Ennaan eo an Būreejtōnji eo Kein Kajuon
Kōjeraam̧m̧an ko jān Pokake
Jān Būreejtōn Thomas S. Monson
Kōmļeļe jān Jim Madsen.
“Katak eo eļaptata jemaron̄ ekkatak ilo mour in,” Būreejtōn Thomas S. Monson ekar katakin, “n̄e Anij ej kōnono im n̄e jej pokake, jenaaj aolep iien jim̧we.”1
Jenaaj barāinwōt jeraam̧m̧an. Āinwōt an Būreejtōn Monson kar ba ilo kar kweilo̧k eo eļap: “N̄e jej kōjparok kien ko, mour ko ad renaaj m̧ōņōņō ļo̧k, ļapļo̧k aer eddōkļo̧k, im dikļo̧k aer poktak. Apan̄ ko ad im inepata ko renaaj pidodo ļo̧k ad ņamejļāer, im jenaaj bōk kōjeraam̧m̧an ko an [Anij] ekar kallim̧ur kaki.”2
Ilo tukaduin ennaan kein jān katak ko an Būreejtōn Monson āinwōt Būreejtōn eo an Kabun̄ in, ej kakeememej kōj bwe kien ko rem̧ool rej unin tōl ko n̄an m̧ōņōņō im aenōm̧m̧an.
Unin Tōl ko n̄an Iaļ eo
“Kien ko an Anij rekar jab itok n̄an aer rupe būruwōd ak n̄an aer erom mennin bōbrae ko n̄an m̧ōņōņō eo ad. Oktak eo em̧ool. E eo ekar kōm̧anm̧an kōj im E eo elukkuun iakwe kōj ejeļā ekōjkan ad aikuj mour bwe jen maron̄ in bōk eļap m̧ōņōņō. E ekar letok n̄an kōj unin tōl ko, im eļan̄n̄e jej ļoori, jenaaj lo kōjparok jān iaļ in ito itak in ekauwōtata ilo mour in. Jej keememej naan ko ilo al in jejeļā: ‘Keep the commandments! Ilo menin ewōr kōjparok; ilo menin ewōr aenōm̧m̧an’ [lale “Keep the Commandments,” Hymns, no. 303].”3
Kajoor im Jeļāļo̧kjeņ
“Pokake ej juon m̧wil eo ekkā ippān rikanaan ro; ej bōktok kajoor im jeļāļo̧kjeņ n̄an er ilo aolepān tōre ko. Ej menin aorōk n̄an kōj n̄an kile bwe jej, barāinwōt, rej ribōk n̄an jipan̄ in kōn kajoor im jeļāļo̧kjeņ. Ej pojak kadede n̄an kajjojo iaad rainin ilo ad pokake kien ko an Anij. …
“Jeļāļo̧kjeņ eo jej pukōte, uwaak ko jej kijenmej n̄an loi, im kajoor eo jej kōņaan rainin n̄an jelm̧ae apan̄ ko ilo juon laļ eļap im ukoktak maron̄ eo ad n̄e jej m̧ōņōņō in pokake kien ko an Irooj.”4
Kālet n̄an Pokake
“Mwil eo ekkā an waļo̧k rainin ej anemkwoj in kōm̧m̧ane juon men. Māākjiin ko im pija ko rej kwaļo̧k im kōmeļeļeik rikōm̧m̧an pija ro ilo juon screen in pija, rikkūre ro rebun̄bun̄—ro me elōn̄ wōt jodikdik rej kajjieon̄ m̧wil ko aer—āinwōt kōjekdo̧o̧n kakien ko an Anij im kobaļo̧k ilo m̧akūtkūt ko rejerawiwi, etan wōt n̄e ejjeļo̧k bōd enaaj waļo̧k. Kwoj tōmak ke! Ewōr juon iien jenaaj ekajet—āinwōt n̄e jenaaj beļāne juon account. Aolep m̧akūtkūt ko rem̧m̧an renaaj tōpar tok jem̧ļo̧k eo—n̄e ejjab ilo mour in, innām mour eo tok juon. Raan in Ekajet eo enaaj itok n̄an aolep. … Ikar akweļap ippem̧ bwe kwon kālet pokake.”5
Lan̄lōn̄ im Aenōm̧m̧an
“Emaron̄ in waļo̧k n̄an kom̧ jet iien ko bwe ro rej pād ilo wujwaan laļ in im eļap ļo̧k aer m̧ōņōņō jān kom̧. Jet iaami remaron̄ en̄jake mo jen jekjek in m̧wil eo me kōj ilo Kabun̄ in jej joor likatōtōt ie. Ro jeiū im jatū, Ij kwaļo̧k n̄an kom̧, mekarta, bwe ejjeļo̧k men eo me emaron̄ bōktok eļap lan̄lōn̄ n̄an mour ko ad ak ļapļo̧k aenōm̧m̧an n̄an jetōb ko ad jān Jetōb eo me emaron̄ itok n̄an kōj ilo ad ļoor Rilo̧mo̧o̧r im kejparok kien ko.”6
Etetal Jim̧we
“Ij kam̧ool n̄an kom̧ bwe kōjeraam̧m̧an ko ad kar kallim̧ur kaki reļļā jān jon̄an. Mekarta kōdo̧ ko remaron̄ ejouj doon, mekarta wōt ko remaron̄ wōtlo̧k iood, Jeļāļo̧kjeņ eo ad kōn gospel eo im iakwe eo ad n̄an Jemedwōj Ilan̄ im ad Rilo̧mo̧o̧r enaaj kaenōm̧m̧an im rejtak kōj im bōktok lan̄lōn̄ n̄an būruwōd ilo ad ilo̧k ilo jim̧we im kōjparok kien ko an. Enaaj ejjeļo̧k men ilo laļ in enaaj kabōjrak kōj.”7
Ļoor Rilo̧mo̧o̧r eo
“Wōn Em̧m̧aan in ebūromōj, … kar jeļā kōn būrom̧ōj? Wōn ej Kiin̄ in aiboojoj, Irooj in Inelap eo ke? E ej ad M̧aajta. E ej ad Rilo̧mo̧o̧r. E ej Nejin Anij. E ej Rijeje an ad Lo̧mo̧o̧r. E ej meram ko, ‘Ļoor Eō.’ E ej katakin, ‘Etal, im kōm̧m̧ane menin barāinwōt.’ E ej akweļap, ‘Kōjparok kien ko Aō.’
“Kōm̧m̧an bwe jen ļoor E. Kōm̧m̧an bwe jen ļoor waanjon̄ak eo An. Jen pokake naan ko An. Jān kōm̧m̧ane menin, jej leļo̧k n̄an E menin letok an kam̧oolol ekwojarjar.”8