Sa unsang paagi ako Makatuon pinaagi sa Akong Hunahuna ug sa Akong Kasingkasing?
Susiha unsay imong mahimo kon duna kay pangutana.
Unsay imong buhaton kon ikaw dunay pangutana bahin sa doktrina, kasaysayan, o personal? Unsaon nimo pagpangita og tubag? Ang Ginoo misaad, “Ako mosulti kanimo diha sa imong hunahuna ug sa imong kasingkasing pinaagi sa Espiritu Santo” (D&P 8:2). Unsaon nimo paggamit sa imong hunahuna ug kasingkasing nga makaila og inspirasyon? Ania ang pipila ka mga ideya.
Hunahuna
Pagtuon, Pag-ampo, Pagpaminaw
Si Elder Robert D. Hales sa Korum sa Napulog Duha ka mga Apostoles miingon nga kon kita naghimo og “dagkong mga desisyon sa atong kinabuhi … , naglaum ang Langitnong Amahan nga gamiton nato ang atong kabubut-on, tun-an ang sitwasyon diha sa atong hunahuna sumala sa mga baruganan sa ebanghelyo, ug ipresentar ang desisyon ngadto Kaniya pinaagi sa pag-ampo” (“Ang Espiritu Santo,” Liahona, Mayo 2016, 105).
Pareha ra kini sa bisan unsa nga pangutana. Samtang ikaw magtuon, mag-ampo nga matinud-anon mahitungod sa mga tubag nga imong nakit-an. Ang Espiritu Santo mohatag kanimo og mga pag-aghat—pinaagi sa mga ideya, mga pulong sa imong hunahuna, o uban pang personal nga mga pahinumdom—sa paggiya kanimo ngadto sa dugang nga mga tubag nga imong gikinahanglan.
Gamita ang mga Kapanguhaan
Siksika ang mga kasulatan, lakip ang Giya ngadto sa mga Kasulatan ug ubang mga tabang sa pagtuon. Makasiksik usab kamo sa ubang mga kapanguhaan sa LDS sama sa mga pakigpulong sa kinatibuk-ang komperensya, Gospel Topics sa LDS.org, mga magasin sa Simbahan, sa Joseph Smith Papers Project, ug uban pa. (Tan-awa sa pahina 54 alang sa lista sa makatabang nga mga kapanguhaan sa Simbahan.)
Hisguti kini
Ayaw kahadlok sa pagpangayo og tabang. Si Elder Ronald A. Rasband sa Korum sa Napulog Duha ka mga Apostoles miawhag, “Mohatag ko nimo og hagit. … Kinahanglan kang maghunahuna og usa ka tawo [nga makatabang kanimo sa pagpangita og mga tubag]—usa ka kasaligan nga higala, usa ka ginikanan o mga ginikanan, apohan, magtutudlo, bishopric, [o] tigtambag… —ug kinahanglan nga matubag kining mga pangutanaha” (Face to Face broadcast, Ene. 20, 2016). Sulayi kini! Pakigsulti og usa ka tawo nga imong gisaligan mahitungod sa imong mga pangutana ug pangita kamo og mga tubag.
Kasingkasing
Pagtuon, Pag-ampo, Pagpaminaw
Kini mao ang importante nga lakang alang sa pagpamalandong uban sa imong hunahuna ug sa imong kasingkasing. Si Presidente Dieter F. Uchtdorf, Ikaduhang Magtatambag sa Unang Kapangulohan, miingon, “Kon gusto ninyong mailhan ang espirituhanong kamatuoran, kinahanglan ninyong gamiton ang tukma nga mga instrumento. Dili ninyo masabtan ang espirituhanong kamatuoran gamit ang mga instrumento nga dili makamatikod niini” (“Pagdawat og usa ka Pagpamatuod sa Kahayag ug Kamatuoran,” Liahona, Nob. 2014, 22). Ang Espiritu Santo mao ang instrumento diin kita makakat-on og espirituhanon nga mga butang. Busa kon kamo mag-ampo ug maminaw sa Espiritu, moabut ang panahon nga imong makita ang mga tubag.
Pagmapailubon
Mipasabut si Presidente Uchtdorf, “Kon mas ipaduol nato ang atong kasingkasing ug hunahuna ngadto sa Dios, mas dugang nga langitnong kahayag ang ihatag kanato. … Anam-anam, ang mga butang nga kaniadto lubog, ngitngit, ug layo magkaklaro, magkahayag, ug mas mapamilyar ngari kanato” (“Pagdawat og usa ka Pagpamatuod sa Kahayag ug Kamatuoran,” Liahona, Nob. 2014, 22). Ang pagpangita sa mga tubag mahimong usa ka taas nga proseso. Apan kon kamo andam sa pagpaminaw alang sa mga tubag, bisan kon nagkinahanglan og panahon, kamo makakita niini.
Pagpraktis sa Pag-ila sa Pag-aghat
Kon mas daghan ang imong mailhan nga mga pag-aghat ug andam nga mobuhat kon ang Espiritu mohung-hong sa imong kasingkasing, mas masayon ang pag-ila sa dugang nga mga pag-aghat sa umaabut. Kamo “mobati nga kini husto” o makasinati og “mga kasamok sa hunahuna” kon kini sayop (tan-awa sa D&P 9:8–9). Kamo tingali mobati usab og malumo nga pahinumdom, pagbati sa kalinaw, o lain nga mga pagbati nga piho alang kaninyo. Ang Ginoo nakaila kaninyo, ug Siya nasayud kon sa unsang paagi kamo makasabut sa Espiritu. Siya mohatag kanimo sa mahigugmaong giya nga talagsaon alang kanimo. Busa padayon sa pagpaminaw ug sa pagpraktis.