ļo̧tak bwe Jetōb eo ekar kakkōļ Nipai bwe eļan̄n̄e eban er, aolepān “juon laļ ej aikuj naaj idakunkunļo̧k im jako ilo jab tōmak” (1 Nipai 4:13).
En̄jake eo bar juon an armej ro ilo Bok in Mormon ej kwaļo̧k an m̧ool men in bwe n̄e ļo̧o̧k ko rej jako, m̧ool eo ej jako, im waļo̧k ko n̄an epepen ko ilju im jekļaj remaron̄ in kauwōtata.
RiMulekite ro rekar etal jān Jerusalem enan̄in ejja tōre eo wōt āinwōt baam̧le eo an Liai. Ak ejjab āinwōt baam̧le eo an Liai, “ekar ejjeļo̧k ļo̧o̧k rekar bōktok ippāer tok.” Im ilo iien eo Mosaia eaar lo er 400 iiō tokālik, “kajin eo aer raar ettoon; … im raar jab bōktok ļo̧o̧k ko ippāer” (Omni 1:17). Rekar meļo̧kļo̧k ijo rekar jebar jāne āinwōt armej in bujen.
Mosaia ekar katakin RiMulekite ro kajin eo aer bwe ren maron̄ katak jān ļo̧o̧k ko ekar būki. Āinwōt juon tōprak, RiMulekite ro rekar en̄jake oktak jān jorrāān, juon jukjukin pād ejjeļo̧k aer anij n̄an juon jukjukin pād emeļeļe kōn karōk in m̧ōņōņō an Anij n̄an er—im baam̧le.
Ro̧o̧ltok ippān Baam̧le eo Am̧
Jeļāļo̧kjeņ eo kōn wōn kōj ilo kadkad in n̄an Anij im n̄an doon ej ukōt wāween ad ļōmņak, m̧akūtkūt, im kōm̧anm̧an n̄an doon. Ļo̧o̧k ko rej m̧ōttan m̧ōņōkjān eo eaorōk kōn kadkadid im jibadbad ko ad. Relikļo̧k ej kōpooj kōj n̄an wōnm̧aanļo̧k wōt.
Ro jinen im jemān, emōj ke ami karuwaineneiki baam̧le eo am̧ n̄an “ro̧o̧ltok”? Emōj ke an baam̧le eo am̧ jenolo̧k jān ļo̧o̧k ko aer make—ak jān er kajjojo—ilo juon wāween ak bar juon. Emōj ke an nukwi eo am̧ rainin im etto kar jepeepļo̧k? Ta eo ekar waļo̧k ilo bwebwenato eo an baam̧le eo am̧ im ekar kōm̧m̧an bwe en waļo̧k jepel in? Ekar ke jān em̧m̧akūt n̄an laļ ko jet, poktak ikōtaan baam̧le, oktak n̄an gospel in, ak wāween aer rūttoļo̧k im jako? Emōj ke am̧ kappukot ro nukum̧ remej ilo FamilySearch.org?
Mweo imōn Israel ekar ejeplōklōk, im ilo elōn̄ wāween ko me ekitbuuj ejeplōklōk an baam̧le ko ad im ļo̧o̧k ko. Eddo eo ad ej n̄an aiini er im, ijo emānin aikuj, n̄an kōmour kinej ko an jepelļo̧k in. Ilo ad pukot n̄an ukōt būruwōn ajri ro nejid n̄an jemāer, būruwōd renaaj barāinwōt oktak ļo̧k n̄an ajri ro nejid1 im jenaaj loe aenōm̧m̧an im kōmour eo ej itok jān jerbal in (lale K&B 98:16).
Āinwōt an Liai kar jilkinļo̧k ļaddik ro nejin n̄an Jerusalem bwe ren būktok ļo̧o̧k ko rekwojarjar, jen jilkinļo̧k ajri ro nejid bwe ren kōro̧o̧ltok ļo̧o̧k ko an baam̧le ko ad. Āinwōt an Irooj kōpooj juon iaļ n̄an Nipai, Ekar kōpooj Intōrnet im kein jerbal ko jet raan kein me renaaj kōmaron̄ an ajri ro nejid kuktok ippān doon im kōmour baam̧le ko ad. Im Ekar kōpooj e tampeļ ko ijo im jemaron̄ in bōkļo̧k et ko jej loi im kōm̧m̧an bwe kuktok eo ad en ejjeļo̧k jem̧ļo̧kin kōn kain̄i in liāp ko.
Lan̄lōn̄ ilo Āne Jam̧dān
Ke kōrā eo pāleeō, Sharol, n̄a kom̧ro kar m̧are, kōm̧ kar pepe ippān doon bwe en emān nejimro ļaddik. Irooj ewōr juon an karōk eoktak. Ekar letok ļalem nejimro leddik.
Kōm̧ kar ito itak kōn leddik rein nejimro ilo āne jam̧dān. Kiiō, emōj aer m̧are im elōn̄ nejier ajri im rej ito itak ilo āne jam̧dān eo aer make. Men otemjej rekar ke pidodo ilo kar iaļ in? Jaab. Ewōr iien kōm̧ kar aetwerōk, im ebooļ iien kōm̧ kar en̄taan.
Mour ilo āne jam̧dān emaron̄ in pen n̄an baam̧le ko. N̄e armej rej kajjitōk, “Ejet am̧ im baam̧le eo am̧ mour?” Ekkā aō ba, “Kōm̧ pād ilo juon jekjek epen kiiō. Kom̧m̧ool kōn am̧ kajjitōk.”
Ak ebarāinwōt lōn̄ iien lan̄lōn̄ ko ilo iaļ in. Āinwōt petriak ro im metriak ro, kōm̧ kar joļo̧k eļap iien kōkajoorļo̧k ajri ro nejūm̧ n̄an āne jam̧dān. Rikanaan ro ad rainin rekar kallimūr bwe jerbal in bwebwenato an baam̧le rej letok “kōjparok jān kareel eo an rikapo eo”2 im juon oktak “em̧wilaļ im ejjeļo̧k jem̧ļo̧kin” n̄an Rilo̧mo̧o̧r eo.3 Menin ej juon wāween eo ekajoor n̄an aiintok, kōmour, im liāpe baam̧le ko ad.
Āinwōt petriak eo an baam̧le eo am, ikar kajjitōk ippān leddik ro nejūm̧ bwe ren “ro̧o̧lļo̧k” n̄an im pukot ļo̧o̧k ko, būki et ko n̄an tampeļ eo, im katakin ajri ro jibum̧. Ikar kajjitōk ippāer kajjieon̄ in jeļā kajjeen ro rekar jebar jeni itok wōt jān aer bōk koņaer ilo menmenbwij eo an baam̧le eo am̧.
Juon Kallim̧ur
Ij kallim̧ur bwe ilo am karuwaineneik tok ajri ro nejūm̧ bwe ren “ro̧o̧lļo̧k” im pukōt ļo̧o̧k ko an baam̧le eo am̧, ippān doon kom̧ naaj “lukkuun lan̄lōn̄” āinwōt Liai im Seraia im leļo̧k “kam̧m̧oolol n̄an Anij in Israel.” Ilo ami pukōt ļo̧o̧k ko ami, kom̧ naaj “obrak kōn Jetōb eo,” bwe kom̧ naaj pukōt “bwe [raar] lukkuun kāitoktok-limo; aaet, em̧ool aer aorōk eaar ļap n̄an kōm.” Im kwonaaj jeļā bwe “eaar mennin mālōtlōt ilo Irooj bwe [kōmin] būki ippām, ke [kōmij]” ito-itak “ilo āne jem̧aden ļo̧k n̄an āneen kallim̧ur” (1 Nipai 5:9, 17, 21–22).
Kabun̄ in ej pād ijin n̄an jipan̄ im kōkajoorļo̧k baam̧le eo am̧ ilo ito itak in. Ij kallim̧ur bwe ilo an baam̧le eo am̧ bōk koņaan ilo aiintok ļo̧o̧k ko, bōro ko renaaj mour, im baam̧le ko renaaj liāp, kwe im ro ineem̧—baam̧le eo am̧—naaj jeraam̧m̧an n̄an indeeo im indeeo.