Jodikdik ro

Kijeek ko im Katak ko kōn Pokake

Būreejtōn Thomas S. Monson juon iien ekar bwebwenato kōn juon tōre ekar ekkatak aorōk in pokake. Ke ekar ralitōk an iiō, baam̧le eo an rekar jam̧boļo̧k n̄an cabin eo aer ilo tōl ko. E im ļaddik eo m̧ōttan rekar kōņaan in rakij juon jikin eo eujooje bwe ren campfire. Rekar kajjieon̄ rakiji jikin eo jān aer tum̧tum̧ ujooj kōn peier, rekar ekkanōk im tum̧tum̧ ujooj jon̄an aer maron̄, ak rekar maron̄ ittum̧ wōt jijidikdik in ujooj ko. Būreejtōn ekar kōmeļeļeiki, “Innām ta eo iaar ļōmņak ekar uwaak eo ejejjet eo eaar jiktok ilo ļōmņak an juon eo me ruwalitōk iiō rūttoon. Iaar ba n̄an Danny, ‘Men eo jej aikuji ej n̄an tile ujooj kein. Jenaaj tile juon doulul in ujooj ko!’”

Men̄e ekar jeļā bwe ekar jab mālim an kōjerbal mejet, ekar ettōr ļo̧k n̄an cabin eo im lale n̄e ewōr, im e im Danny rekar kōjo̧ juon kijeek jidikdik ilo juon jikin eujooje. Rekar ļōmņak kijeek eo enaaj make kun, ak ijjelo̧kin an make kun ekar kilepļo̧k im juon kijeek ekauwōtata. E im Danny rekar ettōr im kappok jipan̄, im ejjab etto jet rūtto rekar ekkairir tok bwe ren kune kijeek eo m̧okta jān an ururļo̧k n̄an wōjke ko.

Būreejtōn Monson ekar wōnm̧aanļo̧k wōt, “Danny im n̄a komro kar ekkatak jet katak ko reppen bōtaab katak ko raorōk raan eo—m̧ōttan eo eļap ekar aorōk in pokake.” (Lale “Pokake Ej Bōktok Kōjeraam̧m̧an Ko,” Liaona, Māe 2013, 89–90.)

Āinwōt Būreejtōn Monson, emōj ke am̧ kar ekkatak juon katak kōn pokake ilo wāween eo epen? Ta kōttōbar ko komaron̄ kōm̧m̧ani n̄an kōjparok wōt eok itok jān am pokake ilju im jekļaj?