Mga Tingog sa mga Santos sa Ulahing mga Adlaw
Human na!
Paghulagway pinaagi ni Allen Garns
Atol sa mga pag-interbyu isip usa ka bishop usa ka Dominggo sa hapon, nalipay ko nga nakigsulti sa usa ka buotang higala mahitungod sa pipila ka mga hagit nga iyang gisagubang. Human maminaw sa iyang mga problema sulod sa pipila ka minutos, mibati ko nga ang iyang gikinahanglan mao ang kanunay nga pagbasa sa mga kasulatan. Napahinumduman usab ako nga isip iyang bishop, ako usab kinahanglan nga mas kanunay sa akong pagtuon sa kasulatan, butang usab nga akong gipanglimbasugan. Mao nga misugyot ko nga “mag-partner mi” sa pagpaningkamot nga mas makanunay ang among pagtuon.
Matag adlaw human namo og basa sa among mga kasulatan, mo-text mi sa usag usa sa pulong nga Human na! Ang pagkahibalo nga dunay tawo nga naghulat nga makahibalo kon nakahuman na ba o wala pa ang usa makabasa nianang adlawa usa ka talagsaong pagdasig para namong duha. Kon ang usa namo makalimot, ang pagkadawat og text maoy pahinumdom. Kon ang usa dili mag-text, siguradong wala siya mapahinumdumi niini. Gihimo namong duha kini nga hagit nga walay pagpasangil nga ang usa sad-an.
Gisugdan namo ang hagit unom ka bulan nang milabay karon, ug wala koy mahinumduman nga adlaw nga nasipyat kami sa pagbasa sa mga kasulatan. Kini nga brother mibarug atol sa fast and testimony miting mga duha ka bulan nang milabay ug mipaambit sa iyang pagpamatuod sa positibong epekto sa inadlawng pagtuon sa kasulatan diha kaniya ug sa iyang pamilya.
Nagpasalamat ko niini nga brother ug sa iyang pakighigala ug sa iyang inadlaw nga pag-text. Akong nakita kon sa unsang paagi ang teknolohiya kon tukmang pagkagamit makapalambo sa atong kinabuhi. Nagpasalamat sab ko sa mga kasulatan ug sa unsang paagi kini nagpamatuod kang Kristo. Nasayud ko nga ang maulaon nga sakripisyo sa Manluluwas naghimong posible nga ang matag usa kanato makabalik sa pagpuyo uban Kaniya ugma damlag.