Im̧ōko Im̧ōd, Baam̧le ko Ad
Jitlo̧k im Jar kōn Emma
Rijeje eo ej jokwe ilo Denmark.
Alkin an kar leddik eo neju wōtlo̧k jān juon wintō, iaar ļōmņak men eo ekamijak tata kōm̧ kar ioone.
Pija © iStock/Thinkstock
Baam̧le eo am ejkab ro̧o̧ltok jān juon iien kakkije em̧m̧an. Alkin juon iien kōjota iaar kotļo̧k an ajri ro nejim, Markus eo emān an iiō im Emma eo jilu an iiō, ikkure ilo ruum̧ eo ioon būļo̧o̧r eo kein kemān ilo abaatmen eo. Ilo Denmark, wintō ko rej make peļļo̧k āinwōt kamera ko. Wintō ko ekkā aer ļak, ak kōm̧ kar kōppeļļo̧ki jidik ilo iien kakkije eo am bwe abaatmen eo am en maron̄ em̧ōļoļo ilo iien am ekkāke.
Ke ij kwaļkwōļ kōnno̧, iaar en̄jake bwe elōn̄ men en ejjan̄in lukkuun jejjet. Iaar ettōr lōn̄ļo̧k n̄an ettōņaak eo ke Markus ej ettōr laļtak ilo jikinwe eo. Ekar elam̧ōjm̧ōj ilo an kar mijak, im ba Emma ewōtlo̧k jān wintō eo—juon wintō tarin 40 ne aeitokan (12 m) ilōn̄ in wōt juon sidewalk kōm̧m̧an jān cement. Iaar ettōr laļļo̧k ilo jikinwe eo, aliji aō lam̧ōje etan Emma. Iaar lo leddik jidikdik eo nejū ej babu ioon cement eo āinwōt n̄e em̧ōj an mej. Eaar jaje em̧akūtkūt ke ij kotake, im iaar ļōmņak men eo ekamijak tata ippa emōj an bōk jikin. Ļeo pāleeō, eo eaar ļoor laļtak n̄an n̄an nam̧ōj, eaar kotak im kajju leļo̧k n̄an e kōjeraam̧m̧an eo an priesthood.
Waan aujpitōļ eaar kajju ettōrtok, im kōm̧ro Marcus eaar jar ilo iien eo taktō ro rej kōm̧admōd Emma. Ejjab to kōm̧ ar iuwe ilo waan aujpitōļ im etal n̄an aujipitōļ.
Ilo ICU kōm̧ kar pād ippān doon ippān ro uwaan baam̧le ko me raar itok im jipan̄ kōm̧. Markus eaar ro̧o̧l n̄an m̧weo ippān ajri ro rilikin, im kōm̧ro ļeo ippa kar pād wōt, ilo am jab jeļā kōn jekjek eo Emma epād ie.
Alkin juon iien aeitok, juon iaan taktō ro raar itok, kajjitōk kōn wāween an kar kar jorrāān eo kar bōk jikin. Raar ba bwe n̄e juon ej wōtlo̧k jān juon jikin eutiej ekkā an lōn̄ jorrāān ilowaan ānbwinnin im remaron̄ jab mour. Emma eaar jorrāān dii ko ilo katin im jidik jorrāān in kōmālij, ak kar jidik wōt kuraar ko an. Taktō eo eaar ba bwe jon̄an ņe juon enjeļ eaar bauri leddik in.
Men̄e an kar Emma mour ekar juon kabwilōn̄lōn̄, eaar jab maron̄ em̧akūtkūt kōn jorrāān in bōran. Ļeo pāleeō im ruo m̧ōtta repaake eō raar bar kōjeraam̧m̧an e Emma. Ilo kōjeraam̧m̧an eo, em̧ōj kallim̧ur i kōn an lukkuun ājmour ilo an nej ejjeļo̧k bar jorrāān im bwe men in enaaj juon en̄jake eo em̧m̧an ilo mour eo an. Ekar ļap aō kam̧oolol kōn kajoor eo an priesthood. Aolep jar im kajjitōk ko aō raar uwaak.
Emma eaar mour jān an kar kom̧a ium̧win emān raan ko tokālik. Ilowaan raan ko emān, ro m̧ōttam̧, ro uwaan Kabun̄ in, im ro jet raar jitlo̧k im jar kōn Emma. Iaar en̄jake kajoor in jar ko an armej ro rekwojarjar raar jepooļ eō, kōkajooor n̄a im baam̧le eo aō. Iaar en̄jake bwe Jemedwōj Ilan̄ eaar bakwuj eo im kaenōm̧m̧an eō.
Stake eo am̧ eaar kōm̧m̧ane juon jitlo̧k ilo raan eo m̧okta jān an kar rujtok jān kom̧a. Kōm̧ij tōmak bwe Jemedwōj Ilan̄ eaar ron̄jaki jar ko am im bwe Emma eaar rujtok āinwōt juon uwaak in jitlo̧k ko. Jān iien eo Emma eaar kajju mour. Ļalem raan tokālik eaar jino ba naan eo jinointata ālkin jorrāān eo, im ratimjuon raan tokālik eaar diwōj jān aujipitōļ eo. Eaar pād ilo wiiljea ilowaan ļalem wiik ko im eaar jino kōmoururi ānbwinnin.
Enan̄in juon allōn̄ ālkin jorrāān eo, eaar jino metak liku itok jān aō kotak e Emma. Juon en̄jake ejjab wōt kōn mour in ānbwin ak barāinwōt aō m̧ōjņo̧ ilo mour in jetōb. Ewi wāween aō nej wōnm̧aanļo̧k wōt im lale Emma?
Juon jota iaar jino en̄jake bwe ejjeļo̧k aō kajoor n̄an kōm̧m̧an jabdewōt men. Iaar etal jān m̧weo im lo juon jikin jijet ilo juon baak, ijo iaar jar n̄an Jemedwōj Ilan̄ ium̧win juon awa. Ej kab juon iien ilo mour eo aō, iaar en̄jake kabwilōn̄lōn̄ in kajoor eo an Pinmuur eo an Rilo̧mo̧o̧r eo. Aolep metak ko im būrom̧ōj ko me eto aō kar baj eddodo kaki; aolep aō eddodo raar meraļo̧k jān ioon aera alkin jar eo. Emma eaar pād ilo wiiljea, im ikar bōk wōt jipan̄ kōn an metak liku, ak iaar kajoor wōt n̄an aō wōnm̧aanļo̧k.
Juon iiō tokālik, Emma eaar maron̄ ettōr, ettōn̄, bwebwenato, im ļōmņak āinwōt juon eo emān an iiō.
Jejeļā ewōr juon Jemed Ilan eo ej iakwe kōj, im ej kea kōn kōj im ejeļā kōn kōj kajjojo. Ejeļā kōn apan̄ ko jej iooni. Iban pere kabwilōn̄lōn̄ in me eaar uwaak itok jān jar ko, jitlo̧k, im kōjeraam̧m̧an ko an priesthood.