Ainikien ko an Armej ro Rekwojarjar ilo Raan-ko Āliktata
Akweļap kōn Tūriamo̧
Kōmeļeļe ko jān Stan Fellows
Ilo juon tūrāāp n̄an juon jikin epaakeļo̧k Estonia, iaar lo juon em̧m̧aan ej kajjitōk jāān. Menin bwilōn̄, iaar kile em̧m̧aan in jān tōre eo iaar jerbal āinwōt juon mijinede ilo bukwōn eo 10 iiō ko moktaļo̧k. Eaar ineek juon paak kileplep kōn bato bōļājtik ko, āinwōt kar m̧okta, bwe en wōr an jāān jān an aini im recycle i. Iaar keememej ke aolep iien ej kajjitōk n̄e elōn̄ jāān, im eļan̄n̄e kwoj leļo̧k n̄an e ebar kajjitōk eļan̄n̄e ej lōn̄ wōt.
Iaar bwilōn̄ ke ij loe. Im ālkin 10 iiō ejja reitok in wōt––euwōņ jidik, ak ilo aō lale elakar mour ilo ejja jekjek eo wōt ilo an kajjitōk jāān aolep raan. Iaar ļōmņak kōn jon̄an an em̧m̧an iiō ko 10 iiō remootļo̧k ilo aō mour, ko ekitbuuj m̧are eo aō ilo tampeļ, bōk jeļāļo̧kjeņ, bōk juon jerbal em̧m̧an, im m̧ōņōņō kōn aō ājmour.
Iaar ļōmņak emaron̄ ede in kōttan aō naaj lo em̧m̧aan in, im iaar en̄jake ke ij aikuj leļo̧k n̄ane jabdewōt men eo in leļo̧k e. Nana eo jon̄an jāān eo ippa eaar ļapļo̧k an aorōk jān jon̄an eo iaar kōņaan leļo̧k. Iaar uwōta kōn kālōt in iaar tin kōm̧m̧āne––jab leļo̧k ak leļo̧k n̄ane jon̄an eo eļapļo̧k jān jon̄an eo iaar kōņaan leļo̧k. Iaar kālet bwe eban kōm̧m̧an eļap oktak n̄an n̄a im enaaj kamōņōņōiki, kōn menin iaar leļo̧k an jāān.
Ruo raan tokālik iaar lo bwe n̄a make iaar pād ilo ejja jekjek rōt in, ak kiiō iaar juon eo iaar akweļap kōn tūriam̧o̧. Iaar tarpok kōn raan eo n̄an aō jilkinļo̧k apōlikāijen eo aō n̄an bōk jāān in jipan̄ ilo jikuuļ eo me eļap an aorōk. Iaar ļōmņak emōj aō kar jilkinļo̧k ruo wiik m̧okta jān raan eo, ak iaar lukkuun inepata ke iaar bar lukkuun lale im lo bwe iaar jilkinļo̧k juon raan rūmūj.
Oraņ jāān in jipan̄ ilo jikuuļ eo eaar 100 kōttan ļapļo̧kin jān jon̄an jāān eo iaar leļo̧k n̄an eo eaar kajjitōk, im iaar jab tōmak ke en jide im waļo̧k jekjek in. Iaar kile bwe n̄a make iaar akweļap kōn tūriam̧o̧, jimo̧r ilo aō jar n̄an Jemedwōj Ilan̄ im ilo e-mail n̄an ro rej bōk eddoin university eo. Raar ba renaaj kitbuuj apōlikāijen eo ak renaaj kōkaļļeik ke eaar rūmūj.
Jar eo aō eaar uwaak im iaar lukkuun jeraam̧m̧an bwe eaar tōbrak jāān in jipan̄ eo aō n̄an jikuuļ, eo eaar lukkuun jipan̄ eō im kōrā eo ippa ikkijeen jāān. Ak men eo eaorōkļo̧k, en̄jake in eaar katakin eō aorōkin katak in: jej ke aolep ri akweļap im̧aan Anij? (lale Mosaia 4:19).