Ainikien ko an Armej ro Rekwojarjar ilo Raan-ko Āliktata
Iien n̄an kōm̧m̧an Menmenbwij an baam̧le
Kōmeļeļe jān Wilson Ong
Āinwōt juon m̧am̧a eo ewōr ruo nejin leddik, ekka aō kōm̧m̧an jekpen nae bwe in jab maron̄ bōk koņaaō ilo jet iaan men ko me ikōņaan kōm̧m̧ani kōnke ejjab jejjet n̄an “iien” ko ao n̄an kōm̧m̧ani. Juon iaan men ko ej jerbal in menmenbwij an baam̧le.
Mene iaar bōk koņaaō ilo kōm̧m̧ane menmenbwij āinwōt juon ao m̧akūtkūt ilo raan in Jabōt m̧oktaļo̧k, iaar lo bwe elōn̄ jekpen nae ko ij kōm̧m̧ani kōn an ejjeļo̧k aō iien ak jeļā kake n̄an kaorōk jerbal in menmenbwij an baam̧le ilo iien eo.
Būruō eaar oktak juon jibbon̄ jet allōn̄ ko rem̧ootļo̧k ke ij jijjet ilo tampeļ. Ke ij etale et ko etan ro remej ioon kaat ko ilo tampeļ, jar bwe ren maron̄ kile jerbal in kain̄i ko ij kōm̧m̧ani n̄an er, iaar ļōmņak ippa make, “En kar ke em̧m̧an n̄e ren kar aolep lukkuun nuku? Inkar lukkuun m̧ōņōņō in kōm̧m̧ane jerbal kein n̄an er.” Jetōb eaar kalikkar n̄an eō ke eļan̄n̄e en kar ikdeleel ko aō kein, innām Irooj en kar jipan̄ eō kōm̧m̧an jerbal in menmenbwij an baam̧le, eļaptata ilo raan in Jabōt. En kar jipan̄ eok kōm̧m̧an aō iien im letok jeļāļo̧kjeņ n̄an kadedeļo̧k jerbal ko An.
Jabōt eo, iaar ro̧o̧l n̄an m̧weo im̧ō im kōppeļļo̧k peij in FamilySearch.org. Dān in kōm̧jaļaaļ eaar kobrak meja ke ij lo et ko etan ro nukun. En̄jake eo am n̄an doon raar kajoorļo̧k. Men eo eaar kōļapļo̧k iakwe eo aō n̄an er raar jet iaan pija ko pijaier im jet aer peba, jibū ej kab m̧ōj an kadedeļo̧k, ekōm̧m̧an bwe in epaake ļo̧k wōt ro uwaan baam̧le eo aō. Iaar lukkuun m̧ōņōņō ke ij katakin leddik eo nejū ruo an iiō, eo eaar katak n̄an kakilen pija ko pijaan jibūn jibūn im jibūn jibūn jibūn, im kūr er kōn etāier. Iaar en̄jake wāween eo Būreejtōn Russell M. Nelson, Būreejtōn eo an Doulul eo an Rijilōk ro Jon̄oulruo, kar kōmeļeļe: “Raan in Jabōt ej letok iien ko rem̧m̧an n̄an kōkajoorļo̧k ippān doon ko an baam̧le. Āliktata, Anij ekōņaan kōj kajjojo, āinwōt ajri ro Nejin, n̄an jepļaaktok n̄an Ippān āinwōt Armej ro Rekwojarjar em̧ōj aer endowed, emōj aer liāp ilo tampeļ eo āinwōt baam̧le ko, n̄an rūtto ro jibū im jim̧aad em̧ōj aer mej, im n̄an ro ineed” (“Jabōt ej juōn men in Lan̄lōn̄,” Kweilo̧k eo Eļap, Eprōļ 2015, 130).
Jen en̄jake in, iaar wōnm̧aanļo̧k wōt im bōk koņaaō ilo jerbal in menmenbwij an baam̧le ilo raan in Jabōt. Eļap aō jeraam̧m̧an ilo aō kōm̧m̧ane jerbal ko ilo tampeļ n̄an ro uwaan baam̧le eo aō me remej. Juon kōjeraam̧m̧an eļap ilo ao ekkatak kōn ro nuku im epaake ro jibū ro rej jab membōr in kabun̄ in ad. Eaar kōkajoor kālet ko aō n̄an kōjparok bujen ko im niknik n̄an jem̧ļo̧kin bwe in maron̄ juon iaļ in jipan̄ eo ekajoor ilo baam̧le eo aō n̄an indeeo.
Men̄e elōn̄ wōt jerbal ko rej aikuj dedeļo̧k, ij kam̧oolol Jemedwōj Ilan̄ kōn an letok kajoor bwe in m̧aron̄ bōk kōņaaō ilo jerbal in An, eļaptata ilo raan eo An. Jān n̄a, Jabōt em̧ool ej juon menin lan̄lōn̄.