2016
Juon Wāween Ekkatak
October 2016

Juon Wāween Ekkatak

Jān Rosemary Thackeray

Rijeje eo ej jokwe ilo Utah, USA.

Kajjieon̄i wāween kein emān n̄an kōm̧m̧an bwe naan eo an Anij en kaijoļjoļ n̄an jetōb eo am̧.

recipe for learning

Ke iaar dik, ekkā aō lo jinō ilo jikin kōmat eo. Ekkā an kōmati m̧ōn̄ā ko rekaijoljoļ tata, pilawe ko, kukiij ko, im bae ko n̄an baam̧le eo. Ālkin jet tōre, iaar jino lali iiōk ko, ļoori kōmeļeļe ko, im kōm̧m̧an m̧ōn̄ā. Iaar jab aikuj in pedped wōt ioon jinō—Imaron̄ make kōm̧m̧ane.

Ej āinwōt kilen ekkatak kōmat, jej katak gospel eo im kōļapļo̧k naan in kam̧ool eo ilo ad kōm̧m̧ane. Ālkin an Liai jiron̄ baam̧le eo an kōn ettōņak eo an kōn wōjke in mour, Nipai eaar kōnaan “lo, im ron̄, im jeļā aolep men kōn” emake (1 Nipai 10:17). Ilo naan ko jet, Nipai ejjabwe an ron̄jake naan in kam̧ool eo an jemen. Eaar kōnaan jeļā ta eo jemen eaar jeļā.

Wāween ekkatak gospel eo ewōr jet bun̄ten nee ko ie. Kwomaron̄ kōjerbal ļōmņak kein emān n̄an jipan̄ eok ekkatak gospel in ippān baam̧le eo am̧, ilo m̧ōņjar eo, ak ilo iien ekkatak ko am̧ make.

1. Kōppopo n̄an ekkatak.

Jino ekkatak ko am̧ make kōn jar. Kajjitōk ippān Jemedwōj Ilan̄ n̄an jipan̄ eok meļeļe ta eo kwoj riiti. Je juon ak ruo kajjitōk ko im pukot uwaak ko. Jetōb Kwojarjar enaaj kwaļo̧k kam̧ool an m̧ool eo kwoj riiti, kōļmenļo̧kjeņ, im jar (lale Moronai 10:5).

Kōppopo n̄an ekkatak gospel in ilo imōnjar eo ilo riiti katak eo m̧okta jen am̧ etal. Katak ko ilo Come, Follow Me maron̄ loi ilo LDS.org im ilo Gospel Library app eo.

2. Itok limo ilo am̧ ekktak.

  • Riit im meļeļe. Oraņ peij ko kwoj riiti ak ewi jon̄an am̧ riiti ejjab aorōk jen am̧ meļeļe ta eo kwoj riiti. Kwoj aikuj bar riiti eoon ko elōn̄ alen. Kōjerbal tikjinede n̄an pukot naan ko kwojjab meļeļe. N̄an waanjon̄ok, ta meļeļe epepen? Kwomaron̄ kōjerbal Guide n̄an Scripture ko n̄an pukote.

  • Kajjitōk kajjitōk ko kōn ta eo kwoj riiti. Bōlen kwomaron̄ ļōmņak, “Ta eo eaar waļo̧k ilo Jerusalem ilo tōre eo an Liai im baam̧le eo an ke raar em̧akūt? Etke armej ro raar jab ron̄jake Liai?”

  • Kajjieon̄ uwaaki kajjitōk kein jilu kōn jabdewōt katak ko an gospel in: Etke menin eaorōk n̄an armej ro ilo tōre eo? Elemen an jerbal n̄an kōj rainin? Elemen an jerbal n̄an n̄a?

  • Pukot jekjek ko im uwaak ko. N̄an waanjon̄ok, ta jon̄ok ko ilo wāween eo Nipai eaar ba n̄an rikapo eo? Elemen iaļen ito itak eo an baam̧le eo an ilo āne jem̧aden āinwōt RiIsrael ro jen Egypt?

  • Je en̄jake im im̧we ko ilo juon jōnōōļ. “Ilo am̧ je en̄jake ko, ekkā aer naaj itok. Barāinwōt, jeļāļo̧kjeņ eo kwoj bōke enaaj pād ilo aolepān mour eo am̧” (Richard G. Scott, “To Acquire Knowledge and the Strength to Use It Wisely,” Liaona, Aug 2002, 12, 14). Eļaptata je tameļeļein ļōmņak ilo mour eo am̧.

  • Jin̄aik juon pija. Bar juon wāween n̄an am̧ rekoote ta eo kwar ekkatak ej ilo jin̄a. Juon iien ke iaar loļo̧k juon m̧ōtta ilo nokon in jota eo an baam̧le, jim̧m̧an eaar kwaļo̧k bwebwenato ko an make kōn tōmak im jar. Mokta jen an katak eo jinoe, eo m̧ōtta eaar ajije peba ko n̄an ajri ro reddik im kōļar ko bwe ren kab jin̄aik bwebwenato ko ilo an jim̧m̧aer bwebwenato. Jin̄aik pija ko eaar jipan̄ er ikun̄, im raar kajjitōk kajjitōk ko ilo wāween ko bwe ren meļeļe m̧ōttan bwebwenato eo.

3. Ekkatak im mour kake gospel in kajjojo raan.

Ekkatak ebōk kijejeto; jej aikuj make mour kaki n̄an meļeļe (lale Mosaia 12:27). Elder M. Russell Ballard jān Doulul eo an Jon̄oulruo Rijilōk ro eaar kapilōk kōj n̄an “karōk juon iien im jikin ekkatak jeje ko rekwojarjar kajjojo iien, men̄e jejjo wōt minit” (“When Shall These Things Be?” Ensign, Dec. 1996, 60). Eļan̄n̄e emakijkij ad ekkatak, epidodo ad jeļā. N̄an waanjon̄ok, Iaar lo bwe n̄e ij riiti jepta ko ilo Aiseia ilo Bok in Mormon (ijelo̧kin etal jeni), raar jino alikkar n̄an eō.

N̄e ej itok n̄an ekkatak gospel in, ejjab bwe n̄an jeļā lukkuun men ko jet. Jej aikuj barāinwōt kamineneik ta eo jej ekkatak. Ilo ad jerbal e m̧ool eo, Jetōb Kwojarjar enaaj kam̧oole n̄an kōj, im naan in kam̧ool eo ad enaaj eddōk. Ilo ad mour jejjet kake m̧ool eo, jenaaj jino oktak, im oktak ļo̧k n̄an Jisōs Kraist.

4. Kwaļo̧k ta eo kwoj ekkatak.

Ba n̄an ro jet kōn juon unin katak ilo naan ko ad make ejipan̄ kōj keememej pedeped eo im en̄jake Jetōb, eo ekōkajoorļo̧k naan in kam̧ool ko ad. Ilo nokon in jota eo an baam̧le ej ijo ekkā an em̧m̧an n̄an kwaļo̧k naan. Kwomaron̄ barāinwōt kwaļo̧k n̄e kwoj bwebwenato ippān ro m̧ōttam̧ ak ro uwaan baam̧le eo am̧ ilo iien kōjota.

Ilo ad ļoor bun̄ten neen kein emān repidodo im tiljek n̄an pukot n̄an jeļā kōn Rilo̧mo̧o̧r eo, kar kallim̧juri kōj bwe “men ko an Anij renaaj waļo̧k tok n̄an [kōj], kōn kajoor eo an Jetōb Kwojarjar” (1 Nipai 10:19).