Jerbal in jipan̄ ilo Kabun̄
Jerbal in Jipan̄ eo Aō—Ekar Kobrak Raan in Jabōt ko
Rijeje eo ej jokwe ilo California, USA.
Raan in Jabōt ko aō rej obrak, ak ij en̄jake bwe in kam̧m̧oolol bwe imaron̄ jerbal ilo an ejjeļo̧k wāween ko reppen āinwōt ritōl ro an Kabun̄ in m̧okta rekar jelm̧ae āinwōt Elder Parley P. Pratt.
Kōmeļeļe ko jān Chidy Wayne
Ej Jibbon̄ in Jabōt. 12 awa ko im̧aantata, ekar wōr juon aō jikejuuļ in kweilo̧k, intōrpiu ko, kapen ko, im ekkapit ko. Inaaj ijjino ilo juon stake center im jem̧ļo̧k ļo̧k ilo bar juon imōnjar jikin eo iturājet in bukwōn eo—aolepāer ilo juon raan eo elukkuun bwil.
Ij reim̧aanļo̧k n̄an kajjojo kweilo̧k, intōrpiu, kapen, im ekkapit kein. Bōtaab, ke ikar kōļmenļo̧kjeņ kōn jon̄an aō naaj boub, ikar kōtļo̧k aō būrom̧ōj kōn n̄a make—m̧ae iien ikar kōppeļļo̧ke Autobiography eo an Parley P. Pratt im kar jino riiti ijo ikar bōjrak ie. Elder Pratt kar bōke bwen rikalbuuj, ippān ļo̧k Josep im Hyrum Smith im ro jet, ilo raan ko reppen ilo Missouri. Ālkin aer kar bōk er n̄an Independence, Em̧m̧aan rein rejitōn bōro kar kalbuuji er ilo juon hotel im kakiki er ioon laļ ippān juon m̧ōttan aļaļ bwen pet eo aer.
Juon jibbon̄ emōļo im sno, Elder Pratt ekar jerkak im, ilo jab jelā, ej pād inabōj jān hotel eo. Ekar jibarekļo̧k turear in bukwōn eo im deblo̧keļo̧k meļaaj ko. Ālkin an kar etetal laļ enan̄in juon m̧ael (1.6 km), Elder Pratt ekar deļo̧n̄ e ļo̧k juon bukwin wōjke, sno ko rewōtlo̧k rekar kalbubuik iaļ ko an im wōjke ko repinej m̧aan an iaļ.
Ekar kejōkļo̧kjeņ kōn jekjek in. N̄an etal wōt turear wōt meļeļein n̄an ko n̄an bar juon state, ijo emaron̄ jibadōkļo̧k baam̧le eo an. N̄an ro̧o̧lļo̧k n̄an hotel eo meļeļein kalbuuj im jade im̧aan koot kōn jorrāān ko reļļap. Ekar itok juon en̄jake n̄an e bwen ko, Elder Pratt ekar ļōmņak kōn “jorrāān ko, ak mej” enaaj kōm̧m̧an bwe en waļo̧k menin n̄an rikalbuuj ro jet eļan̄n̄e enej etal.
Ilo an ļōmņak kōn menin, juon eoon ekar im̧we e: “Bwe jabdewōt eo e kōņaan lo̧mo̧o̧r an mour, enaaj jako an mour; a jabdewōt eo ej joļo̧k an mour kōn N̄a im kōn gospel eo, enaaj lo̧mo̧o̧ren” (lale Mark 8:35; K&B 98:13).
Elder Pratt ekar jepļaakļo̧k n̄an hotel eo. Allōn̄ in kalbuuj ko renana renaaj itok—ejjeļo̧k an baam̧le, jem̧jerā an Armej ro Rekwojarjar, ak maron̄ jerbal ilo kūr eo an rijilōk.1
Ikar kili bok in, kejōkļo̧kjeņ kōn en̄taan ko an Armej ro Rekwojarjar m̧okta—jet iaer rej ritto ro jibū im jim̧aaō Kōn naan in kam̧ool eo aer kōn gospel in im tōmak eo aer ilo Jisōs Kraist, rekar kijenmej im kōjekdoon nana im kakkure ko. Kōn kijenmej eo aer, rainin jemaron̄ in jerbal im kabun̄ ilo anemkwoj, kobaļo̧k ippāer ilo tōmak im naan in kam̧ool.
Ke ikar kōbpopo n̄an raan in Jabōt in, baam̧le eo aō rej aenōm̧m̧an, reim̧aanļo̧k n̄an juon raan in kabun̄jar ilo juon imōnjar em̧m̧an. Jemjerā ippān Armej ro Rekwojarjar renaaj kōmeram̧ ļo̧k raan eo ad. Jenaaj lan̄lōn̄ ipāer ilo kapen ko im ekkapit ko kōm̧m̧ani, eddo ko rej kūrm̧ool, im tōmak ej kajoor ļo̧k. Jenaaj bōk m̧ōtttan kwojkwoj eo, keememej Rilo̧mo̧o̧r im katok in pinmuur eo An. Im joteenin, jenaaj kuk ippān doon ilo m̧oko imōd n̄an riiti Bok in Mormon im jar ippān doon m̧okta jān ad babu ioon peet ko rem̧m̧an im petpet ioon pet ko remweoeo.
Raan in Jabōt ko aō rej obrak. Bwe ij kam̧m̧oolol im jeraam̧m̧an.