Mihayag si Star
Ang tagsulat nagpuyo sa Colorado, USA.
“Nindot nga makauban mo dinhi sa Primary” (Children’s Songbook, 254).
Gisul-ob ni Star ang iyang sinina. Gil-as gihapon nga magsul-ob og sinina sa simbahan. Sa iyang karaan nga simbahan ang mga babaye magsul-ob og karsones o short sa Dominggo. Apan dili sa iyang bag-o nga simbahan. Siya ug ang iyang mama bag-o lang nabunyagan sa Ang Simbahan ni Jesukristo sa mga Santos sa Ulahing mga Adlaw.
Nanghupaw si Star samtang nagtan-aw sa samin. Siya naghinam-hinam nga moadto sa simbahan sa unang higayon isip usa ka opisyal nga miyembro, apan siya gikulbaan usab. Kaniadto, siya nagpabilin uban ni Mama sa tibuok panahon sa simbahan. Apan niining higayuna moadto siya sa Primary.
Sa kalit nakahunahuna si Star. Unsa kaha kon dili siya mahiangay? Unsa kaha kon ang ubang mga bata dili ganahan niya?
“Star? Andam ka na ba? Tawag ni Mama.
Nanaog si Star. “OK ra ba ko tan-awon?” nangutana siya.
Mipahiyom si Mama. “Gwapa ka tan-awon.”
Mikulismaot ang nawong ni Star. “Kinahanglan kang mosulti niana. Ikaw ang akong mama.”
“Sakto ka. Kinahanglang ko mosulti niana. Tungod kay kana tinuod.”
Mipahiyom og gamay si Star. Si mama kanunay nga dunay paagi nga siya mobati og nindot. Apan adunay nagdaguok sa iyang tiyan. Unsa kaha kon walay usa sa mga bata ang gusto nga makig-istorya kaniya? Siya adunay mga higala sa eskwelahan, apan sila dili mga miyembro sa iyang bag-o nga simbahan. Nanghinaut siya nga siya adunay bisan usa ka higala nga moadto sa simbahan uban kaniya.
“Nahinumduman nako ang usa ka butang nga kinahanglang akong buhaton,” iyang gisultihan si Mama.
Midagan siya og balik sa taas ug miluhod tupad sa iyang higdaanan. “Pinalanggang Langitnong Amahan, palihug tabangi ko nga makahigala. Mituo ko unsay gitudlo sa mga misyonaryo tinuod, apan nahadlok ko.”
Nagpabilin siyang nagluhod ug naminaw. Pagkataud-taod siya mibati og usa ka matam-is, malinawon nga pagbati, ug wala na kaayo siya makuyawi.
Sa simbahan si Star ug si Mama milingkod tupad sa usa ka pamilya uban sa tulo ka gagmayng anak nga babaye. Ang mga ginikanan mipaila sa ilang kaugalingon ug misugod sa pagpakig-istorya uban ni Mama sa wala pa magsugod ang miting. Si Star mitabang sa mga babaye sa pagkolor sa litrato ni Jesus.
Si Bishop Andrews mipadulong ngadto kanila. “Sister Cunningham! Star! Nindot nga nagkita ta karon.” Mipahiyom siya kanila ug milamano. Nakalimot si Star nga buotan ang tanan sa simbahan. Tingali siya makakita og higala sa katapusan.
Human sa sakrament miting si Star miadto sa Primary. Mitan-aw siya sa ubang mga bata nga gikulbaan samtang siya milingkod. Nag-istoryahanay sila sa usag usa ug sa ingon og wala sila makamatikod kaniya. Nahugno ang kasingkasing ni Star. Nag-inusara ra siya.
Dayon usa ka batang babaye nga kaedad ni Star misulod sa kwarto. “Gikulbaan usab siya,” naghunahuna si Star. “Mahimo kong makig-istorya kaniya.”
Miginhawa og lawom si Star, dayon miduol sa batang babaye. “Hi, ako si Star. Bag-o ko dinhi. Gusto ka bang molingkod tupad nako?” Gipugngan ni Star ang iyang ginhawa. Gusto ba kaha sa batang babaye nga mahimo niyang higala?
Mipahiyom ang batang babaye. “Ako si Sarah. Bag-o sad ko dinhi. Ang akong pamilya bag-o lang mibalhin gikan sa Ontario.”
“Ang akong mama ug ako gibunyagan duha ka semana ang milabay,” miingon si Star. “Dili ko sigurado unsa ang angay nakong buhaton.”
Midako ang pahiyom ni Sarah. “Atong susihon kini og dungan.”
Si Star ug Sarah nagtupad sa paglingkod sa ilang klase. Usahay si Star makasiplat ni Sarah ug mipahiyom. Mibawos sa pagpahiyom si Sarah. Gibati ni Star ang kakalma ug kalipay. Nasayud siya nga ang Langitnong Amahan mitubag sa iyang pag-ampo ug mitabang kaniya nga makakita og higala.
Diha sa klase ang magtutudlo mihangyo ni Star ug Sarah sa pagpaila sa ilang mga kaugalingon.
Mitindog si Star. “Ang akong ngalan mao si Star Cunningham. Ang akong mama ug ako gibunyagan duha ka semana ang milabay.” Mihunong siya, ug pahiyom siya samtang mitan-aw siya sa iyang bag-ong higala. “Ug kini mao ang akong higala nga si Sarah.”