Hangtud sa Sunod Natong Panagkita
Ang Gahum sa Dios
Gikan sa pakigpulong sa kinatibuk-ang sesyon sa priesthood nga giulohan og “The Doctrine of the Priesthood,” Ensign, Mayo 1982, 32–34; ang pag-capital gi-standardize.
Ang hugot nga pagtuo usa ka gahum ug ang gahum mao ang priesthood.
Dakbayan sa Zion Nabalhin sa Pagkahimaya, ni Del Parson
Ang Dios mao ang Dios tungod kay Siya ang hingpit nga hulagway sa tanang pagtuo ug sa tanang gahum ug sa tanang priesthood. Ang kinabuhi nga iyang gipakabuhian ginganlan og kinabuhing dayon.
Ang sukod sa pagkahimo natong sama Kaniya mao ang sukod sa atong pag-angkon sa Iyang hugot nga pagtuo, pag-angkon sa Iyang gahum, ug paggamit sa Iyang priesthood. Ug kon mahimo na kitang sama Kaniya sa hingpit ug tinuod nga punto, niana kita usab makaangkon og kinabuhing dayon.
Ang pagtuo ug ang priesthood magkauban. Ang hugot nga pagtuo usa ka gahum ug ang gahum mao ang priesthood. Human nato maangkon ang pagtuo, madawat nato ang priesthood. Dayon, pinaagi sa priesthood, motubo kita inubanan sa pagtuo hangtud mabatunan ang tanang gahum, mamahimo kitang sama sa atong Ginoo.
Ang atong panahon dinhi sa mortalidad gigahin isip panahon sa pagsulay ug pag-testing. Atong pribilehiyo samtang nia kita dinhi ang paghingpit sa atong pagtuo ug pagtubo uban sa gahum sa priesthood. …
Ang balaan nga priesthood nakahimo og daghan sa paghingpit sa katawhan sa mga adlaw ni Enoch kay sa ubang panahon. Nailhan kini isip kapunongan ni Enoch (tan-awa sa D&P 76:57), gahum kini diin siya ug ang iyang mga tawo gibalhin sa pagkahimaya. Ug gibalhin sila sa pagkahimaya tungod kay duna silay pagtuo ug gigamit nila ang gahum sa priesthood.
Didto kang Enoch ang Ginoo mihimo og mahangturong mga pakigsaad nga ang tanang makadawat sa priesthood makabaton og gahum, pinaagi sa pagtuo, sa pagdumala ug pagkontrolar sa tanang butang dinhi sa yuta, sa pagpugong sa mga sundalo sa kanasuran ug makabarug sa himaya ug kahimayaan atubangan sa Ginoo.
Si Melchizedek mao ang tawo nga may susamang hugot nga pagtuo, “ug ang iyang katawhan nagbuhat sa pagkamatarung, ug nakaangkon sa langit, ug nagtinguha alang sa dakbayan sa Enoch” (Hubad ni Joseph Smith, Genesis 14:34). …
Unsa man diay ang doktrina sa priesthood? Ug unsaon man nato sa pagpakabuhi isip mga sulugoon sa Ginoo?
Kini nga doktrina mao nga ang Dios nga atong Amahan usa ka nahimaya, hingpit, ug nahimaya nga binuhat kinsa adunay tanang kusog, gahum, ug tanang kamandoan, kinsa nasayud sa tanang butang ug walay kinutuban sa Iyang tanang hiyas, ug nagpuyo kauban sa pamilya.
Mao kini nga ang atong Mahangturong Amahan nagtagamtam niining labaw nga kahimtang sa himaya ug kahingpitan ug gahum tungod kay ang Iyang pagtuo hingpit ug ang Iyang priesthood walay kinutuban.
Mao kini nga ang priesthood mao gayud ang ngalan sa gahum sa Dios, ug nga kon gusto kitang mahisama Kaniya, kinahanglang dawaton ug gamiton nato ang Iyang priesthood o gahum sama sa Iyang paggamit niini. …
Mao kini nga kita adunay gahum, pinaagi sa pagtuo, sa pagdumala ug pagkontrolar sa tanang butang, sa temporal man o espiritwal; sa paghimo og mga milagro ug paghingpit og mga kinabuhi; sa pagbarug atubangan sa Dios ug mahimong sama Kaniya tungod kay kita nakaangkon sa Iyang hugot nga pagtuo, Iyang kahingpitan, ug Iyang gahum, o sa laing pagkasulti sa kahingpitan sa Iyang priesthood.
Kini mao ang doktrina sa priesthood nga walay makalabaw bisan unsang butang. Gahum kini nga atong maangkon pinaagi sa hugot nga pagtuo ug pagkamatarung …
Sa tinuod dunay gahum sa priesthood—gahum nga gitinguha natong maangkon aron magamit, gahum nga mahalaron natong giampo nga moabut kanato ug sa atong kaliwatan hangtud sa hangtud.